1 REYES 7 - Dios Rimashcata Quillcashcami

Salomón shuctac huasicunatapish shayachishcamanta

¹ Chai quipami Salomonca pai causana huasita shayachirca. Chai huasitaca chunga quimsa huatapimi tucui tucuchirca.

² Shinallatac shuctac huasitapish shayachircami. Chai huasica «Líbano urcumanta caspicuna» nishca shutimi carca. Chai huasica largomanca chuscu chunga pichca metromi carca. Anchomanca, ishcai chunga ishcai metro chaupimi carca. Altomanca chunga quimsa metro chaupimi carca. Chai huasitaca cedro caspimanta ruhuashca pilarcunahuanmi chuscu filata ruhuashpa shayachirca. Chai jahuapi churana vigacunapish cedro caspillatacmi carca.

³ Chai pilarcunapi quingraiman churashca vigacunaca cedro tablahuan jahuallatac churashcami carca. Chai vigacunaca chuscu chunga pichca pilarcunapimi churashca carca. Cada filapimi chunga pichca pilarcuna carca.

⁴ Ventanacunaca ishcai ladopitacmi chimbapurashca quimsa fila carca.

⁵ Chai huasi pungucunapish, ventanacunapish cuadradomi carca. Ventanacunapish chimbapurashcami quimsa fila, quimsa fila carca.

⁶ Shinallatac pilarcunata shayachishpami, shuc corredorta ruhuarca. Chai corredorca ishcai chunga ishcai metro chaupi largomi carca. Anchomanca chunga quimsa metro chaupimi carca. Chai corredortaca punta shayachishca corredor chimbapurapimi shuc pilarcunahuan, shuc caspicunahuan chicanta ruhuarca.

⁷ Pi imata allichichun nishpa huillangapac shamucpi allichingapacpish shuc ucutami ruhuarca. Chai ucutapish pambamanta jahua catamanmi cedro tablacunahuan allichirca.

⁸ Pai causana huasitapish chaishuc huasi pungu pamba huasha ladomanmi chai shinallatac ruhuana. Faraonpac ushi Salomonpac huarmimanpish corredorpi cac ucu shinallatacmi shuc huasita shayachirca.

⁹ Tucui chai huasicunaca ucumanta jahua tucurincaman, canzha ladomanpish, ucu ladomanpish, canzha ladomanta ucu jatun pungu pambacamanmi valishca rumicunahuan ruhuashca carca. Chai rumicunaca pitina fierrohuan pitishpa sumacta churashcami carca.

¹⁰ Callaripi churashca rumicunaca achca vali jatun rumicunami carca. Chai rumicunaca chuscu metro chaupi, quimsa metro chaupimi carca.

¹¹ Jahuamanpish chashnallatac medishpa labrashca alli vali rumicunata, shinallatac cedro caspicunata churashcami carca.

¹² Chai jatun pungu pamba muyundipica quimsa filatami labrashca rumicunahuan, shuc filataca cedro caspihuan shayachishpa ruhuashca carca. Mandac Diospac ucu pungu pambatapish pilarcunahuan shayachishca huasi ucu pambatapish shayachishcami carca.

Bronce pilarcunamanta

¹³ Jatun mandac Salomonca Tiro pueblopi causac Hiramtami pushamuchun cacharca.

¹⁴ Paica Neftalí aillupuramanta shuc viuda huarmipac cari huahuami carca. Paipac taitaca Tiro pueblomanta broncemanta imatapish ruhuanata alli yachacmi carca. Hirampish chai shinallatacmi broncemanta imata ruhuanatapish, ima shina ruhuanatapish alli yachac, yuyaisapa carca. Chaimantami mandac Salomonpacman shamushpa, pai ima nishcata ruhuarca.

¹⁵ Paica bronceta yacuyachishpami ishcai pilarta ruhuarca. Chai pilarcunaca altomanca pusac metro chunga centímetro, racumanca pichca metro chuscu chunga centimetrotami charirca.

¹⁶ Shinallatac chai pilar umapi churangapacpish bronceta yacuyachishpami ishcai capitel nishcacunata ruhuarca. Chai capitelcunaca ishcaitami ishcai metro ishcai chunga centimetrota charirca.

¹⁷ Chai pilar umapi churashca capitelcunapi churangapacca rejillacunatami cadenaman riccha jimbashcata ruhuarca. Cada capitelcunapacmi canchista ruhuashca carca.

¹⁸ Shinallatac chai capitelcunata tapangapacca granadilla nishcacunatami rejilla muyundita ishcai filata ruhuarca. Chaishuc capitelpacpish shinallatacmi ruhuarca.

¹⁹ Diospac huasi corredorpi shayacuc pilar umapi churashca capitelcunaca lirio sisa shinami carca. Chaicunaca shuc metro pusac chunga centimetromi carca.

²⁰ Chai ishcai pilar umapi churashca capitelcunapica ishcai patsac granadillata rejilla jahuapi ishcai filata muyuchishpa ruhuashcami carca. Caishuc capitelpish chashnallatacmi carca.

²¹ Chai ishcai pilarcunataca Diospac huasi corredorpimi shayachirca. Alli ladoman shayachishca pilartaca Jaquintami shutichirca. Lluqui ladoman shayachishca pilartaca Boaztami shutichirca.

²² Chai ishcai pilarcuna jahua umapica lirio sisacuna shinallatacmi ruhuashpa churarca. Chashnami chai pilarcunata tucuchirca.

Diospac huasipi imalla charinata ruhuashcamanta

²³ Shinallatac yacuta churangapacca bronceta yacuyachishpami mama cucha nishca shuc jatun pailata muyundita ruhuarca. Chai pailaca shuc ladomanta caishuc ladocaman medicpica, chuscu metro chaupimi carca. Huichaiman medicpica, ishcai metro ishcai chunga centimetromi carca. Shimita muyundi medicpica, chunga quimsa metro chaupimi carca.

²⁴ Chai paila shimi ucu ladotapish, jahuatapish muyunditami calabazalaya bolacunata ishcai filata ruhuashpa churarca. Chai bolacunataca cada chuscu chunga pichca centimetropimi, chunga calabazacunata churarca. Chaicunataca bronceta yacuyachishpami chai pailallahuantac ruhuarca.

²⁵ Chai pailaca chunga ishcai huagracunapac jahuapimi tiyachishca carca. Chai huagracunaca quimsaca huichaiman, quimsaca inti tigrana ladoman, caishuc quimsaca uraiman, chaishuc quimsaca inti llucshina ladoman ricushpami shayacurca. Chai pailaca huagracunapac jahuapimi carca. Chaquicunaca ucu ladomanmi carca.

²⁶ Chai pailaca canchis centímetro racumi carca. Paila shimi muyundica shuc cáliz vaso shina, mana cashpaca lirio sisa shimi shinami carca. Chaica chuscu chunga huaranga litro yacutami aparca.

²⁷ Shinallatac yacuta churana bronce carretacunataca pailacunataca chungatami ruhuarca. Chaicunaca anchomanpish, jahuamanpish shuc metro pusac chunga centimetrotami charirca. Huichaiman medicpica, shuc metro quimsa chunga pichca centimetrotami charirca.

²⁸ Chai carretacunaca tablacunata broncemanta ruhuashca marcopimi churashca carca.

²⁹ Chai carretacunapac marcocunapi churashca tabla jahuapica leoncunata, huagracunata, querubincunata ruhuashcami carca. Chai carretacunapi churashca tablacunapi leoncunapac, huagracunapac jahua ladomanpish, ura ladomanpish guirnalda nishcacunata sumacta ruhuashcami carca.

³⁰ Tucui carretacunami broncemanta ruhuashca chuscu ruedata charirca. Chai ruedata churana fierrocunapish, broncellamantatacmi carca. Ruedacunata churashca chaquipipish, carreta tanqueta huichai charichunmi broncellamantatac chuscu ladoman repisa nishcacunata churarca. Chai puntapica sisacunata ruhuashcami carca.

³¹ Chai carretacunapi cac tanquecunapac shimicunaca chuscu chunga pichca centimetrota, huichai llucchishca redondomi carca. Chai shimi puntaca sumacta ruhuashcami carca. Chaita huichaiman charichun tablacunata churashpa ruhuashca carretata jahuaman medicpica, sucta chunga pusac centimetromi carca. Marcocunahuan ruhuashca chai cajonca cuadradomi carca, mana redondochu carca.

³² Chai carretacunapac chuscu ruedacunaca marcocuna ruhuashca ucupimi carca. Ruedacunata charic fierroca cajonllamantatacmi llucshicurca. Chai ruedacunata huichai medicpica, sucta chunga pusac centímetro chaupimi carca.

³³ Chai ruedacunaca carretacunapac rueda shinallatacmi carca. Ruedacunapac fierrocunaca rayo nishcacuna, cubu nishcacuna, aro nishcacuna, tucuimi broncemanta carca.

³⁴ Chai carreta chuscu ladopi churashca repisa nishcacunaca chai carretallapitacmi ruhuashca carca.

³⁵ Chai carreta jahuapi cac cajoncunapac shimica redondomi carca. Chaita huichaiman medicpica, ishcai chunga ishcai centímetro chaupimi carca. Chai carreta jahuapi churashca cajonpac redondo shimipish tablacunapish, chai carretallapitac ruhuashcami carca.

³⁶ Tablata churana marcocunapica querubincunata, leoncunata, palmera yuracunatami ruhuarca. Maipi chashna ruhuana pushtu tiyashcapimi chashna ruhuarca. Chai muyunditaca quirnalda nishcahuanmi sumacta ruhuarca.

³⁷ Chashnami chai chunga carretacunataca bronceta yacuyachishpa chai shinallatatac chai medidallapitac ruhuarca.

³⁸ Chashnallatacmi broncellamantatac, chunga uchilla tanqueta ruhuarca. Chai tanquecunaca huichaiman medicpica, shuc metro pusac chunga centimetrotami charircacuna. Cada tanquemi pusac patsac pusac chunga litrota apac carca. Chai tanquecunataca chunga carretacuna jahuapimi shuc shucpi churarca.

³⁹ Chashna churashpaca, Diospac huasi ladopimi pichcataca alli ladoman, pichcataca lluqui ladoman churarca. Chai jatun pailataca huasi ladopimi inti llucshimuc ura ladoman churarca.

⁴⁰ Shinallatac Hiramca jahuarina pailacunata, lamponcunata, tazoncunatapishmi ruhuarca. Chashnami Mandac Diospac huasipi ima tiyanacunata jatun mandac Salomonman tucui ruhuashpa curca.

⁴¹ Ishcai jatun pilarcunatapish, chai pilar umapi churashca tazón capitel nishcacunatapish, shinallatac ishcai rejillacunatapish ruhuarcami. Chai rejillacunaca jatun pilar umacunapi churashca capitelcunata tapashcami carca.

⁴² Chuscu patsac granadacunatapish ishcai rejillacunapacmi ruhuarca. Chai granadacunataca chai pilarcunapac umapi churashca capitelcunata muyundi tapangapacmi cada rejillapi ishcai filata ruhuashpa huarcurca.

⁴³ Shinallatac chunga carretatapish, chai carretacunapi churashca chunga tanquetapish ruhuarcami.

⁴⁴ Jatun pailatapish, huichai huandushpa shayacuc chunga ishcai huagracunatapish ruhuarcami.

⁴⁵ Jahuarina pailacunata lamponcunata, tazoncunatapish ruhuarcami. Mandac Diospac huasipi ima charinacunata, Hiram jatun mandac Salomonman ruhuashpaca chuyayachishca broncemantami ruhuarca.

⁴⁶ Chai tucui charinacunataca jatun mandacca Jordán pambapimi ruhuachirca. Chaipica quillu allpami carca. Chai pambaca Sucot pueblohuan Saretán pueblohuan chaupipimi carca.

⁴⁷ Chai tucui charishcacunata ruhuashcacunaca achca cacpimi, broncecuna mashnata pezactaca Salomonca mana yacharca.

⁴⁸ Chashnallatacmi Salomonca Mandac Diospac huasipi tucui ima charishcacunataca ruhuachishpaca, curi altarta, curillamantatac ruhuashca mizatapish ruhuachircami. Chai mizapimi Diosman carana tandaca tiyacurca.

⁴⁹ Shinallatac Diospac chicanyachishca ucu chimba ladopica ashtahuan alli curi candelerocunatami pichcataca alli ladoman pichcataca lluqui ladoman churarca. Chaicunapica curita ruhuashca sisacunandi, lamparacunandi, tenazacunandimi churarca.

⁵⁰ Shinallatac copacunatapish, pavizata anchuchinacunatapish, incensariocunatapish, ashtahuan alli curicunahuanmi ruhuarca. Diospac huasi ucupi tiyac pungu ladocunata Diospac huasiman yaicuna jatun pungu ladocunatapish curillahuantacmi ruhuarca.

⁵¹ Mandac Diospac huasipica jatun mandac Salomón ruhuanata yuyarishcataca chashnami tucui ruhuashpa tucuchirca. Chai quipami Salomonca Diospac cachun, paipac taita David chicanyachishca curita, cullquita, ashtahuan ima charishcacunataca Mandac Diospac huasiman aparca. Chaipimi ima charishcacunata huacaichina ucucunapi churarca.