1 REYES 16 - Dios Rimashcata Quillcashcami

¹ Chashna cacpimi, Mandac Diosca Baasata llaquichinata Hananipac churi Jehuman huillashpaca:

² «Cantaca ñuto allpamanta jatarichishpami, ñuca acllashca israelcunata mandachun churarcani. Ashtahuanpish canca Jeroboam shinallatac juchata ruhuashpami ñuca acllashca israelcunatapish juchata ruhuachishcangui. Can ruhuashca juchacunahuanmi ñucataca yallita llaquichingui.

³ Chaimantami Baasatapish, paipac familiatapish Nabatpac churi Jeroboampac familiatapish tucui chingachigrini.

⁴ Baasapac familiamanta maijan pueblopi huañucpica, allcucunami micunga. Tarpuna pambacunapi huañucpica, jahuata volac animalcunami micunga» nirca.

⁵ Baasapac shuctac ruhuashcacunapish, alli sinchi cashcapish, imacunallata ruhuashcacunapish Israel llactata jatun mandaccuna imata ruhuashcacunata quillcashcapimi tiyacun.

⁶ Baasa huañushpa paipac ñaupa taitacunahuan tandanacucpica, Tirsa pueblopimi enterrarca. Paipac randica paipac churi Elami mandarca.

⁷ Mandac Diosca pai ima nishcata huillac Hananipac churi Jehumanmi Baasatapish, paipac familiatapish llaquichinata huillarca. Mandac Diospac ñaupapi Baasa paipac maquihuan mana allita ruhuashpa Diosta piñachishcamantami Jeroboampac huasi ucupurata shina tucuchingapac chashna huillarca.

Israel llactata Ela mandashcamanta

⁸ Judá llactata jatun mandac Asa ishcai chunga sucta huatata mandacucpimi, Baasapac churi Elaca Israel llactata Tirsa pueblopi mandai callarirca. Paica ishcai huatatami mandarca.

⁹ Carretacunapi puric chaupi soldadocunata mandac paita servic Zimrimi huañuchingapac shuccunahuan pacalla parlanacurca. Elaca Tirsa pueblopimi paipac mayordomo Arsapac huasipi ubiashpa, machashpa tiyacurca.

¹⁰ Chashna machashca tiyacucpimi, Zimrica chaiman chayashpa, Elata macashpa huañuchishpa, paipac randi mandai callarirca. Judá llactata jatun mandac Asaca ñami ishcai chunga canchis huatata mandacurca.

¹¹ Mandangapac tiyarinapi Zimri tiyarishpaca, Baasapac tucui huasi familiatapish, ricsishcacunatapish shucllatapish mana saquishpami paipac huasi ucupuratapish, tucui huañuchirca.

¹² Zimrica chashnami Baasapac tucui huasi familiataca tucuchirca. Paica Baasata ima shina llaquichinata Dios ima nishcata huillac Jehuman Mandac Dios huillachishca shinallatacmi llaquichirca.

¹³ Baasapish, paipac churi Elapish juchacunata ruhuashpa israelcunata juchapi urmachishcamantami chashna tucuchirca. Paicunapac yanga dioscunata mañashpami, israelcunata Mandac Diosta yallita piñachirca.

¹⁴ Elapac shuctac ruhuashcacunapish, imacunallata ruhuashcacunapish Israel llactata jatun mandaccuna imata ruhuashcacunata quillcashcapimi tiyacun.

¹⁵ Judá llactata jatun mandac Asa ishcai chunga canchis huatata mandacucpimi, Zimrica mandai callarirca. Paica canchis punzhallatacmi Tirsa pueblopi mandarca. Israelcunaca filisteocunapac llacta Gibetón pueblopi causaccunahuan macanacungapacmi carpa huasicunata shayachishpa chapacurcacuna.

¹⁶ Gibetón pueblo cuchupi carpa huasicunata shayachishpa, chapac soldadocunaca: «Zimrica pacalla parlanacushpami, jatun mandactaca huañuchishca» nishcatami uyarcacuna. Chaimantami tucui israelcunaca chai macanacuna pamballapitac chai punzhallatac soldadocunata mandac Omrita paicunata jatun mandac cachun churarca.

¹⁷ Omrica tucui israelcunandi Gibetón pueblomanta huichai rishpami, Tirsa pueblota japingapac muyunacushpa shayarirca.

¹⁸ Ashtahuanpish Zimrica chai pueblota ña quichushcata ricushpami, mandana huasillapitac ashtahuan sinchita pircashca ucuman yaicushpa, ninata japichishpa chai ucullapitac huañurca.

¹⁹ Mandac Diospac ñaupapi mana allita ruhuashpa juchata ruhuashcamanta, shinallatac Jeroboam ruhuashca juchallatatac ruhuashpa, israelcunatapish juchapi urmachishpa causashcamantami chashnaca tucurca.

²⁰ Zimripac shuctac ruhuashcacunapish, jatun mandac huañuchingapac pacalla parlanacushcapish, Israel llactata jatun mandaccuna imata ruhuashcacunata quillcashcapimi tiyacun.

Israel llactata Omri mandashcamanta

²¹ Israelcunaca ishcaipimi chaupirircacuna. Shuc chaupica Ginatpac churi Tibnitami jatun mandac cachun churashun nircacuna. Caishuc chaupica Omritami churashun nircacuna.

²² Ashtahuanpish Omrihuan cac gentecunami Ginatpac churi Tibnihuan caccunata atircacuna. Shina Tibni huañucpica, Omrimi jatun mandac tucurca.

²³ Judá llactata jatun mandac Asa quimsa chunga shuc huatata mandacucpimi, Omrica Israel llactata mandai callarirca. Paica chunga ishcai huatatami mandarca. Sucta huatataca Tirsa pueblopimi mandarca.

²⁴ Omrica Semermanmi Samaria urcuta ishcai talento cullquipi randirca. Chai urcupi shuc pueblota ruhuashpami, chai urcuta catuc Semer shuti cashcamanta chai pueblotaca Samariata shutichirca.

²⁵ Omrica Mandac Diospac ñaupapica mana allita ruhuashpami causarca. Paipac punta tiyashca mandaccuna mana alli ruhuashcatapish yalli mana allitami ruhuarca.

²⁶ Paica Nabatpac churi Jeroboam mana allita ruhuashca shinallatacmi ruhuashcalla dioscunata alli nishpa, israelcunatapish chai juchallapitac urmachishpa Mandac Diostaca yallita piñachirca.

²⁷ Omripac shuctac ruhuashcacunapish, imacunallata ruhuashcacunapish, sinchi tucushcapish Israel llacta jatun mandaccuna imata ruhuashcacunata quillcashcapimi tiyacun.

²⁸ Omri huañushpa, paipac ñaupa taitacunahuan tandanacucpica, Samaria pueblopimi enterrarca. Paipac randica paipac churi Acabmi mandarca.

Acab Israel llactata mandashcamanta

²⁹ Judá llactata jatun mandac Asa quimsa chunga pusac huatata mandacucpimi, Omripac churi Acabca Israel llactata mandai callarirca.

³⁰ Omripac churi Acabca ishcai chunga ishcai huatatami Samaria pueblopi mandarca. Omripac churi Acabca Mandac Diospac ñaupapica paipac punta mandaccunata ashtahuan yallimi mana allita ruhuarca.

³¹ Paica Nabatpac churi Jeroboam shinallatac juchacunata ruhuashpapish, ima juchata mana ruhuanichu nishpami yuyarca. Paica Sidón llactata jatun mandac Etbaalpac ushi Jezabelhuanmi cazararca. Ña cazarashpaca Baal diosta alli nishpa, servishpa causangapacmi rirca.

³² Baal diosman Samaria pueblopi ruhuashca huasipimi Baal diosman shuc altarta ruhuarca.

³³ Acabca Asera huarmi diostapish ruhuarcami. Chashnami Acabca Israel llactata paipac punta mandaccunatapish yalli ashtahuan mana allita ruhuashpa, israelcunata Mandac Diostaca yallita piñachirca.

³⁴ Acab mandacuc huatacunapica Bet-el pueblopi causacuc Hielmi Jericó pueblota cutin allichirca. Chai pueblo muyundipi jatun pircata shayachingapac callari rumicunata churacucpica, paipac punta churi Abirammi huañurca. Chai pircapi punguta churacucpica, paipac quipa churi Segubmi huañurca. Chashna llaqui tucunataca Nunpac churi Josueman, Mandac Dios huillashca shinami tucurca.