1 CRÓNICAS 28 - Dios Rimashcata Quillcashcami

Diosta yuyarina huasita Salomón ruhuai callarishcamanta

¹ Davidca tucui israelcunata mandaccunata, aillucunata mandaccunata, jatun mandacta servingapac quillanta shamuc soldadocunata mandaccunata, huaranga soldadocunata, patsac soldadocunata mandaccunata, jatun mandacpac tucui ima charishcacunata, paipac churicunapac ima charishcacunata mandaccunata, paipac soldadopurapi ashtahuan alli nishca sinchi soldadocunatami Jerusalenpi tandachirca.

² Chashna tandachishpami Davidca: «Ñuca huauquicunalla, ñuca pueblopi causaccunalla, caita uyaichic. Mandac Dios ari nishca quillcata huacaichina Arcata huacaichingapac, shinallatac Paipac chaquita chaipi churachunmi ñuca shungupi shuc huasita ruhuanata munarcani. Chaimantami chai huasita ruhuangapac ña tucui allichircani.

³ Chashna cacpipish, Mandac Diosca: “Ñuca huasitaca mana canchu shayachingui. Canca macanacuc, achca yahuarta jichacmi cangui” nirca.

⁴ Shina cacpipish israelcunata Mandac Diosca ñuca taitapac huasi ucupuramanta acllashpami, ñucataca huiñaita tucui causaipi Israel llactata jatun mandac cachun churarca. Shina cashcamantami Judapac aillupuramanta juez cachun acllarca. Chai aillupuramanta ñuca taitapac familiataca acllarca. Ñuca huauquicunapuramantaca ñucatami acllashpa, tucui israelcunata jatun mandac cachun churarca.

⁵ Mandac Diosca achca churicunatami ñucamanca cushca. Tucui cai ñuca churicunamantami ñuca churi Salomonta Mandac Diosca mandashpa tiyarinapi tiyarishpa, israelcunata mandachun churarca.

⁶ Paimi ñucataca: “Cambac churi Salomonmi ñuca huasitapish, ñuca huasi pungucunatapish ruhuanga. Paitami ñuca churi shina cachun acllashcani. Ñucaca paipac taitami casha.

⁷ Cunan punzhacaman cazushca shinallatac ñuca mandashcacunata, imata ruhuachun ñuca huillashcacunata cazucpica, huiñaicamanmi pai mandanataca mana anchuchisha” nirca.

⁸ Cunanca, Mandac Diospaclla tandanacushca tucui israelcunapac ñaupapi, ñucanchic Mandac Diospish uyacucpimi, Mandac Dios imata ruhuachun nishcata pactachinguichic. Chaita ruhuashpami pai cancunaman cushca sumac llactataca japinguichic, shinallatac cancunapac huahuacunamanpish tucui causaipac saquinguichic.

⁹ Salomón ñuca huahualla, cambac taitapac Diostaca ricsiyari. Paitaca alli shunguhuan, tucui munaihuan servishpa causaiyari. Mandac Diosca tucuipac shungutami ricucun. Imata ruhuanata yuyaricushcatapish tucuitami yachan. Can paita mashcashpaca taringuimi, ashtahuanpish paita can cungaricpica, paipish cantaca huiñaita cungaringa.

¹⁰ Riqui, cunanca Mandac Diosca cantaca shuc huasita shayachishpa, paipaclla chicanyachichunmi acllarca. ¡Ama manchashpa, chaitaca ruhuailla!» nirca.

¹¹ Chashna nishpami, Davidca Diospac huasi corredortapish, Diospaclla huasi ucutapish, juchamanta cushca yahuarta jichana Diospac Arca tiyacuc ucutapish ima shina ruhuanata ricuchishpa, paipac churi Salomonman curca.

¹² Shinallatac Mandac Diospac huasi pungucunata, chai muyundi ucucunata, Diospac huasipi imalla tiyashcata allichina ucuta, Diospaclla chicanyachishcata allichingapac ima shina shayachinata yuyarishcatami ricuchishpa saquirca.

¹³ Shinallatac Mandac Diospac huasipi servic tandanacushca curacunaman, levitacunaman, Mandac Diosta servina imalla charinacunata huacaichina ucucunata ruhuaccunamanpishmi ricuchishpa saquirca.

¹⁴ Shinallatac chai ucupi Diosta servingapac charinacunata curimanta, cullquimanta ruhuachun curitapish, cullquitapish pactaipactami pezashpa curca.

¹⁵ Shinallatac curimanta candelerocunata, candeleropi churana lamparacunata curimanta ruhuachunmi cada candeleropac pactaipacta pezashpa curca. Cullquimanta candelerocunata, chai candelerocunata churana lamparata ruhuachunmi cullquita cada candeleropac pactaipacta pezashpa curca.

¹⁶ Shinallatac Diospaclla chicanyachishca tandata churana mizata ruhuachunpish curita cada mizapac pactaipactami pezashpa curca.

¹⁷ Jatun trinchicunata, lavacaracunata, jarrocunatapish ruhuachunmi alli curita curca. Copacunata ruhuachunpish cada copapi pactaipacta pezashpami curca. Shinallatac cada copapi mashna pactaipacta pezashpami cullquitapish curca.

¹⁸ Shinallatac inciensota rupachina altarta, curi querubincunapac carretata ruhuachunpish ashtahuan alli curitami pezashpa curca. Chai querubincunami Dios-huan ari nishca quillcata huacaichinata Arcata alas-huan tapashpa tiyacurca.

¹⁹ Davidca: «Tucui caicunatami Mandac Diosca paipac maquihuan ima shina ruhuana cashcata ricuchishpa quillcachirca» nirca.

²⁰ Shinallatac paipac churi Salomontaca: «Sinchi, sinchi tucushpa, cushicushpa ruhuai callarilla. Ñucata Mandac Diosca canhuanmi. Chaimanta ama manchaichu, ama shaicuichu. Mandac Diosca paipac huasita tucuita alli ruhuashpa, tucuchingacaman cantaca manatac saquingachu, mana cungaringachu.

²¹ Riqui, tandanacushca curacunapish, levitacunapish Diospac huasita ruhuanata ayudaccunaca canhuanmi canga. Shinallatac quiquin munaihuan ayudaccunapish, tucui imata ruhuanata yachaccunapish canhuanmi. Tucui mandaccunapish, tucui israelcunapish cambac maquipimi» nirca.