1 CRÓNICAS 21 - Dios Rimashcata Quillcashcami

Israelcunata David yupashcamanta

¹ Satanasca israelcunata piñashpami Davidmanca israelcunata yupana yuyaita curca.

² Chaimantami Davidca Joabtapish, soldadocunata mandaccunatapish mandashpaca: —Mashna israelcuna tiyashcata ñuca yachangapac Beerseba pueblomanta callarishpa, Dan pueblocaman yupashpa ñucaman huillac shamuichic— nirca.

³ Shina nicpimi Joabca: —¡Mandac Dios pai acllashca israelcunataca cunan cashcamanta patsac cutinhuan yallita mirachichun! Jatun mandac ñuca amolla, ¿manachu tucui paicunaca ñuca amota serviccuna? Ñuca amo canca ¿Imapactac yupachun mandangui? ¿Imapactac israelcunapac llaquita ruhuashun?— nirca.

⁴ Shina nicpipish, jatun mandacca pai nishcataca ruhuachuntacmi mandarca. Chaimanta Joab llucshishpaca tucui Israel llactata purishpa, yupashpami Jerusalenman cutimushpa chai yupashpa quillcashcata Davidman curca.

⁵ Tucui Israel llactapi espadahuan macanacuccunaca shuc junu patsac huaranga runacunami tiyashca carca. Judá llactapi espadahuan macanacuccunaca chuscu patsac canchis chunga huaranga runacunami tiyashca carca.

⁶ Jatun mandac mandashca Joabpac yuyaipi mana alli cacpimi, levitacunatapish, Benjaminpac huahua huahuacunatapish mana yuparca.

⁷ David caita ruhuashcaca Mandac Diospac ñaupapica mana allichu carca. Chaimantami taita Diosca israelcunata llaquichirca.

⁸ Chaipimi Davidca Mandac Diostaca: —Caita ruhuashpaca, jatun juchatami ruhuashcani. Canta servic ñucamantaca juchata anchuchiyari. Shuc juizhu illac shinami ruhuashcani— nirca.

⁹ Shina mañacpimi, Mandac Diosca ricuchishcata Davidman huillac Gadtaca:

¹⁰ «Davidpacman rishpa, Mandac Diosca: “Cai quimsa llaquicunamanta shucta canta llaquichichun acllai” ninmi nigri» nirca.

¹¹ Gat Davidpacman rishpaca: —Mandac Diosca:

¹² “¿Quimsa huatata yarcaihuan llaquichichunchu munangui? ¿Mana cashpaca, canta piñaccuna mishashpa, espadahuan huañuchingapac caticpi, quimsa quillata miticushpa purinatachu munangui? ¿Mana cashpaca, Mandac Diospac ángel tucui Israel llactata mancharina ungüihuan quimsa punzhata llaquichichunchu munangui?” ninmi. Riqui, can maijanta acllashcatami ñucata cachacmanca huillagrina cani— nirca.

¹³ Shina nicpimi Davidca: —Riqui, jatun llaquipimi cani. Mandac Diosca yallita cuyacmi. Paipac maquipi llaquichishca canata munani. Runacunapac maquipi llaquichishca canataca mana munanichu— nirca.

¹⁴ Shinami Mandac Diosca jatun mancharina ungüihuan israelcunata llaquichirca. Chai ungüihuanmi canchis chunga huaranga israelcuna huañurca.

¹⁵ Mandac Diosca Jerusalenpi causaccunata tucuchichunca shuc angeltami cacharca. Ashtahuanpish chai ángel tucuchicucpimi, Mandac Diosca llaquirishpa, angeltaca: «¡Ña chailla! ¡Ama ashtahuan llaquichichu!» nirca. Mandac Diospac angelca jebuseopuramanta Ornanpac trillana era ladopimi carca.

¹⁶ David huichai ricushpaca, Mandac Diospac ángel cai pachahuan jahua pachahuan chaupipi shayacuctami ricurca. Shinallatac paipac maquihuanca espadata Jerusalén pueblo ladoman ricuchishpa charicuctami ricurca. Chaimantami Davidpish, israelcunata pushac yuyaccunapish sharpa churanata churarishpa allpacaman cumurirca.

¹⁷ Chaipimi Davidca Diostaca: —Gentecunata yupachunca ñucami mandarcani. Ñucami jatun mana allita ruhuashpa, juchata ruhuarcani. Ashtahuanpish cai gentecunaca ¿ima mana allitatac ruhuashcayari? Ñuca Mandac Dioslla, ñucata, ñucapac huasi ucupurata cambac maquihuan llaquichilla. Ashtahuanpish ama can acllashca gentecunataca jatun mancharina ungüihuan llaquichichu— nirca.

¹⁸ Mandac Diospac angelmi Gattaca jebuseopuramanta Ornanpac trillana eraman huichai rishpa, Mandac Diosman shuc altarta ruhuachun Davidta nigri nirca.

¹⁹ Chaimantami Davidca Mandac Diospac shutipi Gat huillashca shinallatac huichai rirca.

²⁰ Ornanca trigotami trillacurca. Chashna trillacushpa huashaman tigrarishpaca angeltami ricurca. Cutin paihuan cac chuscu churicunaca miticungapacmi callparca.

²¹ Shinallatac David Ornanpacman chayacucta ricushpaca trillana pambamanta llucshishpami Ornanca Davidpac ñaupapi pambacaman cumurirca.

²² Chai quipami Davidca Ornantaca: —Mandac Diosman shuc altarta ruhuangapac cai era pambata catui. Gentecunata ama ashtahuan cai ungüi huañuchichunmi altarta ruhuasha nini. Mashna valipish cachun catuilla— nirca.

²³ Shina nicpimi, Ornanca Davidtaca: —Ñuca jatun mandaclla, cambac alli cana cacpica japilla. Diosman animalta cushpa rupachichunpish huagracunata cushami. Yantapacca trillana caspicunatami cusha. Shinallatac granota Diosman cushpa rupachichunpish cushami. Tucui caicunatami cuni— nirca.

²⁴ Shina nicpimi, jatun mandac Davidca Ornantaca: —Mana, ashtahuanpish mashna valishcapimi randisha. Mandac Diosman cungapacca cambac cashcata mana yanga japishachu. Shinallatac yanga japishca animaltaca mana Diosman cushpa, rupachishachu— nirca.

²⁵ Chashna nishpami, Davidca chai pambamantaca sucta patsac curi siclos cullquita Ornanman curca.

²⁶ Davidca chaipimi Mandac Diosman shuc altarta ruhuashpa, Diosman animalta cushpa, tucui rupachirca. Dios-huan alli tucungapacpish, animalcunata rupachishpami Diosta mañarca. Pai mañashcata uyashpami, tucui rupachina animalta churashca altarman jahua pachamanta ninata cacharca.

²⁷ Chai quipami Mandac Diosca angeltaca, espadata huacaichichun mandarca.

David Diospac huasita shayachina pushtuta acllashcamanta

²⁸ Jebuseopuramanta Ornanpac trillana erapi mañashcata Mandac Dios uyashcata yachashpami, Davidca animalcunata cushpa rupachirca.

²⁹ Chai punzhacunapica shitashca pambapi Moisés ruhuachishca Mandac Diospac jatun carpapish, Diosman animalta cushpa tucui rupachina altarpish Gabaón lomapimi carca.

³⁰ Chashna cacpipish Davidca, Mandac Diospac ángel espadata charicucta ricushpami yallita manchashcamanta, Diosman tapungapacca mana ri pudirca.