1 REYES 11 - Dios Rimashcata Quillcashcami

Salomón Diosta mana cazushcamanta

¹ Jatun mandac Salomonca Faraonpac ushihuan cazarashca jahuami shuctac llactamanta achca huarmicunata charirca. Chai huarmicunaca: Moabitacuna, amonitacuna, sidoniaspuramanta shinallatac heteopuramanta huarmicunapishmi carca.

² Mandac Diosca israelcunataca: «Paicunahuanca ama cazaranguichicchu, paicunapish cancunahuanca mana cazaranachu can. Paicunahuan cazaracpica, paicunapac dioscunata catichun pandachingami» nishpami mandashca carca. Ashtahuanpish Salomonca chai huarmicunallatacmi cuyashpa, paipac huarmicuna cachun japirca.

³ Canchis patsac huarmitami charirca. Chai huarmicunaca jatun mandacpac huarmicunami carca. Caishuc huarmicunataca quimsa patsactami charirca. Chai huarmicunami Salomonpac shungutaca pandachirca.

⁴ Salomón ña yuyac cacpimi, chai huarmicunaca shuctac dioscunata catichun paipac shunguta pandachirca. Paipac taita David tucui shunguhuan paita Mandac Diosta cazushca shinaca mana cazurcachu.

⁵ Salomonca Sidón llactapi causaccunapac Astarte huarmi diosta shinallatac amonitacunapac Moloc millana yanga diostami catirca.

⁶ Shinami Salomonca Mandac Diospac ñaupapica mana allita ruhuarca. Paipac taita David Mandac Diosta catishca shinaca mana catircachu.

⁷ Chashna cashpami, Salomonca Moab llactapi causaccunapac Quemos mana ricunayachishca yanga diosman Jerusalén chimba lado lomapi shuc altarta shayachirca. Shinallatac Amón llactapi causaccunapac Moloc millana yanga diosmanpish chashnallatacmi shayachirca.

⁸ Chashnami, caru llactamanta cac tucui paipac huarmicunaman altarcunata shayachirca. Chaipimi chai huarmicunaca paicunapac dioscunaman inciensota cushnichishpa, animalcunata cushpa huañuchic carca.

⁹ Israelcunata Mandac Diosmantami Salomonpac shunguca anchurishca carca. Chaimantami Mandac Diosca paitaca piñarca. Diosca ishcai cutin paiman ricurishpami,

¹⁰ shuctac dioscunata ama catinguichu nishpami mandarca. Ashtahuanpish Salomonca Mandac Dios mandashcataca mana cazurcachu.

¹¹ Chaimantami Mandac Dios Salomontaca: «Canca cashna ruhuashpami, ñucahuan ari nishcatapish, pactachichun cushca shimicunatapish mana cazurcangui. Chaimantami can mandacushcata quichushpa, canta servicman cusha.

¹² Shina cashpapish, cambac taita Davidta cuyashcamantami can causacui punzhapica mana chaita ruhuasha. Cambac churipac maquimantami quichusha.

¹³ Chashna ruhuashpapish mandanataca mana tucui quichushachu. Ñucata servic Davidtapish, ñuca acllashca Jerusalentapish cuyashcamantami shuc aillullata cambac churi mandachun cusha» nirca.

¹⁴ Mandac Diosca Edom llactata jatun mandacpac familiapuramanta Hadadmanmi Salomonta piñashpa llaquichina yuyaita curca.

¹⁵ Edom llactapi causaccunata David mishacpimi, Israel soldadocunata mandac Joabca huañushcacunata enterrangapac huichaiman rishca carca. Chaipimi Edom llactapi causaccunataca tucui caricunata huañuchishca carca.

¹⁶ Joabca sucta quillatami tucui israelcunandi chaipi cashca carca. Edom llactapi causac tucui caricunata huañuchishpa, tucuchingacamanmi chaipi causashca carca.

¹⁷ Chaimantami Hadadca paipac taitata servic maijan edomita caricunata pushashpa Egiptoman rishca carca. Hadadca uchillaracmi carca.

¹⁸ Paicunaca Madián llactamanta llucshishpaca, Parán shitashca pambamanmi chayarca. Chai pambamantami tauca runacunata apashpa, Egiptoman rirca. Egipto llactata jatun mandac Faraonpacman chayacpimi, jatun mandacca huasicunatapish, micunatapish allpacunatapish paicunaman curca.

¹⁹ Hadadca Faraonpac ñaupapica allimi ricurirca. Chaimantami Hadadpac huarmi cachunca paipac huarmipac ñañata curca. Paica Tahpenés jatun mandac huarmipac ñañami carca.

²⁰ Tahpenés huarmipac ñaña Hadadpac huarmica Genubat cari huahuatami huacharca. Chai huahuaca Faraonpac huasillapitacmi chuchunata saquirca. Genubat huambraca Faraonpac huasipimi Faraonpac churicunahuan causarca.

²¹ Hadadca Egiptopi cashpami David huañushpa, paipac taitacunahuan tandanacugrishcata Israel soldadocunata mandac Joabpish, huañushcata yacharca. Chaimantami Hadadca Faraontaca: —Ñuca llactamanta cutingapac richun saqui— nirca.

²² Shina nicpimi Faraonca: —¿Imapactac risha ningui? ¿Cambac llactaman ringapacca caipica imatac illan?— nirca. Shina nicpimi paica: —Imapish mana illanchu. Shina cacpipish ñuca llactaman richun saqui ninimi— nirca.

²³ Diosca Eliadapac churi Rezonmanpish, Salomonta piñana yuyaitami curca. Rezonca Soba llactata jatun mandac paipac amo Hadad-ezerpacmantami miticushpa rishca carca.

²⁴ Rezonca Salomonhuan macanacungapacmi tauca runacunata tandachishpa, paicunata mandac tucurca. Soba llactapi causaccunata David huañuchishpa tucuchicpimi, Rezonca paipac runacunandi Damasco puebloman rishpa, chaipi causarca. Paitaca Damasco pueblopimi jatun mandac cachun churarca.

²⁵ Rezonca Salomonpac tucui causaipimi israelcunata piñac carca. Chashnami Rezonpish, Hadadpish israelcunataca llaquichirca. Chashna ruhuashcaca ashtahuanmi llaqui jatarirca.

²⁶ Shinallatac Sereda llactapi causacuc efrateopuramanta Natanpac churi Jeroboampish jatun mandac Salomonta llaquichi callarircami. Jeroboamca Salomonta servicmi carca. Paipac mamaca Zerúa viuda huarmimi carca.

²⁷ Jeroboamca jatun mandac Salomontaca: Milo pambata allpata montonashpa allichicushpa paipac taita Davidpac pueblo pirca jutcushca punguta jarcashcamantami llaquichic callarirca.

²⁸ Jeroboamca imatapish mana manchac sinchi runami carca. Chashna cacta ricushpami, Salomonca ñaupa taita Josepac huahua huahuacunata tucuipi ricushpa mandachun churarca.

²⁹ Chai punzhacunallapitac Jeroboam Jerusalenmanta llucshishpa, ricucpimi, Silo pueblomanta Dios ima nishcata huillac Ahiasca ñanpi tuparca. Chai runaca jahualla mushuc churanacunahuan churarishcami carca. Paicunaca ishcaindillami chai pambapi carcacuna.

³⁰ Chaipimi Ahiasca paipac jahualla churarishca mushuc churanata llucchishpa, chunga ishcaipi pitinacurca.

³¹ Chashna lliquishpami, Jeroboamtaca: «Cai chungataca can japi. Israelcunata Mandac Diosca: “Riqui, Salomón mandacushcataca paipac maquimanta quichushpami, chunga aillucunata mandachun canman cugrini.

³² Paica shuc aillullatami mandanga. Ñucata servic Davidtapish, Jerusalentapish, llaquishcamantami chaita mandachun saquisha. Chai pueblotaca tucui Israel aillupuramantami acllarcani.

³³ Ñucata saquishpami, Sidón llactapi causaccunapac Astoret huarmi diosta, Moab llactapi causaccunapac Quemos diosta, Amón llactapi causaccunapac Moloc diosta alli nishpa causancuna. Ñucapac ñaupapi allita ruhuashpa, ñuca yachachishcacunata catishpa, causanata mana munashpami chashna causancuna. Salomonca pactachichun ñuca nishca shimicunata, imata ruhuachun ñuca mandashcacunataca paipac taita David cazushca shinaca mana cazunchu.

³⁴ Shina cacpipish, pai mandanataca mana tucuichu paipac maquimantaca quichusha. Ashtahuanpish ñuca acllashca ñucata servic Davidta cuyashcamantami, Salomontaca tucui paipac causaipi mandachun saquigrini. Davidca ñuca mandashcacunata pactachichun ñuca nishca shimicunata cazushpami causarca.

³⁵ Ashtahuanpish chai mandanataca paipac churipac maquimanta quichushpami, chunga aillucunataca can mandachun cusha.

³⁶ Salomonpac churi mandachunca shuc aillullatami cusha. Ñucata servic Davidpac huahua huahuacunataca lámpara shina mana huañuc punzhanta cachunmi Jerusalenpi mandachun saquigrini. Chai pueblotaca ñuca shutipi mañachunmi acllarcani.

³⁷ Ñucallatacmi cantaca can munashca shina tucui Israel llactata mandachun churasha. Chashnami Israel llactata jatun mandac tucungui.

³⁸ Canpish ñucata servic David shinallatac ñuca tucui nishcacunata uyashpa, ñuca mandashcacunata cazushpa, ñuca ñaupapi allita ruhuashpa causacpica, ñucaca canhuanmi casha. Israel llactata mandanataca Davidpac huahua huahuacunaman cushca shinallatacmi can mandachun cusha. Cambac huahua huahuacuna huasha huasha mandanamantaca manatac anchuchishachu.

³⁹ Chashna llaquichishcamantami Davidpac huahua huahuacunataca llaquichigrini. Shina cashpapish, mana tucui causaipi llaquichishachu” ninmi» nirca.

⁴⁰ Chaita yachashpami, Salomonca Jeroboamta huañuchinata munarca. Ashtahuanpish Jeroboamca miticushpami, Egipto llactata jatun mandac Sisacpacman rirca. Jeroboamca Salomón huañungacamanmi Egiptopi causarca.

Salomón huañushcamanta

⁴¹ Salomón ashtahuan ima ruhuashcacunapish, paipac alli yuyaipish, pai imata ruhuashcata quillcashca libropimi tiyacun.

⁴² Salomonca Israel llactataca chuscu chunga huatatami Jerusalenpi mandarca.

⁴³ Salomón huañushpa, paipac ñaupa taitacunahuan tandanacugricpica, Davidpac pueblopimi enterrarca. Paipac randica paipac churi Roboammi mandarca.