1 CRÓNICAS 18 - Dios Rimashcata Quillcashcami

David shuctac llactacunata mandashcamanta

¹ Chai quipaca filisteocunata mishashpami Davidca, Gat pueblota muyundi uchilla pueblocunandi filisteocunapac maquimanta quichushpa mandashpa charirca.

² Chashnallatac Moab llactapi causaccunatapish mishashpami impuestota pagachishpa, servichishpa causarca.

³ Shinallatac Davidca Soba llactata jatun mandac Hadad-ezertapish Hamat pueblopimi misharca. Chai mandacca Eufrates jatun yacu ladocamanmi mandagricurca.

⁴ Davidca chashna macanacushpami huaranga carretacunata, canchis huaranga caballopi puric soldadocunata, ishcai chunga huaranga chaquillahuan ric soldadocunata japirca. Tucui carretacunata aisac caballocunataca chaqui mucucunatami paquirca. Ashtahuanpish patsac carretacunata aisachunllami caballocunataca saquichirca.

⁵ Damasco pueblopi causac siriocunami Soba llactata jatun mandac Hadad-ezerta ayudangapac shamurca. Davidca chai shamuccunataca chunga ishcai huaranga runacunatami huañuchirca.

⁶ Chai quipami Davidca, Damasco pueblopi cac Siria llactapi cuidac soldadocunata churarca. Chashnami siriocunaca Davidta servishpa, impuestota cushpa causarca. David maiman ricpipish, Mandac Diosmi macanacuitaca mishachirca.

⁷ Davidca Hadad-ezerta serviccuna apashca curi escudocunatapish quichushpami, Jerusalenman aparca.

⁸ Hadad-ezerpac Tibhat, shinallatac Cun pueblomantapish achca broncetami japirca. Chai broncehuanmi Salomonca jatun pailatapish, pilarcunatapish, Diospac huasipi ima charinacunatapish ruhuarca.

⁹ Hamat pueblota jatun mandac Toica, Soba llactata jatun mandac Hadad-ezerpac soldadocunata David tucuchishcata uyashpami,

¹⁰ Toica paipac churi Adoramtami saludachun, “allitami ruhuarcangui” nichun Davidpacman cacharca. Toipish Hadad-ezerhuan macanacushpami causacurca. Chaimantami curimanta, cullquimanta, broncemanta ruhuashca tucui charinacunata cacharca.

¹¹ Chaicunatami jatun mandac Davidca Mandac Diospaclla cachun, Edom, Moab, Amón, llactapi causaccunamanta, filisteocunamanta, amalecitacunamanta quichushca curihuan, cullquihuan pacta Diosman curca.

¹² Shinallatac Sarviapac cari huahua Abisaipish chunga pusac huaranga edomitacunatami Cachi Pambapi huañuchirca.

¹³ Shina mishashpami, Edom llactapica cuidac soldadocunata churarca. Tucui edomitacunami Davidta servic tucurca. David maiman ricpipish Mandac Diosmi macanacuita mishachirca.

David churashca mandaccunamanta

¹⁴ Davidca tucui israelcunatami allita, shinallatac cashcata ruhuashpa mandacurca.

¹⁵ Sarviapac cari huahua Joabca soldadocunatami mandacurca. Ahiludpac churi Josafatca jatun mandacpac quillcacmi carca.

¹⁶ Ahitobpac churi Sadocpish, Abiatarpac churi Abimelecpish curacunami carca. Savsaca quillcacmi carca.

¹⁷ Joiadapac churi Benaiasca peleteocunata, cereteocunata mandacmi carca. Jatun mandac Davidpac churicunaca paipac ladopimi imatapish ayudac carca.