1 CRÓNICAS 22 - Dios Rimashcata Quillcashcami

¹ Shina cacpimi Davidca: «Mandac Diospac huasipish, shinallatac Israelcuna animalcunata Diosman cushpa tucui rupachina altartapish caipimi canga» nirca.

Diospac huasita shayachingapac allichirishcamanta

² Chai quipami Davidca caru llactamanta shamushpa, Israelpi causacuccunata tandanacuchun mandarca. Chashna tandachishpami maijantaca Mandac Diospac huasita shayachingapac rumita allichichun churarca.

³ Shinallatac clavota ruhuashpa punguta clavangapacpish, grampata ruhuangapacpish fierrotami achcata tandachirca. Broncetapish, cedro caspitapish mana yupaipac achcatami tandachirca.

⁴ Sidón Tiro llactapi causaccunami cedro caspicunataca achcata Davidman apamushca carca.

⁵ Chaimantami Davidca: «Ñuca churi Salomonca chairac huambraracmi. Tucui llactacunapac ricsishca alli nishca cachunmi Mandac Diospac huasitaca jatunta shinallatac sumacta shayachina can. Shina cashcamantami ñucallatac tucui allichigrini» nirca. Davidca manarac huañushpami, tucui allichishpa saquirca.

⁶ Chai quipami Davidca paipac churi Salomonta cayashpa, israelcunata Mandac Diospac huasita shayachichun mandarca.

⁷ Davidca Salomontaca: «Ñuca huahualla, ñucata Mandac Diosta alli ningapacmi huasita shayachina munaita ñuca shungupica charini.

⁸ Shina cacpipish, Mandac Dios ñucata rimashpaca: “Canca jatun macanacuita ruhuashpami, achcacunata huañuchishpa yahuarta jichashcangui. Chaimantami ñucata alli nina huasitaca mana shayachingui. Canca ñuca ñaupapica achca yahuartami allpapi jichashcangui.

⁹ Riqui, canca shuc churitami charingui. Paica sumacta causac runami canga. Shinallatac muyundi llactacunapi causac tucui paita piñaccunamantapish huacaichishami. Paipac shutica Salomonmi canga. Pai causacui punzhacunapica sumac cushi causaita israelcunaman cushpami samachisha.

¹⁰ Paimi ñucata alli nina huasitaca shayachinga. Paica ñuca churimi canga, ñucapish paipac taitami casha. Ñucami israelcunataca mandashpa, pai mandanataca huiñaita sinchi cachun ruhuasha” nirca.

¹¹ Cunanca ñuca huahualla, Mandac Dios canhuan cachun. Imata can ruhuacpipish, allimi llucshinga. Shinallatac canta Mandac Diospac huasitaca Dios canta ima shina mandashca shinallatac shayachingui.

¹² Can israelcunata mandacucpi, canta Mandac Dios mandashcata can pactachichun Diosllatac yuyaita cushpa, alli yachacta ruhuachun.

¹³ Mandac Dios israelcunaman cuchun Moisesman cushca mandashcacunata, yachachishca shimicunata can pactachicpica, imata ruhuacpipish allimi llucshingui. Cari, cari sinchi cangui. ¡Ama manchaichu, ama llaquirichu!

¹⁴ Riqui, ñucaca sinchi, sinchi cashpami, Mandac Diospac huasita shayachingapacca patsac huaranga talento curita, shuc junu talento cullquita tandachircani. Shinallatac broncepish fierropish achca cashcamantami mana pezashca tiyacun. Shinallatac caspicunatapish, rumicunatapish allichircanimi. Chaitaca canpish ashtahuan tandachishpami mirachina cangui.

¹⁵ Canca tucuita ruhuanata yachac achca runacunatami charingui. Shinallatac rumita allichiccunatapish, huasita ruhuaccunatapish, caspita allichiccunatapish charinguimi. Tucuita ruhuanata yachaccunatapish charinguimi.

¹⁶ Curipish, cullquipish, broncepish, fierropish maita mana yupaipacmi tiyacun. ¡Jatarishpa utca ruhuai callarilla! Mandac Diosca canhuan cachun» nirca.

¹⁷ Davidca paipac churi Salomonta ayudachun tucui israelcunata mandashpaca:

¹⁸ «¿Cancunata Mandac Diosca manachu cancunahuan? ¿Maita ricpipich, manachu cancunamanca cushi causaita curca? Paimi cai llactapi causaccunataca ñuca maquipi churashca. Chaimantami chai llactapi causaccunaca Mandac Diospac ñaupapi pai acllashcacunapac ñaupapi mandashca causancuna.

¹⁹ Chaimanta cancunaca cancunata Mandac Diosta tucui shunguhuan, tucui yuyaihuan mashcaichic. Mandac Dios ari nishca quillcata huacaichina Arcatapish Diospaclla chicanyachishca ima charishcacunatapish, apamungapac Mandac Diospac huasitaca shayachi callarichic» nirca.