1 CRÓNICAS 20 - Dios Rimashcata Quillcashcami

David Rabata prezu japishcamanta

¹ Usyai ña callarigricupimi jatun mandaccunaca macanacuiman llucshic carca. Chai punzhacunapimi Joabca achca soldadocunata pusharishpa, amonitacunapac llactata tucuchirca. Rabá puebloman chayashpaca tucui muyushpami chai pueblota tucuchirca. Ashtahuanpish Davidca Jerusalenpimi saquirirca.

² Chai quipaca, Rabá pueblota jatun mandacpac umamantami Davidca coronata japirca. Chai coronaca shuc talento curitami pezarca, shinallatac coronapica alaja rumicuna churashcami carca. Chai coronataca Davidmanmi churachircacuna. Shinallatac chai pueblopi ima tiyashcacunatapish quichushpami apamurca.

³ Shinallatac chaipi cac gentecunataca llucchishpami, sierrahuan, trillana fierrohuan, hachahuan trabajachun churarca. Davidca Amón llacta tucui pueblocunapi causaccunatapish chashnallatacmi ruhuarca. Chai quipami tucui paipac soldadocunahuan Jerusalenman cutimurca.

Filisteocunahuan cutinllatac macanacushcamanta

⁴ Chai quipaca Gezer pueblopimi cutinllatac filisteocunahuan macanacurca. Chaipimi, Husa pueblomanta Sibecaica manchana jatun runacunapac huahua huahuapuramanta Sipaita huañuchirca. Chashnami filisteocunataca atishpa cumurichirca.

⁵ Cutinllatac filisteocunahuan macanacushpami Jairpac churi Elhananca geteopuramanta Goliatpac huauqui Lahmita huañuchirca. Chai runapac lanzaca telar pilluna caspi shina racumi carca.

⁶ Cutinllatacmi Gat pueblopi macanacui tiyarca. Chaipica manchana maquicunapipish, chaquicunapipish sucta dedota charic jatun runami tiyarca. Tucuica ishcai chunga chuscu dedotami charirca. Chaipish manchana jatun runacunapac huahua huahuapurami carca.

⁷ Cai runami israelcunata burlashpa rimarirca. Chaimantami Davidpac huauqui Semeapac churi Jonatán huañuchirca.

⁸ Chai runacunaca Gat pueblomanta manchana runacunapac huahua huahuapuramantami carca. Paicunatami Davidca paita servic soldadocunahuan huañuchirca.