1 CRÓNICAS 6 - Dios Rimashcata Quillcashcami

Levipac huahua huahuacunamanta

¹ Levipac churicunaca: Gersón, Coat, shinallatac Merarimi carca.

² Coatpac churicunaca: Amram, Izhar, Hebrón, shinallatac Uzielmi carca.

³ Amrampac churicunaca: Aarón, Moisés shinallatac paicunapac pani Mariami carca. Aaronpac churicunaca: Nadab, Abiú, Eleazar, shinallatac Itamarmi carca.

⁴ Eleazarca Finees churitami charirca. Fineesca Abisúa churitami charirca.

⁵ Abisuaca Buqui churitami charirca. Buquica Uzi churitami charirca.

⁶ Uzica Zeraías churitami charirca. Zeraiasca Meraiot churitami charirca.

⁷ Meraiotca Amariasmi churitami charirca. Amariasca Ahitob churitami charirca.

⁸ Ahitobca Sadoc churitami charirca. Sadocca Ahimaas churitami charirca.

⁹ Ahimaasca Azarías churitami charirca. Azariasca Johanán churitami charirca.

¹⁰ Johananca Azarías churitami charirca. Paimi Jerusalenpi Salomón shayachishca Diospac huasipica cura carca.

¹¹ Azariasca Amarías churitami charirca. Amariasca Ahitob churitami charirca.

¹² Ahitobca Sadoc churitami charirca. Sadocca Salum churitami charirca.

¹³ Salumca Hilcías churitami charirca. Hilciasca Azarías churitami charirca.

¹⁴ Azariasca Seraías churitami charirca. Seraiasca Josadac churitami charirca.

¹⁵ Judá llactapi causaccunata, Jerusalenpi causaccunata Mandac Dios Nabucodonosorta prezu apachun saquicpimi Josadactapish prezu aparca.

¹⁶ Levipac churicunaca: Gersón, Coat, shinallatac Merarimi carca.

¹⁷ Gersonpac churicunaca: Libni, shinallatac Simeimi carca.

¹⁸ Coatpac churicunaca: Amram, Izhar, Hebrón, shinallatac Uzielmi carca.

¹⁹ Meraripac churicunaca: Mahli, shinallatac Musimi carca. Paicunami Levipac huahua huahua familiacunaca carca.

²⁰ Gersonpac huahua huahuacunaca: Libni, Sahat, Zima,

²¹ Joa, Iddo, Zera, shinallatac Jeatraimi carca.

²² Coatpac huahua huahuacunaca: Aminadab, Coré, Asir,

²³ Elcana, Ebiasaf, Asir,

²⁴ Tahat, Uriel, Uzías, shinallatac Saulmi carca.

²⁵ Elcanapac churicunaca: Amasai, shinallatac Ahimotmi carca.

²⁶ Ahimotpac huahua huahuacunaca: Elcana, Zofai, Nahat,

²⁷ Eliab, Jeroham, shinallatac Elcanami carca.

²⁸ Samuelpac churicunaca: Puntaca Vasni, quipaca Abiasmi carca.

²⁹ Meraripac huahua huahuacunaca: Mahli, Libni, Simei, Uza,

³⁰ Simea, Haguía, shinallatac Asaiasmi carca.

Diospac huasipi cantaccunata churashcamanta

³¹ Arcata Mandac Diospac huasipi Moisés churashpaca cantaccunatami cantachun churarca.

³² Paicunami Mandac Diospac huasita Jerusalenpi Salomón tucui ruhuangacaman, Dios-huan tupana huasi ñaupapi cantaccuna carca. Chai quipaca, paicuna imata ruhuana cashca shinallatacmi Diospacta ruhuarcacuna.

³³ Paicunapac churicunahuan cantashpa ayudaccunaca: Cohatpac huahua huahuapuramantaca Hemanmi carca. Hemanca Joelpac churi, Joelca Samuelpac churi,

³⁴ Samuelca Elcanapac churi, Elcanaca Jerohampac churi, Jerohamca Elielpac churi, Elielca Toapac churi,

³⁵ Toaca Zufpac churi, Zufca Elcanapac churi, Elcanaca Mahatpac churi, Mahatca Amasaipac churi,

³⁶ Amasaica Elcanapac churi, Elcanaca Joelpac churi, Joelca Azariaspac churi, Azariasca Sofoniaspac churi,

³⁷ Sofoniasca Tahatpac churi, Tahatca Asirpac churi, Asirca Ebiasafpac churi, Ebiasafca Corepac churi,

³⁸ Coreca Izharpac churi, Izharca Cohatpac churi, Cohatca Levipac churi, Levica Israelpac churimi carca.

³⁹ Hemanpac alli ladomanca paipac huauquipuramanta Asafmi carca. Asafca Berequiaspac churi, Berequiasca Simeapac churi,

⁴⁰ Simeaca Micaelpac churi, Micaelca Baasiaspac churi, Baasiasca Malquiaspac churi,

⁴¹ Malquiasca Etnipac churi, Etnica Zerapac churi, Zeraca Adaiaspac churi,

⁴² Adaiasca Etanpac churi, Etanca Zimapac churi, Zimaca Simeipac churi,

⁴³ Simeica Jahatpac churi, Jahatca Gersonpac churi, Gersonca Levipac churimi carca.

⁴⁴ Hemanpac lluqui ladomanca paipac huauquipuramanta Meraripac huahua huahuapurami carca. Paicunaca: Quisipac churi Etán, Quisica Abdipac churi, Abdica Malucpac churi,

⁴⁵ Malucca Hasabiaspac churi, Hasabiasca Amasiaspac churi, Amasiasca Hilciaspac churi,

⁴⁶ Hilciasca Amsipac churi, Amsica Banipac churi, Banica Semerpac churi,

⁴⁷ Semerca Mahlipac churi, Mahlica Musipac churi, Musica Meraripac churi, Merarica Levipac churimi carca.

⁴⁸ Levitapurallatac paipac caishuc huauquicunaca Dios-huan tupana huasipimi tucui ima ruhuana cashcata ruhuachun churashca carca.

Aaronpac huahua huahuacunamanta

⁴⁹ Mandac Diosta servic Moisés mandashca shinallatacmi Aaronca paipac churicunahuan animalta Diosman cushpa rupachirca. Inciensotapish rupachircami. Shinallatac Diospaclla chicanyachishca ucupipish, Diospacta ruhuashpami, israelcunapac juchacunamantapish Diosman curca.

⁵⁰ Aaronpac huahua huahuacunaca: Eleazar, Finees, Abisúa,

⁵¹ Buqui, Uzi, Zeraías,

⁵² Meraiot, Amarías, Ahitob,

⁵³ Sadoc, shinallatac Ahimaasmi carca.

Levitacunapac pueblocunamanta

⁵⁴ Aaronpac huahua huahuacunaman cushca allpacunapish, shinallatac linderocunapish caicunami can: Puntaca, suerteta ruhuashpami Cohatpac huasi ucu familiaman,

⁵⁵ Judá llacta Hebrón pueblota, pueblo muyundi michina pambacunandi curca.

⁵⁶ Ashtahuanpish Hebrón pueblo lado tarpuna allpataca Jefonepac churi Calebmanmi chai muyundi uchilla llactacunandi curca.

⁵⁷ Judá llactapica miticuna pueblocunatami Aaronpac huahua huahuacunaman curca. Chai pueblocunataca Hebrón, Libna, Jatir, Estemoa,

⁵⁸ Hilén, Debir,

⁵⁹ Asán, Bet-semes pueblocunatami, muyundi michina pambacunandi curca.

⁶⁰ Benjamín aillupac llactapica Geba, Alemet, Anatot, pueblocunatami muyundi michina pambacunandi curca. Cohatpac huahua huahuacunaca mashna familiacuna tiyashca shinallatacmi chunga quimsa pueblocunata chaupircacuna.

⁶¹ Cohatpac huahua huahuapuramanta saquirishca familiacunamanca suerteta ruhuashpami, Manasespac chaupi aillupac llacta chunga pueblocunata curca.

⁶² Gersonpac huahua huahuacunamanca mashna familiacuna cashca shinallatacmi Isacarpac, Aserpac, Neftalipac aillucunapac, Manasespac chaupi aillupac Basán llactapi chunga quimsa pueblocunata curca.

⁶³ Meraripac huahua huahuacunamanca mashna familiacuna cashca shinallatacmi Rubenpac, Gadpac, Zabulonpac aillucunapac llactacunapi chunga ishcai pueblocunata curca.

⁶⁴ Chashnami israelcunaca chai pueblocunataca, muyundi michina pambacunandi levitacunaman curca.

⁶⁵ Judapac, Simeonpac, Benjaminpac aillucunapac llactacunapimi suerteta ruhuashpa curcacuna.

⁶⁶ Cohatpac maijan huasi ucu familiacunamanca Efraín aillupac llacta pueblocunatami muyundi pambacunandi curca.

⁶⁷ Miticuna Siquem pueblotapish, muyundi pambacunandimi Efraín urcupi curca. Shinallatac Gezer,

⁶⁸ Jocmeam, Bet-horón,

⁶⁹ Ajalón, Gat-rimón pueblocunatapish, muyundi pambacunandimi curca.

⁷⁰ Cohatpac saquirishca huahua huahuacunamanca Manasespac chaupi aillupac llactapimi Aner, Bilam pueblocunata muyundi pambacunandi curca.

⁷¹ Gersonpac huahua huahuacunamanca Manasespac chaupi aillupac Basán llactapimi Golán, Astarot pueblocunata muyundi michina pambacunandi curca.

⁷² Isacar aillupac llactapica Cedes, Daberat,

⁷³ Ramot, Anem pueblocunatami muyundi michina pambacunandi curca.

⁷⁴ Aser aillupac llactapica Masal, Abdón,

⁷⁵ Hucoc, Rehob pueblocunatami muyundi michina pambacunandi curca.

⁷⁶ Neftalí aillupac llactapica Galilea llacta Cedes pueblota, Hamón, Quiriataim pueblocunatami muyundi michina pambacunandi curca.

⁷⁷ Meraripac maijan saquirishca huahua huahuacunamanca Zabulón aillupac llactapimi Rimón, Tabor pueblocunata muyundi michina pambacunandi curca.

⁷⁸ Rubén aillupac llactapica Jordán yacu chimba ladopi cac Jericó pueblo chimbapurapi cac shitashca pambapi tiyac Beser, Jaza,

⁷⁹ Cademot, Mefaat pueblocunata muyundi michina pambacunandi curca. Chai pueblocunaca inti llucshina ladomanmi can.

⁸⁰ Gad aillupac llactapica Galaad llactapi cac Ramot, Mahanaim,

⁸¹ Hesbón, Jazer pueblocunatami muyundi michina pambacunandi curca.