1 JUAN 4 - Dios Rimashcata Quillcashcami

Diospac Espiritumantapish, Cristota piñac espiritumantapish

¹ Cuyashca criccuna, cai pachapica taucacunami “Diosmanta huillaccunami canchic” niccuna tiyan. Shina cashcamanta ama tucuita cringuichicchu, ashtahuanpish Diospac Espirituhuan cashcata, mana cashcata ricunaracmi canguichic.

² Diospac Espirituhuan cashcataca cai shinami yachana canguichic: Maijanpish “Jesucristoca runa tucungapac shamushcami” nicmi, Diospac Espiritutaca charin.

³ Maijanpish Jesucristota mana chashna yuyacca mana Diospac Espirituta charinchu, ashtahuanpish Jesucristota piñac espiritutami charin. Cancunaca chai espíritu shamuna cashcataca ñami uyarcanguichic. Paica ñami cai pachaman shamurca.

⁴ Cuyashca huahuacuna, cancunaca Diospacmi canguichic. Cancunapi causacuc Espirituca cai pachapaclla causac espirituta atic cashcamantami, chai llullashpa huillaccunataca mishashcanguichic.

⁵ Paicunaca cai pachapaclla cashpami cai pachallamanta rimancuna. Chaitaca cai pachapaclla causaccunaca uyancunami.

⁶ Ashtahuanpish ñucanchicca Diospacmi canchic. Diosta ricsiccunaca uyanmi. Mana Diospac caccunaca mana uyashun nincunachu. Shina cacpimi cashcata nic Diospac Espirituta charishcata, mana cashpaca llulla espirituta charishcata yachanguichic.

Dios cuyashcamanta

⁷ Cuyashca criccuna, Dios cuyaita cushcamanta caishuc chaishuc-huan cuyanacushunchic. Maijanpish cuyacca Diospac huahuami, shinallatac Diostapish ricsinmi.

⁸ Diosca cuyacmi. Maijanpish mana cuyacca, Diosta mana ricsinchu.

⁹ Ñucanchic paimanta huiñai causaita charichunmi, Diosca paipac shuclla Churita cai pachaman cachashpa, pai cuyac cashcataca ricuchirca.

¹⁰ Mana ñucanchicchu Diosta cuyashcanchic, ashtahuanpish Diosmari ñucanchicta cuyashpa, paipac Churita ñucanchic juchacunamanta huañushpa juchacunata pichachun cacharca. Chai cuyaimi tucuimanta yallica.

¹¹ Cuyashca criccuna, ima shinami Diospish ñucanchicta cuyan, chai shinallatac ñucanchicpish caishuc chaishuc-huan cuyanacushunchic.

¹² Diostaca jaicapi pipish mana ricushcachu. Shina cacpipish caishuc chaishuc-huan cuyanacushpa causacpica, Diosca ñucanchic-huanmi causan. Chashna cuyanacushpami, Dios cuyac cashcataca ashtahuan ricuchinchic.

¹³ Diosca ñucanchic-huan, shinallatac ñucanchicca Dios-huan causashcataca, paipac Espirituta cushcamantami yachanchic.

¹⁴ Ñucanchicllatacmi Dios cachashca paipac Churi cai pachapi causaccunata quishpichingapac shamushcataca ricurcanchic. Chaimantami huillanchic.

¹⁵ Maijanpish Apunchic Jesucristota “Diospac Churimi” nicca Dios-huanmi shinallatac Diospish paihuanmi can.

¹⁶ Chashnami Dios ñucanchicta cuyac cashcata yachashpa crinchic. Diosca cuyacmi. Maijanpish Diospac cuyaita charicca Dios-huanmi shinallatac Diospish paihuanmi can.

¹⁷ Apunchic Jesús cai pachapi cashca shinallatacmi, ñucanchicpish cai pachapica canchic. Chaimantami Dios cuyashca shina cuyanacushpaca, Dios taripai punzhapica mana manchashpa ricurishun.

¹⁸ Manchaica llaquichina cashcamantami shamun. Chaimanta maijanpish manchacca Diospac cuyaitaca manarac tucui charinchu. Maijanpish Diospac cuyaita charicca mana manchanchu, ashtahuanpish Diospac cuyaimi chai manchaitaca anchuchin.

¹⁹ Diosrac cuyashcamantami ñucanchicpish paitaca cuyanchic.

²⁰ Maijanpish «Diosta cuyanimi» nishpapish, shuc huauquita piñacca llullami can. Ñahuihuan ricushca huauquita mana cuyashpaca, ¿ima shinatac mana ricushca Diostaca cuyangayari?

²¹ «Diosta cuyashpaca, paipac huauquitapish cuyachun» nishpami, Apunchic Jesusca mandashca.