1 CRÓNICAS 25 - Dios Rimashcata Quillcashcami

Diospac huasipi tocashpa cantaccunamanta

¹ Shinallatac Davidpish, soldadocunata mandaccunapish, Asafpac, Hemanpac, Jedutunpac huahua huahuacunataca Diosta servichunmi chicanyachirca. Paicunataca arpapi, salteriopi, platillopi tocashpa, Dios ima nishcata huillachunmi churarca. Diosta servingapac quillcarishca allita entendic runacunaca:

² Asafpac churicunamantaca: Zacur, José, Netanías, Asarelami carca. Paicunataca Asafmi mandacurca. Paimi jatun mandac mandacpi, Dios ima nishcata huillac carca.

³ Jedutunpac sucta churicunaca: Gedalías, Zeri, Jesaías, Simei, Hasabías, shinallatac Matatiasmi carca. Paicunataca, paicunapac taita Jedutunmi arpapi tocashpa, Mandac Diosta allimari cangui nishpa, Dios ima nishcata huillashpa pushacurca.

⁴ Hemanpac churicunaca: Buquías, Matanías, Uziel, Sebuel, Jeremot, Ananías, Hanani, Eliata, Gidalti, Romamti-ezer, Josbecasa, Maloti, Hotir, shinallatac Mahaziotmi carca.

⁵ Tucui paicunami Dios ricuchishcata jatun mandacman huillac, shinallatac Diosta jatunyachishpa cantac Hemanpac churicuna carca. Diosca Hemanmanca chunga chuscu churita, quimsa ushitami curca.

⁶ Paicuna Mandac Diospac huasipi platillopi, salteriopi, arpapi tocashpa servicucpica, paicunapac taita Hemanmi yachachishpa pusharca. Asafta, Jedutunta, Hemantaca jatun mandacmi mandacurca.

⁷ Paicunapish, paicunapac huauquicunapish Diosta servingapac alli yachacushca, ishcai patsac pusac chunga pusacmi carca.

⁸ Chullayanacushpa Diosta servichunca yuyaccunatapish, cunan huiñaicunatapish, yachachiccunatapish, yachacuccunatapish suerteta ruhuashpami acllarca.

⁹ Puntaniqui suerteta ruhuacpica, Asafpac churi Josemanmi urmarca. Quipa suerteca Gedaliasmanmi urmarca.

¹⁰ Quimsaniqui suerteca Zacurman,

¹¹ chuscuniquica Izriman,

¹² pichcaniquica Netaniasman,

¹³ suctaniquica Buquiasman,

¹⁴ canchisniquica Jesarelaman,

¹⁵ pusacniquica Jesahiasman,

¹⁶ iscunniquica Mataniasman,

¹⁷ chunganiquica Simeiman,

¹⁸ chunga shucniquica Azareelman,

¹⁹ chunga ishcainiquica Hasabiasman,

²⁰ chunga quimsaniquica Subaelman,

²¹ chunga chuscuniquica Matatiasman,

²² chunga pichcaniquica Jeremotman,

²³ chunga suctaniquica Ananiasman,

²⁴ chunga canchisniquica Josbecasaman,

²⁵ chunga pusacniquica Hananiman,

²⁶ chunga iscunniquica Malotiman,

²⁷ ishcai chunganiquica Eliataman,

²⁸ ishcai chunga shucniquica Hotirman,

²⁹ ishcai chunga ishcainiquica Gidaltiman,

³⁰ ishcai chunga quimsaniquica Mahaziotman,

³¹ ishcai chunga chuscuniquica Romanti-ezermanmi urmarca. Tucui paicunami churicunahuan, familiacunahuan chunga ishcai carca.