1 REYES 17 - Dios Rimashcata Quillcashcami

Mana tamyangachu nishpa Elías huillashcamanta

¹ Eliasca Galaad llacta tisbitapuramantami carca. Paica mandac Acabtaca: «¡Israelcunata Mandac Diospac shutipimi nini: Ñucaca paitami servini! ¡Cai huatacunaca mana tamyangachu paramollapish mana tiyangachu! ¡Ashtahuanpish ñuca mandacllapimi tamyanga!» nirca.

² Chai quipami Mandac Diosca Eliastaca:

³ «Caimanta anchurishpa, inti llucshic ladoman rishpa Jordán chimba ladopi cac Querit yacu huaicupi miticugri.

⁴ Chaipica, chai huaicumanta yacuta ubiangui. Shinallatac cuervo animalcunatami chaipi micunata canman carachun mandarcani» nirca.

⁵ Eliasca Mandac Dios mandashca shinallatacmi Jordán yacu chimba ladopi cac Querit yacu huaicupi causagrirca.

⁶ Chai cuervo animalcunaca tutamantapish, tandata, aichata chishipish tandata aichatami apamuccuna carca. Yacutapish chai jatun yacumantami ubiac carca.

⁷ Ña tauca punzhacuna quipami, chai llactapi mana tamyacpi, chai huaicu yacuca chaquirca.

Sarepta pueblopi causac viuda huarmimanta

⁸ Shina cacpimi Mandac Dios Eliasta rimashpaca:

⁹ «Jatari, Sidón llactapi cac Sarepta pueblopi causagri. Riqui, chaipi causac shuc viuda huarmitami canman micunata carachun mandarcani» nirca.

¹⁰ Shina nicpimi, paica jatarishpa, Sarepta puebloman rirca. Chai pueblo punguman chayashpaca, shuc viuda huarmi yantata murucuctami ricurca. Elías chai viuda huarmita cayashpaca: —Ñuca ubiangapac asha yacuta vasopi convidai— nirca.

¹¹ Chai huarmi ña yacuta apamungapac ricpimi, Elías cutin cayashpaca: —Ñuca micungapac asha tandata apamushpa convidai— nirca.

¹² Chashna nicpimi, chai huarmica: —¡Canta Mandac Diospac shutipimi nini: Cusashca tandataca mana charinichu! ¡Maqui junda harinallatacmi puñupi charini! Aceitetapish ashallatami pomapi charini. Cunanca, ishcailla yantatami ñuca cari huahuahuan tandata ruhuashpa micungapac murucuni. Caita micushpaca huañushunllami— nirca.

¹³ Shina nicpimi Eliasca: —Ama manchaichu. Can ima shina nishca shinallatac ruhuagrilla. Shina cacpipish can charishca harinamantaca ñucamanrac shuc uchilla tortata cusashpa apamugri. Quipaca canman, cambac huahuamanpish ruhuanguillami.

¹⁴ Israelcunata Mandac Diosca: “Cai llactapi ñuca tamyachingacamanca chai puñupi tiyac harinapish, pomapi tiyac aceitepish mana tucuringachu” ninmi— nirca.

¹⁵ Shina nicpimi, chai viuda huarmica Elías nishca shinallatac ruhuangapac rirca. Quipaca Eliaspish, chai huarmipish, paipac familiapish tauca punzhacunapacmi micunata charircacuna.

¹⁶ Eliasman Mandac Dios huillashca shinallatacmi puñupi tiyac harinapish, pomapi tiyac aceitepish mana tucurirca.

¹⁷ Ña unaita causacucpimi, chai huasiyuc huarmipac cari huahuaca ungushpa anchayarca. Chashna anchayashpami huañurca.

¹⁸ Chaimantami chai huarmica Eliastaca: —Diospac runa cantaca ¿Ima mana allitatac ruhuashcaniyari? ¿Ñuca juchacunata yuyachishpa, ñuca cari huahuata huañuchingapacchu ñucapacman shamurcangui?— nirca.

¹⁹ Shina nicpimi Eliasca: —Cambac cari huahuata caiman apamui— nirca. Shina nicpi, chai huahuata apamucpimi Eliasca huahuata japishpa, paipac ucuman apashpa cama jahuapi sirichirca.

²⁰ Chaipi sirichishpami, Eliasca Mandac Diosta sinchita caparishpa mañashpaca: «¡Ñucata Mandac Dioslla! ¿Ñucaman cai viuda micunata caracushca jahuachu huahuata huañuchishpa, paitaca llaquichingui?» nirca.

²¹ Eliasca chai huahuapac cuerpota quimsa cutincaman ucllarishpami, Mandac Diostaca: «¡Ñucata Mandac Dioslla, cai huahuapac almata paipac cuerpoman cutichi!» nishpa, sinchita mañarca.

²² Elías mañashcata Mandac Dios uyashpami, huahuapac almata cutichimushpa, chai huahuataca cutin causachirca.

²³ Eliasca paipac ucumanta huahuata marcashpa apamushpaca: —¡Riqui, cambac huahuaca causarircami!— nishpami mamaman curca.

²⁴ Chaimantami chai huarmica Eliastaca: —¡Diospac runa cactaca cunanmi yachani! ¡Mandac Diospac shimitapish mana llullashpa huillashcataca cunanmi yachani!— nirca.