1 REYES 10 - Dios Rimashcata Quillcashcami

Sabá llactata jatun mandac huarmi Salomonpacman rishcamanta

¹ Sabá llactata jatun mandac huarmica Salomontaca Mandac Diospac shutimanta tucui alli nishpa parlanacucta uyashpami, mana cutichi pudipac tapuicunata tapushpa yachangapac shamurca.

² Chai huarmica paita cuidac achca gentecunata pushamushpami, Jerusalenman shamurca. Paica mishquilla ashnacuc jambicunata, achca curita, alaja rumicunata camellocunapi apachishpami shamurca. Salomonpacman chayamushpaca, paipac shungupi tucui ima yuyashcatami parlarca.

³ Salomonca chai huarmi tapushcataca tucuimi cutichirca. Jatun mandac mana cutichinaca imapish mana tiyarcachu.

⁴ Sabá llactata jatun mandac huarmica Salomonpac tucui alli yuyaitapish, huasita shayachishcatapish ricurcami.

⁵ Shinallatac paipac micunatapish, paita serviccuna causana ucucunatapish, chai serviccunapac churanacunatapish, paiman ima shina vinota cuc cashcatapish ricurcami. Shinallatac Mandac Diospac huasipi animalcunata cushpa tucui rupachictapish ricurcami. Chaita ricushpami, yallita mancharishpa saquirirca.

⁶ Chaimantami jatun mandactaca: «Ñuca llactallapitacmi can imata ruhuashcacunatapish, can yallita yachac cashcatapish uyarcani. Chaica chashnatacmi cashca.

⁷ Ashtahuanpish ñuca caiman shamungacamanmi mana crircani. Ñuca ñahuihuantac ricushpami crini. Can chashna jatun yachac cashcatapish, yallita charic cashcatapish chaupillatacmi parlashca. Ñuca uyashcamantaca ashtahuan yallitami ricucuni.

⁸ Cambac runacunaca yallita alli nishcacunami. Cambac sumac yachaita cambac ñaupapi punzhanta uyac canta servic cai runacunaca yallita cushicushpami purincuna.

⁹ Canta Mandac Diosca alli nishca cachun. Paica canta alli nishpami, israelcunata mandashpa tiyarinapi churashca. Mandac Diosca israelcunata cuyashpami, cantaca jatun mandac cachun churarca. Tucuipac allita, imatapish cashcata ruhuashpa mandachunmi churarca» nirca.

¹⁰ Shina nishca quipami, chai huarmica patsac ishcai chunga talento curita, alaja rumicunata jatun mandacmanca curca. Sabá llactata jatun mandac huarmi, jatun mandac Salomonman, mishquilla ashnacuc jambinata achcata cungapac apamushca shinaca jaicapi pi manarac apamurcachu.

¹¹ Hirampac jatun barcocunami Ofir llactamanta curita apamushca carca. Chai barcocunallatacmi Sándalo caspicunatapish, alaja rumicunatapish apamurca.

¹² Chai sándalo caspicunahuanmi jatun mandac Salomonca Mandac Diospac huasipipish, jatun mandacpac huasipipish, balaustres nishcacunata ruhuarca. Cantaccunamanpish arpacunata, salteriocunatami ruhuachirca. Chashna achca sándalo caspicunataca jaicapi mana apamushcachu carcacuna. Cunancaman chashnaca mana ricurishcachu.

¹³ Jatun mandac Salomonca tucui imata carashca jahuapish, Sabá llactata jatun mandac huarmi tucui imata mañashcatami curca. Chai quipami chai huarmica paita servic runacunandi paipac llactaman cutirca.

Salomonca yalli charic, alli ricsishca cashcamanta

¹⁴ Salomonca huatantami impuestota japishpaca sucta patsac sucta chunga sucta talento curita japirca.

¹⁵ Randishpa catushpa causaccuna, mishquilla ashnacuc jambinacunata caru llactamanta apamushpa catuccuna Arabia llactata tucui jatun mandaccuna pai mandacuc llactapi churashca mandaccuna cushcacunacarin mana yupashcami carca.

¹⁶ Jatun mandac Salomonca ishcai patsac jatun escudotami curita huactashpa ruhuarca. Cada escudocunapimi sucta patsac siclos curita churarca.

¹⁷ Shinallatac quimsa patsac uchilla escudocunatapish curita huactashpallatacmi ruhuarca. Chaicunapipish cada escudopimi quimsa libra minas curita churarca. Chaicunataca jatun mandacca «Líbano urcumanta caspicuna» shuti huasipimi churarca.

¹⁸ Jatun mandacca mandangapac tiyarinatapish marfilhuanmi ruhuarca. Chaitaca ashtahuan alli curihuanmi jahuata cahuirca.

¹⁹ Chai tiyarinaman huichicungapacca sucta gradami tiyarca. Chai tiyarina huashaca redondomi carca. Rigra samachinatapish ishcai ladomanmi ruhuashca carca. Chai maqui samachina ishcai ladopica leoncunata ruhuashpami churashca carca.

²⁰ Chai sucta gradapipish, chunga ishcai leoncunatapish tucui gradapi ishcai ladoman shuc shuctami churashca carca. Chashna tiyarinataca maijan mandana huasipipish mana ruhuashcachu carca.

²¹ Jatun mandac Salomón ubiana tucui vasocunapish curihuan ruhuashcami carca. Shinallatac «Líbano urcumanta caspicuna» shuti huasipi tiyac tucui platocunapish ashtahuan alli curihuan ruhuashcami carca. Cullquimantaca imatapish mana ruhuarcachu.

²² Jatun mandac Salomonca Tarsis pueblomanta paipac jatun barcocunatami Hiram runapac barcocunahuan mama cuchapi charirca. Chai barcocunapica Tarsis pueblomantami curita, cullquita, marfilta, monocunata, pavo realcunata cada quimsa huatapi shuc cutin apamuc carca.

²³ Chashnami jatun mandac Salomonca shuctac llacta mandaccunata atishpa chayucpish yalli yachacpish tucurca.

²⁴ Tucui llactacunapi causaccunami Dios paiman yachaita cushcacunata huillacta uyangapac shamunata munaccuna carca.

²⁵ Tucui paiman cungapacca curimanta, cullquimanta ruhuashca alaja charinacunata, churarinacunata, macanacunata, mishquilla ashnacuc jambicunata, caballocunatami huatanta apamuccuna carca.

Salomón caballocunatapish, carretacunatapish randishcamanta

²⁶ Salomonca macanacuna carretacunata, caballopi ric soldadocunatami tandachirca. Paica huaranga chuscu patsac carretacunata, caballocunapi ric chunga ishcai huaranga soldadocunatami charirca. Paicunatami maijancunataca macanacuna carretacunata huacaichina pueblocunapi, shuccunataca pai jatun mandacta cuidachunmi Jerusalenpi churarca.

²⁷ Jatun mandac Salomonca cullquitaca rumita shinami Jerusalenpica charirca. Cedro caspicunatapish, Sefela pambacunapi tiyac sacha higo yuracunata shinami achcata charirca.

²⁸ Caballocunata, lienzo telacunataca Egiptomantami Salomonman apamuccuna carca. Jatun mandac Salomón cachashca tandanacushca runacunallatacmi caballocunapi lienzo telacunata randishpa apamuccuna carca. Paicunaca randishpa catushpa puriccunami carca.

²⁹ Egiptomantaca shuc carretallatami sucta patsac siclos cullquipi randishpa apamuccuna carca. Caballocunataca patsac pichca chunga siclos cullquipimi randiccuna carca. Salomonpac runacunallatacmi heteocunata jatun mandaccunamanpish, Siria llactata jatun mandaccunamanpish catuccuna carca.