1 CRÓNICAS 4 - Dios Rimashcata Quillcashcami

Judapac huahua huahuacunamanta

¹ Judapac churicunaca: Fares, Hezrón, Carmi, Hur, shinallatac Sobalmi carca.

² Sobalpac churi Reaiaca Jahat churitami charirca. Jahatca Ahumai, Lahad churicunatami charirca. Caicunami zoratita aillucunaca carca.

³ Etampac taitapac churicunaca Jezreel, Isma, Idbasmi carca. Paicunapac panica Haze-lelponimi carca.

⁴ Penuelca Gedorpac taitami carca. Ezerca Husapac taitami carca. Paicunami Efratapac punta huahua Hurpac churicunaca carca. Hurca Belenpac taitami carca.

⁵ Tecoapac taita Asurca ishcai huarmitami charirca. Paicunaca Hela, Naarami carca.

⁶ Naara huarmipac huahuacunaca: Ahuzam, Hefer, Temeni, Ahastarimi carca.

⁷ Hela huarmipac huahuacunaca: Zeret, Jezoar, Etnanmi carca.

⁸ Cosca: Anub, Zobeba churicunatami charirca. Harumpac churi Aharhelpac familiacunapish paipac huahua huahuacunallatacmi carca.

⁹ Jabesca paipac huauquicunata atishpami alli nishca carca. Chaimantami paipac mamaca: «Yalli nanaihuanmi sajuarircani» nishpa Jabesta shutichirca.

¹⁰ Jabesca israelcunapac Mandac Diosta mañashpaca: «¡Ñuca ima llaquita mana apangapac ñucata bendiciashpa, ñuca llactatapish achcata ruhuaiyari! ¡Cambac maquihuan ima llaquimantapish huacaichiyari!» nishpa mañacpimi, Mandac Diosca pai mañashcata uyarca.

¹¹ Suapac huauqui Quelubca Mehir churitami charirca. Mehirca Estonpac taitami carca.

¹² Estonca Bet-rafa, Paseah, Tehina churicunatami charirca. Tehinaca Nahas pueblopi causaccunapac taitami carca. Caicunami Reca pueblomanta cancuna.

¹³ Cenazpac churicunaca: Otoniel, Seraiasmi carca. Otonielpac churicunaca: Hatat,

¹⁴ Meonotaimi carca. Meonotaica Ofra churitami charirca. Seraiasca Joab churitami charirca. Paimi Carisim pambapi causaccunapac punta taita carca. Chaipi causaccunaca artesanocunami carca.

¹⁵ Jefonepac churi Calebpac churicunaca: Iru, Ela, Naammi carca. Elapac churica Cenazmi carca.

¹⁶ Jehalelelpac churicunaca: Zif, Zifa, Tirías, Asarelmi carca.

¹⁷ Esdraspac churicunaca: Jeter, Mered, Efer, Jalonmi carca. Shinallatac Mariapish, Samaipish, Isbapish paipac huahuacunami carca. Isbaca Estemoapac taitami carca.

¹⁸ Caicunami Faraonpac ushi Bitiapac huahuacunaca carca. Meredpac shuctac huarmica Judá aillumantami carca. Chai huarmipimi Jeredta, Heberta Jecutiel churicunata charirca. Jeredca Gedorpac taitami carca. Heberca Socopac taitami carca. Jecutielca Zanoapac taitami carca.

¹⁹ Nahampac ñaña, Hodiaspac huarmipac huahuacunaca garmitacunapac taita Keila, maacateocunapac taita Estemoami carca.

²⁰ Simonpac churicunaca: Amnón, Rina, Ben-hanán, Tilonmi carca. Isipac churicunaca: Zohet, shinallatac Benzohetmi carca.

²¹ Judapac churi Selapac churicunaca: Er, shinallatac Laadami carca. Erca Lecapac taitami carca. Laadaca Maresapac taitami carca. Bet-asbea pueblopi linota ahuashpa causaccunapac familiacunapish Selapac churicunami carca.

²² Shinallatac Joacim, Cozeba pueblopi causaccunapish, Joaspish, Sarafpish Selapac churicunami carca. Paicunami Moab llactata mishashpa Belén puebloman cutirca. Caicunaca unai huatata quillcashca libropimi huillacun.

²³ Chai runacunaca allpamanta imatapish ruhuashpami, chagra chaupipi, muyundi pircashca chaupipi jatun mandacta servishpa causarca.

Simeonpac huahua huahuacunamanta

²⁴ Simeonpac churicunaca: Nemuel, Jamín, Jarib, Zera shinallatac Saulmi carca.

²⁵ Saulpac churica Salum, Salumpac churica Mibsam, Mibsampac churica Mismami carca.

²⁶ Mismapac churica Hamuel, Amuelpac churica Zacur, Zacurpac churica Simeimi carca.

²⁷ Simeica chunga sucta churita, sucta ushitami charirca. Ashtahuanpish paipac huauquicunaca mana achca huahuacunata charircachu. Chaimantami paipac huahua huahuacunaca Judapac huahua huahuacuna shina mana achca carca.

²⁸ Paicunaca Beerseba, Molada, Hazar-sual,

²⁹ Bilha, Ezem, Tolad,

³⁰ Betuel, Horma, Siclag,

³¹ Bet-marcabot, Hazar-susim, Bet-birai, Saaraim pueblocunapimi causarcacuna. David mandai callaringacamanmi chai pueblocunapi causarca.

³² Shinallatac pueblo muyundipi tiyac Etam, Aín, Rimón, Toquén, Asán chai pichca uchilla pueblocunapimi causarca.

³³ Tucui pueblo muyundi uchilla llactacunaca Baal pueblocamanmi paicunapac carca. Chai pueblocunami paicuna causanaca carca. Cutin chaipi causac aillucunaca:

³⁴ Mesobab, Jamlec, Amasiaspac churi Josías,

³⁵ Joel, Josibiaspac churi Jehú, Seraiaspac churi Asiel,

³⁶ Elioenai, Jaacoba, Jesohaía, Asaías, Adiel, Jesimiel, Benaías,

³⁷ Sifapac churi Zizapishmi carca. Zifica Alonpac churimi carca. Alonca Jedaiaspac churimi carca. Jedaiasca Simripac churimi carca. Simrica Semaiaspac churimi carca.

³⁸ Cai shuticunami paicunapac huasi familiata, aillucunata mandaccuna carca. Paicunaca achca miranacushpami achca tucurca.

³⁹ Chaimantami paicunaca animalcunata michinata mashcashpa, inti tigrana ladota rishpa, Gedor pueblo ladoman chayarcacuna.

⁴⁰ Chaipimi sumac achca michina pambata tarirca. Chai llactaca cushilla causana llactami carca. Chaipica Cam runapac huahua huahuacunami utcapica causarca.

⁴¹ Cai tucui shuticunata quillcashcacunaca Judá llactata jatun mandac Ezequías mandacuc punzhacunapimi shamushpa, Cam runapac huahua huahuacunapac carpa huasicunatapish, chucllacunatapish tucui tucuchirca. Cunan punzhacamanmi chashna can. Michina pambacuna tiyashcamantami chai runacuna causanapi causarca.

⁴² Simeonpac churicunapuramanta pichca patsac runacunami Seir urcuman rirca. Paicunataca Isipac churicuna Pelatías, Nearías, Refaías, Uzielmi pusharca.

⁴³ Chashna rishpami amalecitacunatapish huañuchishpa, cunan punzhacaman chaipi causancuna.