1 CRÓNICAS 19 - Dios Rimashcata Quillcashcami

Siriocunatapish amonitacunatapish mishashcamanta

¹ Chai punzhacuna quipa amonitacunata jatun mandac Nahas huañucpica, paipac churimi paipac randi mandai callarirca.

² Chaipimi Davidca: «Nahaspac churi Hanuntaca paipac taita ñucata llaquishca shinallatacmi llaquina cani» nirca. Chaimantami Hanún paipac taita huañushcamanta llaquilla cacpi, cushichichun paita serviccunata cacharca. Davidta serviccuna Hanunta cushichingapac hamonitacunapac llactaman chayacpica,

³ amonitacunata mandaccunaca Hanuntaca: «¿Canca David cambac taita huañushcamanta cushichichun cachashcatachu yuyangui? Ashtahuanpish, ¿manachu cai llactata ricushpa purichun, paipac serviccunataca cachashca canga?» nirca.

⁴ Shina nicpimi, Hanunca Davidta serviccunata japishpa barbasta pitichishpa, churanacunatapish cinturamanta uraiman pitishpa cacharca.

⁵ Chashna tucushcataca Davidpacman rishpami huillarcacuna. Chaimantami paicuna yallita pingaihuan cacpi paicunata tupachun cacharca. Davidca: «Jericó pueblopi barbas huiñangacaman saquirichic, quipataca shamunguichicllami» nichun cacharca.

⁶ Amonitacunaca David paicunata mana ricunayachicushcata yachac chayashpami Hanunhuan, amonitacunahuan carretacunatapish, caballocunapi puric soldadocunatapish, alquilachun huaranga talento cullquita cushpa Mesopotamia, Siria, Maaca, Soba llactacunaman cacharca.

⁷ Shina cachacpimi, quimsa chunga ishcai huaranga carretacunata, Maaca llactata jatun mandacta paipac soldadocunandi alquilarca. Paicuna shamushpami, Medeba pueblo chimba ladopi carpacunata shayachishpa tiyarirca. Amonitacunapish paicunapac pueblocunamanta tucui tandanacushpami macanacuiman shamurca.

⁸ David chaita uyashpa Joabtami paipac sinchi soldadocunahuan cacharca.

⁹ Amonitacuna llucshimushpaca, pueblo yaicunapimi macanacungapac allichirirca. Paicunahuan shamuc jatun mandaccunaca shuc lado pambapimi shuyacurca.

¹⁰ Joabca ñaupa ladomanpish, huasha ladomanpish macanacungapac allichirishca shayacucpimi, Israel llactamanta ashtahuan sinchi soldadocunata acllashpa, siriocunahuan macanacungapac rirca.

¹¹ Cutin shuctac soldadocunataca amonitacunahuan macanacuchunmi paipac huauqui Abisai mandachun curca.

¹² Chashna cushpami paica: «Siriocuna ñucata atishpa, ashtahuan sinchi cacpica, can ayudangui. Cutin amonitacuna canta atishpa ashtahuan sinchi cacpica, ñucami canta ayudasha.

¹³ Ñucanchic llactamantapish, ñucanchic Mandac Diospac pueblomantapish mana manchashpa sinchita macanacushunchic. Mandac Diosca pai munashca shina imatapish ruhuachun» nirca.

¹⁴ Joabca paipac gentecunandi siriocunahuan macanacungapac chayacpica, paipac ñaupamantaca miticushpami callparcacuna.

¹⁵ Siriocuna manchashpa callpacta ricushpaca amonitacunapish Joabpac huauqui Abisaipac ñaupamanta manchashpa callpashpami, shuc puebloman yaicurca. Chashna tucucpica, Joabca Jerusalenmanmi cutimurca.

¹⁶ Siriocunaca israelcuna paicunata mishashcata yachashpami, huillaccunata Eufrates yacu chimba ladopi causac sirio soldadocunata mañachun cacharca. Chai soldadocunataca Hadad-ezerpac soldadocunata mandac Sofacmi mandacurca.

¹⁷ Chaita Davidman huillacpimi, tucui israelcunata tandachishpa, Jordán yacuta pasashpa paicunapacman chayashpa paicunahuan macanacuchun mandarca. Chashna David mandacpimi, paicunaca siriocunahuan macanacurca.

¹⁸ Ashtahuanpish siriocunaca israelcunapac ñaupamanta miticushpa callparcacunami. Chashna callpacpimi, Davidca canchis huaranga carretapi ric soldadocunata, chuscu chunga huaranga chaquillahuan ric soldadocunata shinallatac soldadocunata mandac Sofactapish huañuchirca.

¹⁹ Hadad-ezerta ayudaccunaca israelcuna paicunata mishacta ricushpami, Davidhuan cushilla causangapac parlanacurca. Shinami Davidta servishpa causarca. Cutin siriocunaca amonitacunataca mana ashtahuan ayudanata munarcachu.