1 REYES 21 - Dios Rimashcata Quillcashcami

Acabmantapish, Nabotpac uvas chagramantapish

¹ Chai quipaca, Jezreel pueblopi causac Nabotmi Samaria llactata jatun mandac Acab mandana huasi ladopi uvas chagrata charirca.

² Chaimantami Acabca Nabottaca: —Cambac uvas chagrahuan cac allpata huertata ruhuangapac ñucaman cui. Ñuca huasi ladollapi cashcamantami cashna nini. Chai allpamantaca uvas tarpushca ashtahuan alli allpatami cusha. Mana cashpaca, cambac ashtahuan alli cana cacpica, mashna valishcata pagashallami— nirca.

³ Shina nicpimi, Nabotca Acabtaca: —¡Ñuca taitacuna saquishca allpata canman cunataca Diospish ama munachun!— nirca.

⁴ Nabot: «Ñuca taitacuna saquishca allpata mana cushachu» nishcamantami, Acabca mai llaquirishpa piñarishcata ricuchishpa paipac huasiman rirca. Huasiman chayashpaca camapi siririshpa pirca ladota chapashpami micunatapish mana munarca.

⁵ Chashna cacpimi, paipac huarmi Jezabel paipacman shamushpaca: —¿Ima nishpatac cambac shungupica yallita llaquirishca cangui? ¿Micunatapish mana micusha ningui?— nirca.

⁶ Shina nicpimi paica: —Jezreel pueblopi causac Nabothuan parlashpami ñucaca: “Uvas chagra allpata ñucaman cui. Chai allpamantaca cullquita, mana cashpaca canman ashtahuan alli cana cacpica uvas tarpushcata shuctac allpata cushallami” nircani. Shina nicpimi paica: “Uvas chagrahuan cai allpataca mana cushachu” nircami— nirca.

⁷ Shina nicpimi, paipac huarmi Jezabelca: —¿Manachu canca Israel llactata jatun mandac cangui? Jatarishpa micushpa cushicui. Jezreel pueblopi causac Nabotpac uvas chagrataca ñucami cusha— nirca.

⁸ Chashna nishpami chai huarmica Acabpac shutipi quillcashpa, paipac sortejasllahuantac sellota churashpa, Nabot causana pueblopi causac cunac yuyaccunaman, mandaccunamanpish cacharca.

⁹ Chai quillcashcacunapica: «Mana micushpa cainangapac tucuita tandachichic. Chai quipaca, gentecunapac ñaupapi Nabotta tiyachichic.

¹⁰ Chai quipaca: “Diostapish, jatun mandactapish, mana alli nishpami rimarcangui” nishpa, juchanchishpa huillachun ishcai millai runacunata, paipac ñaupapi tiyachichic. Paicuna cashna huillacpica, pueblomanta llucchishpa rumicunahuan shitashpa huañuchinguichic» nirca.

¹¹ Chaimantami Nabot causacuc pueblopi causaccunapish, cunac yuyaccunapish, mandaccunapish, Jezabel quillcashpa mandashca shinallatac ruhuarcacuna.

¹² Mana micushpa cainana punzhata ruhuashpami Nobottapish gentecunapac ñaupapi tiyachircacuna.

¹³ Chaipi tiyacucpimi, chai millai ishcai runacuna shamushpa, paipac ñaupapi tiyarircacuna. Chai millai jatun runacunami Nabottaca: «Nabotca Diostapish, jatun mandactapish mana alli nishpami rimarca» nishpa juchanchishpa huillarcacuna. Shina huillacpimi, pueblomanta llucchishpa, rumicunahuan shitashpa huañuchirca.

¹⁴ Chai quipaca: «Nabotta rumicunahuan shitashpami huañuchirca» nishpa, Jezabelman huillachun cacharcacuna.

¹⁵ Nabotta rumicunahuan shitashpa huañuchishcata Jezabel yachashpami Acabtaca: «Jezreel pueblopi cac Nabotpac uvas chagrataca jatarishpa japigri. Chai allpataca cullquipipish mana catunata munarcachu. Nabotca mana causacunchu, ñami huañushca» nirca.

¹⁶ Nabot huañushcata yachashpami Acabca Jezreel pueblopi cac Nabotpac uvas chagrata paipac cachun japingapac urai rirca.

¹⁷ Shina cacpimi, tisbitapuramanta Eliasta Mandac Dios rimashpaca:

¹⁸ «Israel llactata jatun mandac Acabhuan tupangapac urai ri. Paica Samaria pueblopimi causan. Cunanca, uvas chagrahuan cac Nabotpac allpata japingapacmi urai rishpa paica chaipi puricun.

¹⁹ Paita rimashpaca: “Mandac Diosca: ‘¿Nabotta huañuchishca jahuachu allpatapish japicungui? Maipimi Nabotpac yahuarta allcucuna lambirca, chaillapitacmi cambac yahuartapish allcucuna lambinga’ ninmi” nigri» nirca.

²⁰ Acabca Eliasta ricushpaca: —Ñucahuan mana alli cac runami caipi tupangapac shamushcangui— nirca. Shina nicpimi Eliasca: —Canllatac caturic shina, Mandac Diospac ñaupapi mana allita ruhuashcamantami canhuan tupangapac shamuni.

²¹ Mandac Diosca: “Riqui, cunanmi jatun llaquita canman apamugrini. Cambac huahua huahuacunataca pichac shinami tucui tucuchisha. Cambac huahua huahuapurataca shucllatapish mana saquishpami, Israel llactapica servishpa causaccuna cacpi, mana servishpa causaccuna cacpipish tucui tucuchisha.

²² Cambac familiataca Nabatpac churi Jeroboampac familiata shina, Ahiaspac churi Baasapac familiata shinami ruhuagrini. Ñucata mana cazushpa, llaquichishcamanta, israelcunatapish juchata ruhuachishcamantami chashnaca ruhuagrini” ninmi.

²³ Jezabeltapish Mandac Diosca: “Jezabeltaca Jezreelpac pambapimi allcucuna micunga.

²⁴ Acabpac huahua huahuacuna pueblopi huañucpica, allcucunami micunga. Pueblomanta canzha pambapi huañucpica, jahuata volac animalcunami micunga” ninmi— nirca.

²⁵ Acab shinaca Mandac Diospac ñaupapi millaita ruhuacca pipish mana tiyarcachu. Paitaca paipac huarmimi millaita ruhuachicurca.

²⁶ Paica amorreocuna shinami ruhuashcalla dioscunata catishpa, millanayaita ruhuashpa causarca. Amorreocunataca chashna millaita ruhuaccuna cacpimi, Mandac Diosca israelcunapac chaupimanta llucchishpa cacharca.

²⁷ Acab cai nishcacunata uyashpaca, paipac churanata lliquishpami sharpa churanata churarishpa, mana micushpa cainarca. Shungu llaquirishpa llaquilla cashpami, chai churanallahuantac sueñurca.

²⁸ Chashna puricucpimi, Mandac Diosca tisbitapuramanta Eliastaca:

²⁹ «¿Acab ñucapac ñaupapi mai llaquilla tucushcataca ricunguichu? Pai chashna mai llaquilla tucushcamantami pai causacui punzhapica mana llaquichishpa, ashtahuanpish paipac churi mandacui punzhacunapi paipac familiataca llaquichigrini» nirca.