1 REYES 22 - Dios Rimashcata Quillcashcami

Acab llaqui tucunamanta Micaías huillashcamanta

¹ Siria llactahuan, Israel llactahuanca quimsa huatatami mana macanacurca.

² Ashtahuanpish quimsa huata tucucpimi, Judá llactata jatun mandac Josafatca Israel llactata jatun mandacta ricungapac rirca.

³ Chashna ricpi, Israel llactata jatun mandacca paita serviccunataca: —¿Galaad llacta Ramot pueblo ñucanchicpac cashcataca manachu yachanguichic? ¡Siria llactata jatun mandacpac maquimanta chai pueblota quichungapacca imata mana ruhuashcanchicchu!— nirca.

⁴ Chashna nishpami Josafattaca: —¿Galaad llactapi cac Ramot pueblomanta macanacungapac ñucanchic-huan risha ninguichu?— nirca. Shina nicpimi, Josafatca Israel llactata jatun mandactaca: —Ñucapish, ñuca gentecunapish cambac maquipimi canchic. Ñuca caballocunapish cambacllatacmi— nirca.

⁵ Shinallatac Josafatca Israel llactata jatun mandactaca: —Imata manarac ruhuashpa Mandac Dios ima nishcata yachangapac paimanrac tapui— nirca.

⁶ Shina nicpimi, Israel llactata jatun mandacca Diosmanta huillac chuscu patsac runacunata tandachishpaca: —¿Galaad llacta Ramot pueblopi causaccunahuan macanacungapac rishachu, mana cashpaca saquishachu?— nirca. Shina nicpimi paicunaca: —Rilla, Mandac Diosca chai pueblopi causaccunataca jatun mandacpac maquipimi churanga— nirca.

⁷ Shina nicpimi Josafatca: —Ñucanchic tapungapacca, Mandac Dios ima nishcata huillac shuctac runaca, ¿manachu caipi tiyan?— nirca.

⁸ Shina nicpi, Israel llactata jatun mandacca Josafattaca: —Mandac Dios ima nishcata huillac shuc runaca tiyanracmi. Paica Imlapac churi Micaiasmi. Paica allitaca mana huillanchu ashtahuanpish mana allitami huillan. Chaimantami paitaca mana ricunayan— nirca. Shina nicpimi Josafatca: —Jatun mandac, ama chashna nichu— nirca.

⁹ Shina nicpimi, Israel llactata jatun mandac paita servic shuc mandacta cayashpaca: «Imlapac churi Micaiasta utca pushamugri» nirca.

¹⁰ Israel llactata jatun mandacpish, Judá llactata jatun mandac Josafatpish, mandaccuna churarinata churashcami Samaria puebloman yaicuna pambapi tiyacurca. Huillaccunaca tucuimi paicunapac ñaupapi huillacurca.

¹¹ Quenaanapac churi Sedequiasca fierromantami gachucunata ruhuachishca carca. Chashna ruhuachishpami paica: «Mandac Diosca: “¡Cai gachucunahuanmi siriocunataca sacmashpa tucuchingui!” ninmi» nirca.

¹² Tucui huillaccunami chai shinallatac huillashpaca: «Mandac Diosmi chai pueblopi causaccunataca jatun mandacpac maquipi churashpa mishachinga. Chaimanta Galaad llacta Ramot puebloman huichai rilla» nirca.

¹³ Micaiasta cayangapac ric runaca: —Riqui, tucui huillaccunami jatun mandacman alli canata shuclla shina huillacuncuna. Chaimanta canpish paicuna shinallatac alli canata huillaiyari— nirca.

¹⁴ Shina nicpipish Micaiasca: —¡Mandac Diospac shutipimi nini: Ñucaca pai ima nishcatami huillasha!— nirca.

¹⁵ Micaías jatun mandacpacman chayacpimi, jatun mandacca: —Micaías, ¿Galaad llacta Ramot pueblopi causaccunahuanca macanacungapac rishunchu, mana cashpaca saquishunchu?— nirca. Shina nicpimi paica: —Rilla, Mandac Diosmi jatun mandacpac maquipi churanga. Chaimanta canca atinguimi— nirca.

¹⁶ Shina nicpimi, jatun mandacca: —¿Mashna cutin mana llullashpa chashna canatatac Mandac Diospac shutipi huillai nicushayari?— nirca.

¹⁷ Shina nicpimi paica: —Tucui israelcunatami michicta mana charic ovejacuna shina, tucui urcucunata shic-huarishpa rishcata ricurcani. Shina cacpimi, Mandac Diosca: “Paicunaca mana mandacta charinchu. Chaimanta mana manchashpa, huasicunaman cutichiclla” ninmi— nirca.

¹⁸ Shina nicpimi, Israel llactata jatun mandacca Josafattaca: —¿Manachu paica ñucamanta allita huillanapac randica llaquita huillanga nircani?— nirca.

¹⁹ Chai quipami Micaiasca: —Mandac Dios ima nishcata uyai. “Ñucaca Mandac Diostaca pai tiyarinapi tiyacuctami ricurcani. Paipac ladopica jahua pacha angelcunami paipac alli ladomanpish, lluqui ladomanpish shayacurca.

²⁰ Chaipimi Mandac Diosca: Acab, Galaad llactapi cac Ramot pueblopi causaccunahuan macanacushpa, llaqui tucuchunca ¿Pitac umangapac risha ninguichic? nirca. Shina nicpimi, caishuc chaishuc, caita, chaita nircacuna.

²¹ Shina cacpimi, shuc espíritu Mandac Diospacman shamushpaca: ‘Ñuca umagrisha’ nirca. Shina nicpi, Mandac Diosca: ‘¿Ima shinatac umagringui?’ nirca.

²² Shina nicpi, chai espirituca: ‘Ñuca rishpaca, paipac tucui huillaccunapimi llullashpa huillana yuyaita churasha’ nirca. Shina nicpimi, Mandac Diosca: Canca umanguimi, can nishca shinata ruhuangapac rilla” nirca.

²³ Riqui, Mandac Diosmi tucui cambac huillaccunapac shimipi llullac espirituta churashca. Chashnami Mandac Diosllatac can llaqui tucuchunca mandashca— nirca.

²⁴ Shina nicpimi, Quenaanapac churi Sedequías Micaiaspacman cuchuyashpa ñahuipi huactashpaca: —Mandac Diospac espirituca ¿Maijan ñantata ñucamanta anchurishpaca canman huillangapacca rircayari?— nirca.

²⁵ Shina nicpimi Micaiasca: —Riqui, huasiman yaicushpa, shuc ucumanta shuc ucuman miticushpa puricui punzhami yachangui— nirca.

²⁶ Shina nicpi, Israel llactata jatun mandacca: —Micaiasta prezushpa, pueblota mandac Amonpacman, shinallatac ñuca churi Joaspacman apaichic.

²⁷ Paicunataca: “Jatun mandacca: ‘Cai runata carcelpi churashpa asha tandata, asha yacuta cushpa, ñuca allilla cutingacaman llaquichishpa charicuichic’ ninmi” nigrichic— nirca.

²⁸ Shina nicpimi Micaiasca: —Mana ima tucushpa cushilla cutishpaca, ñucaman Mandac Dios mana huillachishcachu canga— nirca. Shinallatac: «¡Tucui gentecuna uyaichic!» nirca.

²⁹ Shinami Israel llactata jatun mandacca Judá llactata jatun mandac Josafathuan Galaad llactapi cac Ramot puebloman rirca.

³⁰ Chaipimi Israel llactata jatun mandacca Josafattaca: «Ñucaca shuctac churanata churarishpami, macanacungapac risha. Canca cambac churanata churarishpa ri» nirca.

Acab huañushcamanta

³¹ Shina cacpimi, Siria llactata jatun mandacca macanacuna carretapi puric soldadocunata mandac quimsa chunga ishcai soldadocunataca: «Cancunaca uchillahuanpish, jatunhuanpish ama macanacunguichicchu. Ashtahuanpish Israel llactata jatun mandacllahuan macanacunguichic» nirca.

³² Carretapi cac soldadocunata mandac Josafatta ricushpaca: «¡Chaimi israelcunata jatun mandac!» nirca. Chashna nishpaca, paita macangapacmi cuchuyarca. Shina cuchuyacpimi, Josafatca caparirca.

³³ Chashna caparicpimi, carretacunapi cac soldadocunata mandacca, mana Israel llactata jatun mandac cashcamanta imatapish mana ruhuashpa rircacunalla.

³⁴ Ashtahuanpish shuc soldadomi arcohuan pucllashpalla shitashpa Israel llactata jatun mandactaca macanacungapac sinchi churanata churarishcata pasachishpa chugrichirca. Chaimantami paica carretata apactaca: «¡Carretata muyuchishpa, cai macanacuimanta llucchi. Ñucaca chugrishcami cani!» nirca.

³⁵ Chai punzhaca yallitami macanacuica sinchiyarca. Chaimantami Israel llactata jatun mandacca Siriocunapac ñaupapi paipac carretapi shayarishpa, tucui punzha cainarca. Shina cashpapish, chishipacca ña huañurcami. Paipac chugrimanta yahuar llucshishpaca carreta cajonpimi cuchayarca.

³⁶ Ña inti tigracucpimi, carpa huasicunamanta caparishpaca: «¡Tucui gentecuna cancunapac pueblocunaman, llactacunaman cutichic!

³⁷ Jatun mandacca huañurcami» nishpa uyarirca. Pai huañucpica, Samaria puebloman apashpami chaipi enterrarca.

³⁸ Chai carretataca Samaria pueblopi cac yacu junduman apashpami jahuarcacuna. Chai jundupimi cullquimanta huainayac huarmicunaca jahuari carcacuna. Mandac Dios nishca shinami paipac yahuartaca allcucuna lambirca.

³⁹ Acabpac shuctac ruhuashcacunapish marfilmanta huasita ruhuashcapish, tucui pueblocunata ruhuashcapish Israel llacta jatun mandaccuna imata ruhuashcacunata quillcashcapimi tiyacun.

⁴⁰ Acab huañushpaca paipac ñaupa taitacunahuanmi tandarigrirca. Paipac randica paipac churi Ocoziasmi mandarca.

Josafat ima shina mandashcamanta

⁴¹ Asapac churi Josafatca Israel llactata jatun mandac Acab chuscu huatata mandacucpimi, Judá llactata mandai callarirca.

⁴² Josafatca quimsa chunga pichca huatayuc cashpami mandai callarirca. Paica ishcai chunga pichca huatatami Jerusalenpi mandarca. Paipac mamaca Silhipac ushi Azubami carca.

⁴³ Paica, paipac taita Asa shinallatacmi Mandac Diosmanta mana anchurishpa, imatapish cashcata ruhuashpa, Diospac ñaupapi causarca. Shina cashpapish, lomacunapi tiyac altarcunataca mana anchuchircachu. Shina cacpimi, gentecunaca animalcunata huañuchishpa, inciensota rupachishpa catircacuna.

⁴⁴ Shinallatac Israel llactata jatun mandac-huan mana piñanacushpa causangapacmi Josafatca ari nirca.

⁴⁵ Josafatpac shuctac ruhuashcacunapish, jatun mandac tucushcapish, macanacuicunata ruhuashcapish Judá llacta jatun mandaccuna imata ruhuashcacunata quillcashcapimi tiyacun.

⁴⁶ Paimi paipac taita Asa mandacuc punzhacunapi saquirishca altarcunapi caripura huaclliric gentecunataca tucui tucuchirca.

⁴⁷ Chai punzhacunapica Edom llactata jatun mandacca mana tiyarcachu. Jatun mandacpac randi churashca mandacllami tiyarca.

⁴⁸ Josafatca Tarsis llacta jatun barcocuna shinatacmi Ufir llactamanta curita apamungapac jatun barcocunata ruhuarca. Shina cacpipish, chai barcocunaca mana rircachu. Ashtahuanpish Ezión-geber llactapimi paquirishpa tucurirca.

⁴⁹ Shina cacpimi, Acabpac churi Ucoziasca Josafattaca: «Ñucata serviccuna cambac serviccunahuan barcopi richun» nirca. Shina nicpipich, Josafatca mana uyarcachu.

⁵⁰ Josafat huañushpaca paipac ñaupa taitacunahuanmi tandarigrirca. Paitaca paipac taitacunata enterrashcallapitacmi Davidpac pueblopi enterrarca. Paipac randica paipac churi Jorammi mandarca.

Israel llactata Ocozías mandashcamanta

⁵¹ Judá llactata jatun mandac Josafat chunga canchis huatata mandacucpimi, Acabpac churi Ocoziasca Israel llactata Samaria pueblopi mandai callarirca. Paica ishcai huatatami Israel llactata mandarca.

⁵² Paica, taita mama causashca shinami Mandac Diospac ñaupapica mana allita ruhuashpa causarca. Nabatpac churi Jeroboamca mana allita ruhuashpami israelcunatapish juchallichirca.

⁵³ Paica, paipac taita mana allita ruhuashcata shinallatacmi Baal diosta servishpa, adorashpa israelcunata jatun Mandac Diostaca yallita piñachirca.