1 REYES 18 - Dios Rimashcata Quillcashcami

Jatun mandac Acabpacman Elías cutimushcamanta

¹ Ña quimsa huata tucucpimi, Mandac Diosca Eliasta rimashpaca: «Acabpac ñaupapi ricurigri. Ñucaca cai pachapi tamyachigrinimi» nirca.

² Shina nicpimi, Eliasca Acabpac ñaupapi ricurigrirca. Samaria pueblopica jatun yarcaimi tiyarca.

³ Chaimantami Acabca paipac mandana huasipi ricuchun churashca Abdiasta cayarca. Abdiasca Mandac Diosta manchac runami carca.

⁴ Jezabel Mandac Dios ima nishcata huillaccunata huañuchicucpica, Abdiasmi chai huillaccunamantaca patsac runacunata apashpa pichca chungataca shuc jatun jutcupi, caishuc pichca chungataca shuctac jatun jutcupi pacarca. Shina pacashpaca, tandata, yacutapish cararcami.

⁵ Paitami mandac Acabca: —Ima animalcuna illaclla ama saquiringapac, yacu llucshina pambacunapi, huaicu yacucunapi quihuata ricumugri. Chaipi caballocunata, mulacunata michingapac— nirca.

⁶ Chashna nishpami, maijan llactacunallapi mashcagrinata yuyarinacushpa Acabca shuc lado ñanta, Abdiasca caishuc lado ñanta pailla rirca.

⁷ Ñanta ricushpami, Abdiasca Elias-huan tuparca. Shina tupashpa, Eliasta ricsishpa, allpacaman cumurishpaca: —Canca, ¿manachu ñucata mandac Elías cangui?— nirca.

⁸ Shina nicpimi Eliasca: —Ari, ñucami cani: “Eliasca caipimi” nishpa, canta mandacman huillagri— nirca.

⁹ Shina nicpimi Abdiasca: —Canta servic ñucata Acab huañuchichun, paipac maqui churachunca ¿Ñucaca ima juchatatac ruhuashcaniyari?

¹⁰ ¡Canta Mandac Diospac shutipimi nini: Tucui llactacunaman, tucui mandaccunapacmanmi ñucata mandac Acabca canta mashcachun cacharca! Paicunaca: “Eliasca mana caipichu” nircami. Shina nicpipish, tucui chai mandaccunatapish, llactacunapi causaccunatapish canta mana ricushcataca cutinpish, cutinpish allimi huillachic carca.

¹¹ ¿Chashna cacpichu cunanca: “Cambac amopacman rishpa: ‘Eliasca caipimi’ nigri” ningui?

¹² Ñuca canmanta anchurishca quipaca, Mandac Diospac Espiritumi cantaca ñuca mana yachai pudishcaman apanga. Can caipi cashcata Acabman ñuca huillacpi, canta mana tarishpaca, ñucatami huañuchinga. Canta servic ñucaca huambramanta pachami Mandac Diosta manchashpa causani.

¹³ Mandac Diosmanta huillaccunata Jezabel huañuchicucpi, ñuca imata ruhuashcataca ¿Manachu ñucata mandac canman huillarca? Mandac Diosmanta huillaccunataca pichca chungataca shuc jatun jutcupi, caishuc pichca chungataca shuctac jatun jutcupimi pacarcani. Shina pacashpaca, tandata, yacutapish cararcanimi.

¹⁴ ¿Chashna cacpichu cunanca: “Cambac amopacman rishpa: ‘Eliasca caipimi’ nigri” ningui? ¡Paica ñucata huañuchingami!— nirca.

¹⁵ Shina nicpimi Eliasca: —¡Tucuita Mandac Diospac shutipimi nini: Ñucaca paitami servini. Cunanmi Acabpac ñaupapi ricurigrini!— nirca.

¹⁶ Shina nicpimi, Abdiasca Acabman huillagrirca. Shina huillacpimi, Acabca Elias-huan tupangapac shamurca.

¹⁷ Acabca Eliasta ricushpaca: —¿Canchu israelcunata llaquichic cangui?— nirca.

¹⁸ Shina nicpimi Eliasca: —Israelcunataca mana ñucachu llaquichicuni, ashtahuanpish canmi, cambac taitapac familiacunahuan Mandac Dios mandashcacunata saquishpa, Baal dioscunata catishpa llaquichicungui.

¹⁹ Cunanca, tucui israelcunata Carmelo urcupi tandachichun maijancunata cachai. Shinallatac Baal diosmanta huillac chuscu patsac pichca chunga runacunatapish, Asera huarmi diosmanta huillac chuscu patsac runacunatapish tandachi. Paicunamanca Jezabelmi micunata carashpa charicun— nirca.

Elías Baal diosmanta huillaccunata tucuchishcamanta

²⁰ Acabca tucui israelcunatapish, Baalmanta huillaccunatapish Carmelo urcupimi tandachirca.

²¹ Chashna tandachicpimi, gentecunapac ñaupaman Elías cuchuyashpaca: —¿Ima horascamantac cancunaca cashna ishcai yuyaihuan causagringuichic? Mandac Dios, Dios cacpica, paita catichicyari. Mana cashpaca Baal dios cacpica, paita catichicyari— nirca. Shina nicpica, gentecunaca imata mana nircachu.

²² Chashna cacpimi, Eliasca cutin gentecunataca: —Mandac Dios ima nishcata huillacca ñucallami saquirishcani. Ashtahuanpish Baal diosmanta huillaccunaca chuscu patsac pichca chunga runacunami tiyan.

²³ Ishcai huagrata apamuichic. Chai huagracunamanta shuctaca cancuna acllashpa japichic. Chai japishcataca pitishpa, yanta jahuapi churaichic. Ninata ama japichinguichicchu. Caishuc huagrataca ñucami allichishpa, yanta jahuapi churasha. Ninataca mana japichishachu.

²⁴ Chai quipaca, cancunapac diosta mañanguichic. Ñucapish Mandac Diosta mañashami. Mañashcata uyashpa, ninata cachac Diosllami ¡Diosca canga!— nirca. Shina nicpimi, tucui gentecunaca: —¡Allitami ningui!— nircacuna.

²⁵ Chai quipami Eliasca Baal diosmanta huillaccunataca: «Cancuna achca cashcamantaca cancunarac shuc huagrata acllashpa allichishpa churaichic. Chai quipaca cancunapac diosta mañaichic. Ashtahuanpish yantapica ama ninata japichinguichicchu» nirca.

²⁶ Shina nicpimi, Baalmanta huillaccunaca paicunaman cushca huagrata huañuchishpa, altar jahuapi churarcacuna. Chaimantaca tutamantamanta chaupi punzhacamanmi: «¡Baal, ñucanchic mañashcata uyaiyari!» nishpa Baal diospac ñaupapi danzashpa cainarcacuna. Ashtahuanpish Baalca ima mañashcata mana uyarcachu. Paicunallatac ruhuashca altar ladopimi saltashpa muyurcacuna.

²⁷ Ña chaupi punzha tucucpimi, Eliasca paicunataca: «¡Paica shuc diosmi, sinchita caparichiclla! Paica imatami yuyaricunga, mana cashpaca imatami ruhuacunga. Mana cashpaca maimanmi rishca canga, mana cashpaca sueñucungami. Ricchachinami can» nirca.

²⁸ Paicunaca ashtahuan sinchita caparishpami, paicuna ruhuana cashca shinallatac cuchillocunahuan, lanzacunahuan chugrichishpa yahuarsapa tucurcacuna.

²⁹ Paicunaca chaupi punzha quipapish chishiyangacamanmi yuyaita chingachishca shina caparishpa catircacuna. Chaicamanca ñami animalta cushpa huañuchina horas tucurca. Chashna caparicucpipish, pi rimashcapish mana uyarircachu. Mañashcata pi cutichicpish mana tiyarcachu.

³⁰ Chaimantami Eliasca tucui gentecunataca: «¡Caiman shamuichic!» nirca. Shina nicpica, tucuimi paipacman cuchuyarcacuna. Chaipimi Eliasca Mandac Diospac altarta urmachishcata allichirca.

³¹ Eliasca Jacobopac chunga ishcai churicunata ricuchic cachunmi chunga ishcai rumicunata japishpa altarta allichirca. Mandac Diosmi Jacobotaca: «Cambac shutica Israelmi canga» nishca carca.

³² Chai rumicunahuanmi Mandac Diospac shutipi shuc altarta ruhuarca. Altar muyunditaca ishcai taza granota apaipac shina sanjatami ruhuarca.

³³ Chai quipaca, altar jahuapi yantata churashpami, huagrata pitinacushpa, yanta jahuapi churarca.

³⁴ Shina ruhuashca quipaca: «Chuscu puñupi yacuta jundachichic. Chaitaca Diosman cushpa tucui rupachina aichapipish, yantapipish tallichic» nirca. Chai quipaca: «Cutinllatac chashna ruhuaichic» nirca. Shina nicpica, cutinllatacmi chashna ruhuarcacuna. Chashna tallicpipish: «Quimsa cutinhuan tallichiclla» nirca.

³⁵ Shina nicpipish, cutinllatacmi chashnallatac ruhuarcacuna. Chashna tallicpica, altar muyundita yacu tallirishpami chai sanjapi jundarca.

³⁶ Diosman animalta cushpa rupachina horas ña chayacpimi, Dios ima nishcata huillac Elías altarman cuchuyashpaca: «¡Abrahampac, Isaacpac, Israelpac Mandac Dioslla, Israel llactapica canlla Dios cashcata cunan ricuchiyari! ¡Ñucapish canta servic cashcata can mandacpi, tucui caicunata ruhuacushcatapish ricuchiyari!

³⁷ Mandac Dioslla, ñuca mañashcata uyai. Ñuca mañashcata cutichiyari. Chashna cutichicpimi, cai Israel llactapica, can Mandac Dioslla, Dios cashcata yachangacuna. Shungumanta canman cuti richun, can cayacushcatapish yachangacuna» nishpa mañarca.

³⁸ Chashna mañacpimi, Mandac Dios jahuamanta ninata cachashpa paiman cushpa tucui rupachina aichatapish, yantatapish, rumitapish, allpatapish rupachirca. Shinallatac sanjapi jundashca yacutapish tucuimi chaquichirca.

³⁹ Chaita tucui gentecuna ricushpa, allpacaman cumurishpaca: «¡Mandac Diosca, Diostacmi! ¡Mandac Diosca Diostacmi!» nircacuna.

⁴⁰ Chaimantami Eliasca: «¡Baal diosmanta huillaccunata shucllapish ama miticuchun, tucui japichi!» nirca. Shina nicpimi, tucui japircacuna. Shina japicpica, Cisón huaicuman apashpami, chai huillaccunataca cungata pitishpa huañuchirca.

Elías tamyachun Diosta mañashcamanta

⁴¹ Chai quipami Eliasca Acabtaca: «Huichaiman rishpa micushpa, ubiashpa tiyacugri. Ñamari tamya huaj nishpa uyarimun» nirca.

⁴² Shina nicpimi, Acabca micushpa, ubiashpa tiyacungapac huichai rirca. Eliasca Carmelo urcu jahuaman rishpami cungurishpa, paipac ñahuitaca mucu chaupipi churarca.

⁴³ Chai quipami paita servictaca: —Mama cuchata ricugri— nirca. Shina nicpi, pai huichai rishpa ricushpaca: —Ima mana ricurinchu— nirca. Shina nicpimi Eliasca: —Canchis cutincaman ricugringui— nirca.

⁴⁴ Shina nicpi, ña canchis cutincaman rishpaca: —Shuc runapac maqui shungu shina, asha puyutami mama cuchamanta huichai ricucta ricuni— nirca. Shina nicpimi Eliasca: —Acabpacman rishpa: “Tamya shamushpa ama jarcachun caballocunapi carretata aisachishpa huasiman utca rilla” nigri— nirca.

⁴⁵ Chashna huillacpimi, Acabca carretapi huichicushpa, Jezreel puebloman rirca. Shina cacpica, puyu shamushpami cielota purayachirca. Chai quipaca huairami shamurca. Quipataca yallitami tamyarca.

⁴⁶ Ashtahuanpish Eliasca Mandac Diosllata pushacpimi, alli chumbillirishpa, Acabta atishpa, Jezreel puebloman callpashpa chayarca.