1 CRÓNICAS 23 - Dios Rimashcata Quillcashcami

Levitacunata Diospac huasita ruhuanapi churashcamanta

¹ Davidca achca huatayuc ña yuyac cashpami, paipac churi Salomonta israelcunata mandac cachun churarca.

² Shinallatac israelcunata mandaccunatapish, curacunatapish, levitacunatapish tucuitami tandachirca.

³ Levitacunataca quimsa chunga huatamanta huichaimanmi yuparca. Tucui yupacpica, quimsa chunga pusac huarangami carca.

⁴ Caicunamantaca, Ishcai chunga chuscu huaranga runacunaca Mandac Diospac huasi ruhuanata pushaccunami carca. Sucta huaranga runacunaca mandaccuna, shinallatac juezcunami carca.

⁵ Chuscu huaranga runacunaca Diospac huasi punguta cuidaccunami carca. Cutin chuscu huaranga runacunaca Mandac Diosta alli ningapac ruhuachishca tocanacunapi tocaccunami carca.

⁶ Davidca Levipac aillupuramanta Gersonpac, Cohatpac, Meraripac huahua huahuacunataca paicunapurallatacmi chicanyachirca.

⁷ Gersonpac churicunaca: Ladán, shinallatac Simeimi carca.

⁸ Ladanpac quimsa churicunaca: Puntaca Jehiel, chai quipaca Zetam, shinallatac Joelmi carca.

⁹ Simeipac quimsa churicunaca: Selomit, Haziel, shinallatac Haranmi carca. Paicunami Laadanpac huasi ucupuracunata mandaccuna carca.

¹⁰ Simeipac chuscu churicunaca: Jahat, Zina, Jeús, shinallatac Beriami carca.

¹¹ Puntaca Jahatmi carca. Quipaca Zinami carca. Ashtahuanpish Jeús, shinallatac Beriaca mana achca huahuacunatachu charirca. Chaimantami paicunataca shuc familiallata ruhuashpa shuc ruhuanallapi churarca.

¹² Cohatpac chuscu churicunaca: Amram, Izhar, Hebrón, shinallatac Uzielmi carca.

¹³ Amrampac churicunaca: Aarón, shinallatac Moisesmi carca. Aarontapish, paipac huahua huahuacunatapish paipac ñaupapi huiñaita servishpa inciensota rupachichun, shinallatac paipac shutipi israelcunata huiñaita bendiciachunmi Mandac Diosca chicanyachirca.

¹⁴ Diosta servic Moisespac huahua huahuacunataca Levipac aillucunahuan tandachishpami yuparca.

¹⁵ Moisespac churicunaca: Gersón, shinallatac Eliezermi carca.

¹⁶ Gersonpac churi Sebuelca mandacmi carca.

¹⁷ Eliezerpac churi Rehabiaspish mandacmi carca. Eliezerca mana ashtahuan shuctac churicunata charircachu. Shina cashpapish Rehabiasca achca huahuacunatami charirca.

¹⁸ Izharpac churi Selomitpish mandacmi carca.

¹⁹ Hebronpac churicunaca: Puntaca Jerías, quipaca Amarías, quimsaniquica Jahazael, chuscuniquica Jecamanmi carca.

²⁰ Uzielpac churicunaca: Puntaca Micaía, quipaca Isiasmi carca.

²¹ Meraripac churicunaca: Mahli, shinallatac Musimi carca. Mahlipac churicunaca: Eleazar, shinallatac Cismi carca.

²² Eleazarca churicunata mana charishpami huañurca. Shina cashpapish ushicunataca charircami. Chai ushicunatami paicunapac taitapac huauqui Cispac churicunaca paicunapac huarmi cachun japircacuna.

²³ Musipac quimsa churicunaca: Mahli, Edar, shinallatac Jeremotmi carca.

²⁴ Paicunami, paicunapac ñaupa taita Levipac huahua huahuacunaca carca. Paicunaca ñaupa taitacunapac familiacunata pushaccunami carca. Paicuna mashna cashcata yachangapac shuticunata quillcashpa, shucllancaman yupashcami carca. Paicunataca ishcai chunga huatayucmanta huichaimanmi Diospac huasipi imata ruhuachun aparca.

²⁵ Davidca: «Israelcunata Mandac Diosmi pai acllashca israelcunamanca sumac causaita cushpa samachishca. Paica huiñaitami cai Jerusalenpi causanga.

²⁶ Levitacunaca Dios-huan tupana huasitapish, Diospacta ruhuangapac ima charinacunatapish mana ashtahuan maimanpish apangacunachu» nirca.

²⁷ David ña tucurina rimaicunata rimashca shinallatacmi Levipac huahua huahuacunataca ishcai chunga huatayucmanta huichaiman yupachun mandarca.

²⁸ Paicunaca Aaronpac huahua huahuacunata Mandac Diosta servinata ayudangapacmi carca. Paicunaca Diospac huasipi paipaclla chicanyachishcacunapi, ima mapa ama tuparichun cuidaccuna, ima ashtahuan shuc ruhuanacunatapish ruhuaccunami carca.

²⁹ Shinallatac Diosman chicanyachishca tandatapish, ashtahuan alli harinatapish, levadura illac galletatapish, sartenpi cusashpa Diosman cunatapish, medinacunatapish, pezanacunatapish cuidacmi carca.

³⁰ Chishipish, tutamantapish, Mandac Diosta pagui nishpa, alli ningapacmi ric carcacuna.

³¹ Samana punzhacunapi, llullu quilla punzhacunapi, jatun fiesta punzhacunapi Mandac Diosman cushca tucui animalcunata rupachingapacmi ric carca. Chai punzhacunapi mashna animalcunata cuchun mandashca shinallatacmi Mandac Diospac ñaupapi curcacuna.

³² Dios-huan tupana huasitapish, Diospaclla chicanyachishca ucutapish paicunami cuidacurca. Chashnami paicunaca Mandac Diostaca Aaronpac huahua huahuacunata Mandac Diospacta servinata ayudaccuna carca.