1 REYES 3 - Dios Rimashcata Quillcashcami

Salomón Faraonpac ushihuan cazarashcamanta

¹ Jatun mandac Salomonca Egipto llactata jatun mandac Faraonpac ushihuan cazarashpami familiapura tucurca. Paica Faraonpac ushi paipac huarmitaca Davidpac pueblomanmi pushamurca. Salomonca pai mandashpa tiyana huasitapish, Mandac Diospac huasitapish, Jerusalén pueblo muyundi pircatapish ruhuangacamanmi chaipi charirca.

² Mandac Diosta yuyaringapac ruhuashca huasica manarac tiyarcachu. Chaimantami gentecunaca chai huatacunacaman lomacunapi tiyac altarcunapi animalcunata Diosman cushpa huañuchiccuna carca.

Salomonca yuyaita Diosta mañashcamanta

³ Salomonca Mandac Diosta cuyarcami, paipac taita David yachachishcatapish cazushpami causarca. Shina cashpapish, lomacunapi tiyac altarcunapimi animalcunata Diosman cushpa huañuchic carca, shinallatac inciensotapish cushnichic carca.

⁴ Animalcunata huañuchishpa Diosman cungapacca Gabaonmanmi riccuna carca. Chaipi cac altarmi ashtahuan valichishca carca. Chaimantami Salomonpish achca animalcunata huañuchishpa Diosman cungapacca chaiman ric carca.

⁵ Shuc tutami Mandac Diosca pai Gabaonpi cacpi, Salomonman muscuipi ricurishpaca: —Imata, ñuca canman cuchun munashpaca mañailla— nirca.

⁶ Shina nicpi, Salomonca: —Canca canta servic ñuca taita Davidtaca yallitami llaquircangui. Paica cambac ñaupapica cashcata ruhuashpa alli shunguhuanmi purirca. Chaimantami can yallita llaquishcataca paiman allichishpa charicushcangui. Chashna charishpami, pai mandashpa tiyacucpica, paipac churita churashcangui. Chaica cunan cai punzhami pactamushca.

⁷ Cunanca, ñucata Mandac taita Dioslla, canmari canta servic ñucataca cunan huiñai huambra imata mana yachacpipish, ñuca taita Davidpac randi jatun mandac cachun churashcangui.

⁸ Canta servic ñucaca can acllashca gentecunapac chaupipimi cani. Paicunaca yupanatapish, mana pudipac shinallatac mashna cashcatapish mana yachaipac achca gentecunami can.

⁹ Chaimanta can acllashca gentecunata mandangapac alli yuyaita charic shunguta ñucaman cui. Shinallatac ima alli cacta, mana alli cactapish ricushpa allichingapac yachaita cui. Cai tucui gentecunata mandanataca ¿Pitac pudingayari?— nirca.

¹⁰ Salomón chashna mañashcaca mandac Diosmanca allimi ricurirca.

¹¹ Chaimantami Diosca: —Unai huatacuna causanatapish, chayuc tucunatapish canta piñaccunapac causaita quichuchunpish mana mañanguichu, ashtahuanpish alli entendishpa alli yuyaihuan mandangapac yachaillatacmi mañangui.

¹² Riqui, cunanca can mañashca shinallatacmi ruhuasha. Riqui, alli entendic alli yuyaita charic shungutami canman curcani. Chashna alli yuyaita charic runaca cambac ñaupapish, mana tiyarcachu. Cambac quipapish, can shinaca mana tiyangachu.

¹³ Shinallatac can mana mañacpipish, charic tucunata yallita alli canatami cugrini. Shina cashcamantami cambac tucui causaipica jatun mandacpuramantaca maijanpish chashnaca mana tiyanga.

¹⁴ Shinallatac ñucata mana saquishpa, ñuca quillcashca shimicunata ñuca mandashcacunata cambac taita David shina cazushpa causacpica, cambac causana punzhacunatapish yallichishami— nirca.

¹⁵ Salomón riccharishpaca, muscuilla cashcatami yuyarca. Chaimantami Jerusalenman cutishpa, Mandac Dios ari nishcata huacaichina Arca ñaupapi Diosman animalcunata cushpa, huañuchishpa tucui rupachirca. Dios-huan alli cangapacpish animalta cushpa huañuchircami. Chai quipaca jatun micuita ruhuashpami tucui paita serviccunaman cararca.

Salomón yachachishcacuna tucuipi alli llucshishcamanta

¹⁶ Chai punzhallatacmi cullquimanta huainayac ishcai huarmicunaca jatun mandac Salomonpacman shamurcacuna.

¹⁷ Chai huarmicunamanta shucca: —¡Aij, ñucata mandaclla! Ñucapish cai huarmipish shuc huasillapimi causanchic. Ñucaca paihuan chai huasipi cashpami, shuc huahuata charircani.

¹⁸ Ñuca huachashca quimsa punzha quipami paipish huacharca. Chaipica ñucanchicllami carcanchic. Pipish mana carcachu.

¹⁹ Shuc tutami cai huarmipac huahuataca ñitishpa, huañuchishca carca.

²⁰ Chaimantami paica chaupi tuta jatarishpa, canta servic ñuca sueñucucllapitac ñuca huahuataca japishpa paipac ladopi churashca carca. Shinallatac paipac huahua huañushcataca ñuca ladopimi churashca carca.

²¹ Tutamanta jatarishpa huahuata chuchuchigricpica, huañushcami cashca carca. Ña punzhayacpi ricucpica, mana ñuca huachashca huahuachu cashcarca— nirca.

²² Shina nicpimi, caishuc huarmica: —¡Mana chashnachu, ñuca huahuaca causacunmi! ¡Cambac huahuami huañushca!— nirca. Shina nicpimi, caishuc huarmica: —¡Mana chashnachu, cambac huahuamari huañushca! ¡Ñucapac huahuami causacun!— nirca.

²³ Chaimantami jatun mandacca: «Cai huarmica: “Ñuca huahuami causacun, cambac huahuami huañushca” nin. Caishuc huarmica: “Ñuca huahuami causacun, cambacca huañushcami” nin» nirca.

²⁴ Shina nishpami jatun mandacca: Shuc espadata apamuichic— nirca. Shina nicpimi, shuc espadata jatun mandacman apamurcacuna.

²⁵ Ña apamucpimi jatun mandacca: —Causacuc huahuata chaupishpa, ishcaimanta chaupita cuichic— nirca.

²⁶ Shina nicpi, causacuc huahuapac mamaca: —¡Aij ñucata mandaclla ama huañuchichu! Chaipac randica chai huarmiman cuilla— nirca. Ashtahuanpish caishuc huarmica: —Ñucapacpish, cambacpish ama cachun chaupichunlla— nirca.

²⁷ Shina nicpimi, jatun mandacca: —Huahuataca mana huañuchishpa, chai huarmiman cuichiclla. Paimi chai huahuapac mamaca— nirca.

²⁸ Chai piñanacuita jatun mandac allichishcataca tucui israelcunami yacharca. Dios cushca alli yuyaihuan imatapish allichishcata yachac chayashpami Salomontaca tucui mashna cazurcacuna.