1 REYES 20 - Dios Rimashcata Quillcashcami

Ben-hadad Samariata atishcamanta

¹ Siria llactata jatun mandac Ben-adadca tucui paipac soldadocunata tandachishpami, quimsa chunga ishcai jatun mandaccunata paicunapac caballocunandi, carretacunandi tandachirca. Chashna tandachishpaca, Samaria puebloman huichai rishpami, chai pueblopi causaccunahuan macanacungapac muyushpa shayarirca.

² Ben-adadca Israel llactata jatun mandac Acabpacman huillaccunata cachashpaca:

³ «Ben-adadca: “Cambac cullquipish, curipish ñucapacmi. Cambac huarmicunapish, ashtahuan alli puriccunapish” ñucapacmi nigri» nirca.

⁴ Shina nicpimi, Israel llactata jatun mandacca «Can jatun mandac ñuca amo nishca shinallatac ñucapish, ñuca ima charishcacunapish cambacmi canchic» nirca.

⁵ Chai huillaccuna Acabpacman cutimushpaca: «Ben-adadca: “Cambac cullquita, curita, cambac huarmicunatapish, ashtahuan alli churicunatapish ñucaman cuchun nishpaca, ñami cacharcani.

⁶ Caya cashna horastami, ñuca serviccunata cambacman cachasha. Paicunami cambac huasipi, canta serviccunapac huasicunapi ima tiyashcacunata ricushpa quillcangapac yaicungacuna. Paicunaca tucui valishca allicunatami japishpa apamungacuna” ninmi» nircacuna.

⁷ Shina nicpimi, Israel llactata jatun mandac chai llactata mandac yuyaccunata cayashpaca: —Riqui, cai runaca ñucata llaquichinatami mashcacun. Chaitaca cancunallatac alli ricuichic. Ñuca huarmicunata, huahuacunata, ñuca charishca cullquita, curita cuchun nishpa ñucapacman cachacpica, mana jarcarishpami, chaitaca cushallami nircani— nirca.

⁸ Shina nicpimi, pushac yuyaccunapish, tucui gentecunapish rimashpaca: —Paitaca ama cazuichu. Pai imata mañashcatapish ama cunguichu— nircacuna.

⁹ Shina nicpimi, Acabca Ben-adadpac huillaccunaman huillashpaca: «Ñuca amo jatun mandactaca: “Canta servic ñucaca can punta mandashcataca ari nircanimi. Shina cacpipish, cunan cai quipa mandashcataca mana ruhuashachu ninmi” nigrichic» nirca. Shina nicpimi, chai huillaccunaca chashnallatac huillagrircacuna.

¹⁰ Shina huillacpimi, Ben-adadca Acabman huillachun cutin cachashpaca: «Cai Samaria puebloca ñuca soldadocuna maqui junda allpata apashpa ringapacpish mana pactangachu. Mana chashna ruhuacpica, ñuca dioscuna yallita llaquichichun» nishpa cacharca.

¹¹ Shina nicpimi, Israel llactata jatun mandacca: «Manarac macanacuiman llucshishpa, ña macanacuita atishca shinaca ama jatun tucushca caichu nigrichic» nirca.

¹² Ben-adad caishuc jatun mandaccunahuan carpa huasicunapi ubiashpa tiyacpimi, huillangapac chayarcacuna. Shina huillacpimi, paita serviccunataca: «¡Macanacuiman ringapac allichirichic!» nishpa mandarca. Shina mandacpimi, paicunaca Samaria llactapi causaccunahuan macanacungapac allichirircacuna.

¹³ Shina cacpimi, Dios ima nishcata huillac shuc runa Israel llactata jatun mandac Acabpacman shamushpaca: —Mandac Diosca: “¡Cai tucui gentecunata ricunguichu! Riqui, ñucataca Mandac Dios cashcata ricsichunmi, cunanca paicunataca cambac maquipi churagrini” ninmi— nirca.

¹⁴ Shina huillacpimi Acabca: —¿Pihuantac ñuca maquipi churagringui?— nirca. Shina nicpimi, chai huillac runaca: —Mandac Diosca: “Llactacunata mandaccunapac serviccunahuanmi cambac maquipi churagrini” ninmi— nirca. Shina nicpimi Acabca: —¿Macanacuitaca maijantac callarigrin?— nirca. Shina nicpimi paica: —Canmi callarina cangui— nirca.

¹⁵ Chashna nicpimi, Acabca llactacunata mandaccunapac ishcai patsac quimsa chunga ishcai serviccunata, shinallatac tucui israelcunatami allichirichun nishpa huillarca. Paicunaca canchis huarangami carca.

¹⁶ Chaupi punzhatami paicunaca macanacuiman llucshirca. Ben-adadca paita ayudangapac shamushca quimsa chunga ishcai jatun mandaccunahuanmi carpa huasicunapi ubiashpa, machashca carca.

¹⁷ Chai macanacuimanca llactacunata mandaccunapac serviccunaracmi punta llucshirca. Ben-adad ricushpa puriccunata cachashcacunaca: «Samaria pueblomantami achca gentecuna llucshimushca» nishpami huillarca.

¹⁸ Chaita huillacpimi Ben-adadca: «Alli tucunata mashcashpa shamushca cacpipish, macanacungapac shamushca cacpipish, imata mana ruhuashpalla prezunguichic» nishpa cacharca.

¹⁹ Samaria pueblomantaca llactacunata mandaccunapac serviccunami ñaupashpa llucshirca. Paicunapac huashataca soldadocunami llucshirca.

²⁰ Paicunahuan macanacungapac shamuccunataca huañuchishpami catirca. Siriocunaca miticushpami callparca. Cutin israelcunaca catishpami llaquichirca. Siria llactata jatun mandac Ben-adadca caballopi montashpami maijan soldadocunandi callpashpa miticugrirca.

²¹ Chashna cacpipish, Israel llactata jatun mandacca catishpa rishpami, siriocunataca caballopi puric soldadocunatapish, carretapi puric soldadocunatapish chugrishpa achcata huañuchirca.

²² Chai quipami, Dios ima nishcata huillac runaca Israel llactata jatun mandacpacman shamushpaca: —Caimanta rishpaca, ashtahuan fuerzata japishpa, imata ruhuangapacpish alli yuyaringui. Siria llactata jatun mandacca caimanta huata quipaca, cutinmi canhuan macanacungapac shamunga— nirca.

²³ Siria llactata jatun mandacta serviccunaca: —Israelpac dioscunaca, urcucunapi causac dioscunamari. Chaimantami ñucanchic-huan macanacushpa atirca. Ashtahuanpish pugru pambapi macanacushpaca atinchicmi.

²⁴ Cunanca, jatun mandaccunata paicuna mandacushcamanta llucchishpa, shuctac mandaccunata churai.

²⁵ Cai macanacuipi huañushca soldadocunata, caballocunata, carretacunata cutin allichi. Chashna allichishpami pugru pambapi israelcunahuan macanacushpa, atishun— nirca. Paicuna nishca alli ricuricpimi, Ben-adadca chai shinallatac ruhuarca.

²⁶ Ña huata quipami, Ben-adadca Siria llacta soldadocuna macanacungapac ña allichirishcata ricushpa, israelcunapish macanacungapac Afec puebloman rirca.

²⁷ Shinallatac israelcunapish allichirishpami, imallata apashpa siriocunahuan macanacungapac rircacunacuna. Israelcunaca siriocunapac chimbapurapimi ishcaipi chicanyarishpa carpa huasicunata shayachishpa, tiyarircacuna. Siriocunaca jatun pamba jundami carca. Israel soldadocunaca ishcai corral chivocuna shinallami ricurircacuna.

²⁸ Chai shina cacpimi, Dios ima nishcata huillac runa Israel llactata jatun mandacpacman shamushpaca: —Mandac Diosca: “Siriocunaca, ñucataca Mandac Diosca urcucunapi causaccunapac Diosmi, pugru pambacunapi causaccunapac Diosca mana canchu nishcacunami. Ñucaca cai tucui gentecunatami, cambac maquipi churagrini. Chashna ruhuacpimi ñucataca Mandac Dios cashcata yachangui” ninmi— nirca.

²⁹ Canchis punzhacamanmi carpa huasicunapi chimbapurashpa tiyacurcacuna. Ña canchis punzhapica macanacuimi callarirca. Israelcunaca shuc punzhallapimi chaquillahuan puric Sirio soldadocunataca patsac huarangata huañuchircacuna.

³⁰ Maijan siriocunaca Afec pueblopimi miticungapac rircacuna. Shina cacpipish, pueblo pirca urmashpami, ishcai chunga canchis huaranga soldadota huañuchirca. Shinallatac Ben-adadpish chai pueblopi miticungapac rishpami, shuc ucumanta, caishuc ucuman pasashpa miticurca.

³¹ Chaimantami paita serviccunaca: «Riqui, israelcunata jatun mandacca yallita llaquic cashcatami uyanchic. Cunanca, sharpa churanata churarishpa, cungapipish huascahuan huatarishpa, Israel llactata jatun mandacpacman chayagrishun. Chaita ricushpaca, cantaca perdonangapishchari» nirca.

³² Shinami sharpa churanata churarishpa, cungapipish huascahuan huatarishpa, Israel llactata jatun mandacpacman rishpaca: —Canta servic Ben-adadca: “Ñucata ama huañuchichun nishpa mañani” ninmi— nirca. Shina nicpimi Acabca: —¿Paica causacunracchu? ¡Ñucamanca shuc huauqui shinami!— nirca.

³³ Shina nicpica, mana huañuchingapacmi chashna nicunga yuyashpami, chai runacunaca: —Cambac huauqui Ben-adadca causacunracmi— nishpa huillarcacuna. Shina huillacpi Acabca: —Pushamugrichic— nishpa cacharca. Acabpacman Ben-adad chayacpica, paipac carretapimi huichicuchirca.

³⁴ Chaipimi Ben-adadca: —Ñuca taita, cambac taitamanta quichushca pueblocunataca canmanmi cutichigrini. Samaria pueblopi ñuca taita catuna plazacunata churashca shinallatac, canpish Damasco pueblopi catunacunata churailla— nirca. Shina nicpimi Acabca: —Chaita ruhuasha nishcamantami ñucapish cantaca richun saquigrini— nirca. Chaita pactachingapac paihuan ari nishcamantaca richun saquircallami.

³⁵ Shina cacpimi, Dios ima nishcata huillaccunapuramanta shucca Diosllatac mandacpi caishuc huillactaca: —¡Ñucata huactai!— nirca. Ashtahuanpish chai huillacca mana huactanata munarcachu.

³⁶ Chaimantami chai runaca: —Mandac Dios mandashcata mana cazushcamantami ñuca ladomanta can ricpica, shuc león tupashpa cantaca huañuchinga— nirca. Pai chai ladomanta ricpica, shuc leonmi ñanpi tupashpa huañuchirca.

³⁷ Chai quipaca cutinllatacmi Dios ima nishcata huillac shuc runahuan tupashpaca: —Ñucata huactai— nirca.

³⁸ Shina nicpimi, chai runaca huactashpa chugrichirca. Chashna chugrichicpimi, Dios ima nishcata huillacca jatun mandac Acab rina ñanpi lienzohuan tapallishpa shuyangapac rirca.

³⁹ Jatun mandac ña pasacucpimi pai caparishpaca: —Canta servic ñucaca jatun macanacui chaupipimi carcani. Chaipimi shuc soldado shuc runata japishpa ñuca ladoman apamushpaca: “Cai runata ricungui. Pai miticushpa ricpica, canmi paipac randi huañungui. Mana cashpaca, shuc talento cullquitami cungui” nirca.

⁴⁰ Ashtahuanpish canta servic ñuca caita chaita ruhuacucpimi chai runaca miticushpa rishca— nirca. Shina nicpimi, Israel llactata jatun mandacca: —Can ima tucuna cashcataca canllatacmi huillashcangui— nirca.

⁴¹ Shina nicpimi, paica ñahui tapashcata utcashpa anchuchirca. Ña anchuchicpimi, Israel llactata jatun mandacca Dios ima nishcata huillaccunapuramanta cashcata ricsirca.

⁴² Shina ricsicpimi paica: —Mandac Diosca: “Ñuca huañuchingapac chicanyachishca runata cambac maquimanta cacharishpa cachashcamantaca canmi paipac randi huañungui. Cambac gentecunami paipac gentecunapac randi huañunga” ninmi— nirca.

⁴³ Shina nicpimi, Israel llactata jatun mandacca yallita llaquirishpa piñarishcata ricuchishpa, Samaria pueblopi cac paipac huasiman chayarca.