1 CRÓNICAS 27 - Dios Rimashcata Quillcashcami

David soldadocunata mandaccunata churashcamanta

¹ Israel huasi ucupurata mandaccuna, huaranga soldadocunata mandaccuna, patsac soldadocunata mandaccunata mandaccunami tiyarca. Chai mandaccunami huatapi cada quilla mashna yaicuc, mashna llucshic soldadocunata ricushpa, jatun mandacta serviccuna carca. Chai cada tandanacushca soldadocunaca ishcai chunga chuscu huarangami carca.

² Punta quillapi yaicuc, punta tandanacushca ishcai chunga chuscu huaranga soldadocunataca Zabdielpac churi Jasobeammi mandacurca.

³ Paica Farespac huahua huahuapuramantami carca. Paimi punta quillapi yaicuc tandanacushca soldadocunaca mandaccunata mandac carca.

⁴ Ishcainiqui quillapi yaicuc, ishcainiqui tandanacushca ishcai chunga chuscu huaranga soldadocunataca Ahohi pueblomanta Dodaimi mandacurca. Chai soldadocunapac quipa mandacca Miclotmi carca.

⁵ Quimsaniqui quillapi yaicuc, quimsaniqui tandanacushca ishcai chunga chuscu huaranga soldadocunataca curacunata mandac Joiadapac churi Benaiasmi mandacurca.

⁶ Chai Benaiasmi quimsa chunga soldadopuramanta yallita sinchi shinallatac paicunata mandacpish carca. Chai tandanacushcapica paipac churi Amisabadmi carca.

⁷ Chuscuniqui quillapi yaicuc, chuscuniqui tandanacushca ishcai chunga chuscu huaranga soldadocunataca Joabpac huauqui Asaelmi mandacurca. Paipac quipataca paipac churi Zebadiasmi mandarca.

⁸ Pichcaniqui quillapi yaicuc, pichcaniqui tandanacushca ishcai chunga chuscu huaranga soldadocunataca izraitapuramanta Samhutmi mandacurca.

⁹ Suctaniqui quillapi yaicuc, suctaniqui tandanacushca ishcai chunga chuscu huaranga soldadocunataca Tecoa pueblomanta Iquespac churi Irami mandacurca.

¹⁰ Canchisniqui quillapi yaicuc, canchisniqui tandanacushca ishcai chunga chuscu huaranga soldadocunataca pelonitapuramanta Efrainpac churi Helesmi mandacurca.

¹¹ Pusacniqui quillapi yaicuc, pusacniqui tandanacushca ishcai chunga chuscu huaranga soldadocunataca, Husa pueblomanta Zerapac huahua huahuapuramanta Sibecaimi mandacurca.

¹² Iscunniqui quillapi yaicuc, iscunniqui tandanacushca ishcai chunga chuscu huaranga soldadocunataca, Anatot pueblomanta Benjaminpac huahua huahuapuramanta Abiezermi mandacurca.

¹³ Chunganiqui quillapi yaicuc, chunganiqui tandanacushca ishcai chunga chuscu huaranga soldadocunataca zeraitapuramanta Maharaimi mandacurca. Paica netofatitapuramantami carca.

¹⁴ Chunga shucniqui quillapi yaicuc, chunga shucniqui tandanacushca ishcai chunga chuscu huaranga soldadocunataca Efrainpac huahua huahuapuramanta Benaiasmi mandacurca. Paica Piratón pueblomantami carca.

¹⁵ Chunga ishcainiqui quillapi yaicuc, chunga ishcainiqui tandanacushca ishcai chunga chuscu huaranga soldadocunataca, Netofa pueblomanta Otonielpac huahua huahuapuramanta Heldaimi mandacurca.

Israel aillucunata mandaccunamanta

¹⁶ Israel aillucunata mandaccunaca caicunami: Rubenpac aillutaca Zicripac churi Eliezermi mandacurca. Simeonpac aillutaca Maacapac churi Sefatiasmi mandacurca.

¹⁷ Levitacunataca Kemuelpac churi Hasabiasmi mandacurca. Aaronitacunataca Sadocmi mandacurca.

¹⁸ Judapac aillucunataca Davidpac huauqui Eliumi mandacurca. Isacarpac aillutaca Micaelpac churi Omrimi mandacurca.

¹⁹ Zabulonpac aillucunataca Abdiaspac churi Ismaiasmi mandacurca. Neftalipac aillucunataca Azrielpac churi Jerimotmi mandacurca.

²⁰ Efrainpac aillucunataca Azaziaspac churi Oseasmi mandacurca. Manasespac chaupi aillucunataca Pedaiaspac churi Joelmi mandacurca.

²¹ Manasespac caishuc chaupi aillucunaca Galaad llactapimi causacurca. Paicunataca Zacariaspac churi Iddomi mandacurca. Benjaminpac aillucunataca Abnerpac churi Jaasielmi mandacurca.

²² Danpac aillucunataca Jerohampac churi Azareelmi mandacurca. Paicunami Israel aillucunata mandaccuna carca.

²³ Mandac Diosca israelcunataca jahua pachapi tiyac lucerocunata shinami mirachisha nishcami carca. Chaimantami Davidca ishcai chunga huatata manarac chariccunata ama yupachun mandarca.

²⁴ Sarviapac cari huahua Joabmi israelcunata yupai callarirca. Chashna yupai callarishcamanta israelcunata jatun llaqui japicpimi, yupanataca mana tucuchirca. Chai yupanaca jatun mandac David imata ruhuashcata quillcashcapica mana tiyanchu.

²⁵ Adielpac churi Azmavetca jatun mandacpac yallita valishcacunata huacaichicmi carca. Shinallatac Uziaspac churi Jonatanca chagra ruhuana allpacunapi, pueblocunapi, pueblo muyundipi tiyac uchilla llactacunapi, torrecunapi granota huacaichiccunata mandacmi carca.

²⁶ Tarpushpa causaccunataca Quelubpac churi Ezrimi mandacurca.

²⁷ Uvas chagrata cuidaccunataca Ramá pueblomanta Simeimi mandacurca. Vinota tandachishpa huacaichiccunataca Sifmit pueblomanta Zabdiasmi mandacurca.

²⁸ Sefela pambapi tiyac olivos chagracunata, higo chagracunata cuidaccunataca Gedera pueblomanta Baal-hananmi mandacurca. Olivos aceiteta huacaichina ucucunata cuidaccunataca Joasmi mandacurca.

²⁹ Sarón llactapi huagrata michiccunataca Sarón pueblomanta Sitraimi mandacurca. Pugru pambapi huagrata michiccunataca Adlaipac churi Safatmi mandacurca.

³⁰ Camellocunata cuidaccunataca ismaelitapuramanta Obilmi mandacurca. Burrocunata michiccunataca Meronot pueblomanta Jehediasmi mandacurca.

³¹ Ovejacunata michiccunataca hagarenopuramanta Jazizmi mandacurca. Tucui paicunami jatun mandac Davidpac tucui charishcacunata cuidaccunata mandaccuna carca.

Davidpac shuctac mandaccunamanta

³² Davidpac tio Jonatanca alli yuyaita cuc, quillcac yuyaisapa runami carca. Hacmonipac churi Jehielca jatun mandacpac churicunata cuidacmi carca.

³³ Ahitofelpish jatun mandacman alli yuyaita cucmi carca. Arquitapuramanta Husaica jatun mandacpac alli ricsishcami carca.

³⁴ Ahitofelpac quipaca Benaiaspac churi Joiada, shinallatac Abiatarmi jatun mandac Davidman alli yuyaita cuc carca. Joabca jatun mandacpac soldadocunatami mandacurca.