1 CRÓNICAS 5 - Dios Rimashcata Quillcashcami

Rubenpac huahua huahuacunamanta

¹ Rubenca Israelpac punta churimi carca. Shina cashpapish, paipac taitapac camallapitac mana allita ruhuashcamantami punta churi japinataca paiman mana cushpa, Josepac churicunaman curca. Chaimantami paica mana punta churi nishca carca.

² Judá paipac huauquicunata atishpa ashtahuan sinchi, shinallatac paicunata mandacmi tucurca. Shina cashpapish punta churi japinaca Josepacmi carca.

³ Israelpac punta churi Rubenpac churicunaca: Hanoc, Falú, Hezrón shinallatac Carmimi carca.

⁴ Joelpac churica Semaías, Semaiaspac churica Gog, Gogpac churica Simeimi carca.

⁵ Simeipac churica Micaía Micaiapac churica Reaía, Reaiapac churica Baalmi carca.

⁶ Baalpac churica Beerami carca. Paica Rubenpac huahua huahuacunata mandacmi carca. Paitami asiriocunata jatun mandac Tiglat-pileserca prezu aparca.

⁷ Beerapac huauquicunapac aillucunata quillcashca mandaccunaca: Puntaca Jeiel shinallatac Zacariasmi carca.

⁸ Belaca Azazpac churi, Azazca Semapac churi, Semaca Joelpac churimi carca. Belaca Aroer pueblopimi causarca. Chai llactaca Nebo pueblomanta Baal-meón pueblocamanmi carca.

⁹ Galaad llactapi achca animalcunata charishcamantami, inti llucshina ladoman rishpa Eufrates jatun yacu ladopi tiyac shitashca pambahuan tupanacuiman causarcacuna.

¹⁰ Saúl mandacuc punzhacunapimi agarenocunahuan macanacushpa paicuna atishpa Galaad llactamantaca inti llucshic ladocaman carpa huasicunapi causarcacuna.

Gad runapac huahua huahuacunamanta

¹¹ Gadpac churicunaca Rubenpac huahua huahuacuna causacuc llacta chimba ladopimi, Basán llactapi Salca pueblo ladocaman causarcacuna.

¹² Basán llactapica Joelmi punta mandac carca. Quipaca Safán, quipaca Jaanai, chai quipaca Safatmi mandac carca.

¹³ Paicunapac ñaupa taitacunapac ailluta catishpa yupashcaca canchismi carca. Paicunaca: Micael, Mesulam, Seba, Jorai, Jacán, Zía shinallatac Hebermi carca.

¹⁴ Tucui caicunami Abihailpac huahua huahuacuna carca. Abihailca Huripac churi, Hurica Jaroapac churi, Jaroaca Galaadpac churi, Galaadca Micaelpac churi, Micaelca Jesisaipac churi, Jesisaica Jahdopac churi, Jahdoca Buzpac churimi carca.

¹⁵ Shinallatac Gunipac nieto Abdielpac churi Ahimi paicunapac ñaupa aillucunata mandac carca.

¹⁶ Paicunaca Galaad, shinallatac Basán llactacunapi, chai muyundi uchilla llactacunapi, shinallatac Sarón michina pambacunapipish pambacuna tucuricamanmi causarcacuna.

¹⁷ Judá llactata jatun mandac Jotam, Israel llactata jatun mandac Jeroboam mandacui punzhacunami paicunapac ñaupa taitacunata catishpa yupashca carca.

Ishcai aillu chaupi ima tucushcamanta

¹⁸ Rubenpac, Gadpac, Manasespac chaupi aillucunaca yalli sinchimi carca. Escudota, espadata apaccuna, arcota cacharina, macanacunata alli yachaccunaca chuscu chunga chuscu huaranga canchis patsac sucta chunga runacunami carca. Paicunami macanacungapac llucshic carca.

¹⁹ Paicunami agarenocunahuanpish, Jetur, Nafis, Nodab runacunahuanpish macanacurca.

²⁰ Chai macanacuipimi Diospi shunguta churashpa Diosta mañarcacuna. Chaimantami Diosca paicunapac maquipi agarenocunatapish, paicunata ayudaccunatapish churarca.

²¹ Paicunapac animalcunamantaca pichca chunga huaranga camellota, ishcai patsac pichca chunga huaranga ovejata, ishcai huaranga burrotami aparcacuna. Shinallatac patsac huaranga gentecunatami prezu aparcacuna.

²² Chai macanacuipica Mandac Dios ayudacpimi, achcata huañuchirca. Shuctac llactaman prezu apangacaman chaillapitac causarcacuna.

Manasespac huahua huahuacunamanta

²³ Manasespac chaupi ailluca yalli achca cashpami, Basán urcumanta Baal-hermón pueblo ladocaman, Senir pueblota muyushpa, Hermón urcucaman causarcacuna.

²⁴ Paicunapac ñaupa taitacunapac huasi ucupuracunata mandaccunaca: Efer, Isi, Eliel, Azriel, Jeremías, Hodavías, shinallatac Jahdielmi carca. Paicunaca alli nishca, imatapish mana manchac, sinchi, paicunaca ñaupa taitacunapac huasi ucupuracunata mandacmi carca.

²⁵ Shina cashpapish paicunaca ñaupa taitacunapac Mandac Diosta mana cazushpa, israelcunapac ñaupamanta Mandac Dios llucchishpa cachashca gentecunapac dioscunata catishpami, huainayashpa causarcacuna.

²⁶ Chaimantami israelcunapac Mandac Diosca asiriocunata jatun mandac Pul nishca Tiglat-pileserta Rubenpac aillucunatapish, Manasespac chaupi aillucunatapish, Halah, Habor, Hara pueblocunaman shinallatac Gozán yacu ladoman apachun saquirca. Chaipimi cunan punzhacaman causancuna.