1 REYES 2 - Dios Rimashcata Quillcashcami

Salomonta David mandashcamanta

¹ Davidca pai huañuna punzhacuna ña chayamucucpimi, paipac churi Salomontaca:

² «Ñucaca cai pachamanta tucui mashna rina ñanllatatacmi catishpa rigrini. Shina cacpipish, canca sinchi tucushpa, cari cari shayaringui.

³ Canta Mandac Dios imata ruhuachun nishcatapish pactachishpa, paipac ñanpi puringui. Moisés mandashcacunapi nishca shinallatac pai quillcachishcacunata, mandashcacunata, pai huillashcacunata, ima shina causanata pai yachachishcacunata alli ricushpa cazungui. Can chashna alli pactachicpica, imata can ruhuashpapish, imata ruhuai callaricpipish, allimi llucshinga.

⁴ Mandac Dios ñucataca: “Cambac huahuacuna ñuca ñaupapi purishpa, ñuca ñanmanta mana anchurishpa tucui shunguhuan, tucui almahuan alli cazucpica, cambac huahua huahuacunamantaca israelcunata mandaccunaca jaicapi mana illangachu” nircami.

⁵ Sarviapac cari huahua Joab ñucata, Israel soldadocunata mandac Nerpac churi Abnerta, Jeterpac churi Amasata imata ruhuashcataca canllatacmi yachangui. Paica macanacuna punzhacunapi shinami, mana macanacuna punzhapi paicunata huañuchishpa, yahuarta jicharca. Chaitaca macanacuipi yahuarta jichashcamantami chashna ruhuarca. Chashna huañuchishca yahuarhuanmi paipac chumbillina chumbitapish, paipac ushutatapish mapayachirca.

⁶ Canca alli yachac shina ruhuashpa, yuyaccaman causashpa, sumacta Seolman richun, ama saquinguichu.

⁷ Ashtahuanpish, galaaditapura Barzilaipac churicunataca llaquishpa, micuna mizaman cayashpa carangui. Cambac huauqui Absalonmanta miticushpa ricucucpica, paicunaca ñucamanca allitami ruhuarcacuna.

⁸ Benjamín aillumanta Bahurim pueblopi causac Gerapac churi Simeipish cambac maquipimi. Paica Mahanaim puebloman ñuca ricucucpica, “ima llaqui japishpami alli canman” nishpa, yallita rimarirca. Shina cashpapish paillatacmi ñuca shamucpica, Jordán yacu ladopi tupangapac urai shamurca. Chaimantami paitaca: “Cantaca manatac espadahuan huañuchishachu” nishpa, Mandac Diospac ñaupapi ari nircani.

⁹ Ashtahuanpish cunanca ama saquinguichu. Canca alli yachac runami cangui. Ima shina paita llaquichinatapish, canllatac yachanguimi. Pai ña yuyacyashpa yurac accha tucucpica, huañuchishpa, yahuarta jichashpa Seolman cachangui» nirca.

David huañushcamanta

¹⁰ David huañushpa, paipac taitacunahuan tandanacucpica, paipac pueblollapitacmi enterrarca.

¹¹ Israelcunata David mandashca huatacunaca chuscu chunga huatami carca. Hebrón pueblopica canchis huatatami mandarca. Jerusalenpica quimsa chunga quimsa huatatami mandarca.

¹² Salomonmi paipac taita David mandashpa tiyarinapica tiyarirca. Pai mandanaca ashtahuanmi sinchiyashca carca.

Salomón paita piñaccunata tucuchishcamanta

¹³ Haguit huarmipac cari huahua Adoniasca Salomonpac mama Betsabepacmanmi shamurca. Betsabeca Adoniastaca: —¿Canca allipacchu shamungui?— nishpa tapurca. Shina tapucpi paica: —Ari, allipacmi shamuni— nirca.

¹⁴ Shina nishca jahuapish: —Shuc rimaita rimanata munani— nirca. Shina nicpimi Betsabeca: —Rimailla— nirca.

¹⁵ Shina nicpi, Adoniasca: —Canllatac yachanguimi. Llactata mandanaca ñucapacmi carca. Shinallatac tucui israelcunami paicunata mandac cachun, ñucata shuyarca. Shina cacpipish, llactata mandanataca Dios ñuca huauquiman cucpimi paipac saquirirca.

¹⁶ Cunanca caitami canman mañanata munani. Ama mana ninguichu nirca. Shina nicpimi Betsabeca: —Imata cashpapish nilla— nirca.

¹⁷ Shina nicpimi Adoniasca: —Sunamitapuramanta Abisag huarmihuan cazarangapac ñucaman cuchun jatun mandac Salomonhuan parlagri. Can mañacpica, ari ningallami— nirca.

¹⁸ Shina nicpimi Betsabeca: —Ari, canmantaca jatun mandac-huan parlagrishallami— nirca.

¹⁹ Chai quipami Betsabeca jatun mandac Salomonhuan, Adoniasmanta parlangapac rirca. Shina chayacpimi, jatun mandacca chasquingapac jatarishpa, paipac ñaupapi cumurirca. Chai quipaca, pai mandashpa tiyacushcapi cutin tiyarishpami, paipac mama tiyarichun shuc tiyarinata apamucpica, paipac alli ladomanmi tiyachirca.

²⁰ Chaipi tiyacushpami Betsabeca: —Shuc ashalla mañanatami, canman mañangapac shamuni, ama mana ninguichu— nirca. Shina nicpi, jatun mandacca: —Ñuca mamitalla, imata cashpapish, mañailla cushallami— nirca.

²¹ Shina nicpimi, paipac mamaca: —Sunamitapuramanta Abisag huarmitaca cambac huauqui Adoniaspac huarmi cachun cui— nirca.

²² Shina nicpi, jatun mandac Salomonca paipac mamataca: —Sunamitapuramanta Abisag huarmitaca, ¿ima nishpatac Adoniasman cuchun nishpa mañangui? Paica llactata mandanatapish mañacunmi. Paica ñucapac punta huauqui cashpami, Abiatar curatapish, Sarviapac cari huahua Joabtapish ña charin— nirca.

²³ Shina nishpami, jatun mandac Salomonca, Mandac Diospac ñaupapi ari nishpaca: «Adoniasca paillatac huañungapacmi cai shimicunata nishca. Paita mana huañuchicpica, Dios yallita llaquichichun.

²⁴ Mandac Diospac shutipimi nini: Paimi ñuca taita David mandashpa tiyarinapi pi mana cuyuchipacta ruhuashpa churarca. Pai nishca shinallatacmi ñuca huahua huahuacunapish, mandashpa causanga. Cunan Mandac Dios ricucucpimi, Adoniasca huañunga» nirca.

²⁵ Shina nishca quipami jatun mandac Salomonca Joiadapac churi Benaiastaca, Adoniasta huañuchigri nishpa cachacpimi huañuchirca.

²⁶ Chai quipami Jatun mandacca Abiatar curataca: «Canca caimanta llucshishpa, Anatot pueblopi tiyac cambac cachun cushca allpaman ri. Canpish, huañunami cangui. Shina cacpipish, cantaca cunanca mana huañuchigrinichu. Canmi Diospac Arcata, ñuca taitapac ñaupapi apashpa purircangui. Shinallatac ñuca taita llaquita apacpipish, canpish llaquita aparcanguimi» nirca.

²⁷ Shinami Salomonca Abiatar curataca Mandac Diospac cura cashcamanta llucshishpa cacharca. Elí curapac huahua huahuacuna ima tucunata Silo pueblopi Mandac Dios rimashca pactachunmi chashnaca ruhuarca.

²⁸ Chashna tucushcatami Joabman huillarca. Paica Absalonhuan mana apanacushpapish, Adonias-huanmi apanacuc carca. Chaimantami Joabca Mandac Dios-huan tupana huasiman miticungapac rishpa, altar gachucunapi japirishpa carca.

²⁹ Joabca Mandac Dios-huan tupana huasiman miticungapac rishpami, altar ladopi shayacun nishpa, Salomonman huillarca. Chashna huillacpimi Salomonca, Joiadapac churi Banaiastaca: «¡Joabta ri huañuchigri!» nishpa mandarca.

³⁰ Shina nicpimi, Benaiasca Mandac Dios-huan tupana huasiman yaicushpaca: —Jatun mandac caimanta llucshi ninmi— nirca. Shina nicpimi Joabca: —Mana llucshishachu caipimi huañusha— nirca. Shina nicpimi, Benaiasca Joab ima nishcata jatun mandacman huillangapac rirca.

³¹ Shina huillacpi jatun mandacca: —Pai nishca shinallatac ruhuailla. Huañuchishpa enterragri. Shina ruhuashpami, manapish huañuchina gentecunata Joab huañuchishpa yahuarta jichashcamantaca ñucamantapish, ñuca taitapac familiapuramantapish anchuchingui.

³² Mandac Diosca cai yahuartaca paillamantacmi cutichinga. Paica, paitapish yalli imatapish cashcata ruhuac ishcai alli runacunatami huañuchirca. Paicunataca ñuca taita Davidpish mana yachacpimi, espadahuan huañuchirca. Nerpac churi Abnerca Israel soldadocunata mandac, Jeterpac churi Amasaca Judá llacta soldadocunata mandacmi carca.

³³ Paicunapac yahuarca Joabpac jahuallapitac, shinallatac paipac huahua huahuacunapac jahuallapitac urmachun. Ashtahuanpish, Davidmanpish paipac huahua huahuacunamanpish, paipac huasi ucupuracunamanpish, pai mandangapac tiyarinapipish, Mandac Diosca huiñaita sumac causaita cuchun— nirca.

³⁴ Shina nicpimi, Joiadapac churi Benaiasca huichai rishpa, cungailla Joabtaca huañuchirca. Paitaca, shitashca pambapi cac paipac huasi ladopimi enterrarca.

³⁵ Chai quipami jatun mandac Salomonca Joabpac randi soldadocunata mandachunca Joyadapac churi Benaiasta churarca. Shinallatac Abiatar curapac randica, Sadoc curatami cura cachun churarca.

³⁶ Chai quipa jatun mandac Semeita cayachun cachashpaca: —Jerusalenpi shuc huasita ruhuashpa chaipi causai. Chaimantaca maiman ama llucshinguichu.

³⁷ Chaimanta llucshishpa Cedrón yacuta pasashpa rishpaca chai punzhallatacmi huañungui. Chashna cacpica, can huañushcaca cambac jahuallatami canga— nirca.

³⁸ Shina nicpimi, Simeica jatun mandactaca: —Allitami ningui, ñuca amo can jatun mandac nishca shinallatacmi, canta servic ñucaca ruhuasha— nirca. Simeica tauca punzhacunatami Jerusalenpi causarca.

³⁹ Ashtahuanpish quimsa huata quipami Simeipac ishcai serviccunaca pacalla llucshishpa, Gat pueblota jatun mandac Maacapac churi Aquispacpi causangapac rircacuna. Shina cacpimi Simeiman huillashpaca: «Riqui, canta serviccunaca Gat pueblopimi» nircacuna.

⁴⁰ Chaimantami Simeica paipac burrota parejashpa, paipac serviccunata mashcangapac Gat pueblopi causacuc Aquispacman rirca. Chashna rishpami Simeica, paipac serviccunataca Gat pueblomanta pushamurca.

⁴¹ Simei Jerusalenmanta Gat puebloman rishpa, cutimushcataca Salomonmanca yachac chayachircami.

⁴² Chaimantami jatun mandac, Simeita cayachun cachashpaca: «¿Manachu cantaca: “Caimanta llucshishpa maiman ricpica, chai punzhallatacmi huañungui” nircani? Caitaca Mandac Diosmantami ari nichircani. Chaitaca canllatacmi alli yachangui Ñuca shina nicpica, canpish “allitami ningui, ñucaca chaita cazushami” nircanguimi.

⁴³ Shina cashpaca, ¿ima nishpatac Mandac Diosmanta ari nishcata, can pactachichun nishpa ñuca mandashcataca mana pactachircangui?» nirca.

⁴⁴ Cutinllatac jatun mandac, Simeita rimashpaca: «Ñuca taita Davidta piñashpa, tucui mana allita ruhuashpa can llaquichishcataca, allimi yachangui. Mandac Diosca chai llaquillatatacmi canmanpish tigrachigrin.

⁴⁵ Ashtahuanpish jatun mandac Salomón ñucaca bendiciashcami casha. David mandashpa tiyacushcapish, Mandac Diospac ñaupapica huiñaita pi mana cuyuchipacmi canga» nirca.

⁴⁶ Chashna nishpami, jatun mandacca Joiadapac churi Benaiasta mandashpa cacharca. Shina mandacpimi, pai llucshishpa rishpaca, Semeita huañuchirca. Chashnami llactata mandanaca Salomonpac maquipi sinchiyarca.