1 CRÓNICAS 16 - Dios Rimashcata Quillcashcami

¹ Chashna apamushpami, Diospac Arcataca David ruhuashca carpa huasipi churana cashcapi churarcacuna. Chai quipaca Mandac Dios-huan alli tucungapacmi animalta huañuchishpa, shinallatac tucui rupachishpa Diospac ñaupapi curca.

² David Diosman cushpa tucuita rupachishca, shinallatac Dios-huan alli tucungapac animalta cushca quipaca, Mandac Diospac shutipimi tucui israelcunata bendiciarca.

³ Chai quipaca tucui Israel caricunamanpish, huarmicunamanpish cada shucmanmi shuc tandata, asha aichata, shuc pasas tortata curca.

⁴ Mandac Diospac Arca ñaupapimi israelcunapac Diosta servichun, pagui nishpa cantachun, Diosta servic levitapuramanta acllashpa churarca.

⁵ Paicunata mandacca Asafmi carca. Quipa mandacca Zacariasmi carca. Paicunapac caticca Jeiel, Semiramot, Jehiel, Matatías, Eliab, Benaía, Obed-edommi, shinallatac Jeielmi mandacurca. Paicunaca salteriocunapi, arpacunapimi tocaccuna carca. Asafca platillocunapimi tocac carca.

⁶ Shinallatac Benaía, Jahaziel curacunapish Dios ari nishca quillcata huacaichina Arca ñaupapimi punzhanta trompetapi tocaccuna carca.

David Diosta pagui nishcamanta

⁷ Chai punzhapi, David punta cutin Asaftapish, paipac aillucunatapish Mandac Diosta cantachun mandashpaca:

⁸ «¡Mandac Diosta alli nichic! ¡Paipac shutita huillaichic! ¡Pai ima ruhuashcata, gentecunaman huillaichic!

⁹ ¡Paiman Salmocunata cantaichic. Pai tucui sumaimana, ruhuashcacunata parlaichicyari!

¹⁰ Paipac jucha illac shutipi cushicuichicyari. Mandac Diosta mashcaccunaca, shungupi cushicuichicyari.

¹¹ Mandac Diosman cuchuyaichic. Paipac poderta mashcaichic. Paipac ñahuita punzhanta, mashcaichicyari.

¹² Pai mancharina allicunata, sumaimanacunata, paipac shimihuan mandashpa ruhuashcatapish yuyarichic.

¹³ Diosta servic israelcunapac huahua huahuacunapish, pai acllashca Jacobopac huahua huahuacunapish yuyarichic.

¹⁴ Mandac Diosmi, ñucanchic Diosca. Pai llaquichishcacunaca, tucui cai pachapimi ricuricun.

¹⁵ Pai ari nishcataca, huiñaitami yuyaricun. Huaranga huahua huahuacunaman, pai rimashcataca mana cungarinchu.

¹⁶ Abrahamhuan, Isaac-huan ari nishcataca, mana cungarinchu.

¹⁷ Chaitaca mandashca cachunmi, Jacoboman curca. Israelmanca huiñaipacmi, ari nirca.

¹⁸ Paica: “Can japinataca Canaán llactatami cusha” nircami.

¹⁹ Paicuna mana achca cacpipish, caru llactamanta shamushca, ashallacuna shina cacpipish,

²⁰ llacta llacta puricucpipish, Jatun llactamanta, shuctac llactaman ricucpipish,

²¹ paicunata pi llaquichichunca, mana saquircachu. Paicunata cuyashcamantami jatun mandaccunata llaquichishpa,

²² ¡Ñuca acllashcacunataca, ama tuparinguichicchu, ñuca ima nishcata huillaccunataca, ama llaquichinguichicchu!

²³ ¡Tucui cai pachapi causaccuna, Mandac Diosta cantaichic! Pai quishpichic cashcataca punzhanta huillacuichic.

²⁴ Pai sumaimana cashcataca, tucui llactacunapi cantaichic. Pai allicunata ruhuashcataca, tucui gentecunaman huillaichic.

²⁵ Mandac Diosca jatunmi. Jatunyachishca canatami can. Ruhuashcalla dioscunata atishpa, manchana Diosmi.

²⁶ Gentecunapac dioscunaca, imapish mana cac yanga dioscunami. Ashtahuanpish Mandac Diosmi jahua pachacunataca ruhuarca.

²⁷ Paipac ñaupapica, sumaimana achicllami tiyan. Pai causanapica poderpish, cushicuipish tiyanmi.

²⁸ Tucui llacta aillucuna, Mandac Diosman cuichicyari. Mandac Diosman sumac achic canata, ima ruhuai pudinatapish cuichic.

²⁹ Mandac Diospac shutita, sumacyachichic. Paiman ofrendata apashpa, paipac ñaupaman shamuichic. Paipac jucha illac huasipi cungurishpa alli nichic.

³⁰ ¡Paipac ñaupapica, tucui cai pachapi causaccuna chucchuchun! Paimi cai pachataca maita mana cuyuripacta ruhuarca.

³¹ ¡Jahua pachapish, cai pachapish yallita cushicuichic! Llactacunapica “Mandac Diosmi mandacun” nishpa huillaichic.

³² ¡Mama cuchapish tucui, chaipi tiyashcahuan caparichun! ¡Pambacunapish, chaipi tucui tiyashcahuan cushicuchun!

³³ Mandac Diospac ñaupapica, maipi tiyashca yuracuna caparichun. Paica allpapi causaccunata, mandangapacmi shamun.

³⁴ Mandac Diosta alli nichic, Paica allimi can. Paipac cuyaica huiñaipacmi can

³⁵ Cancunaca: “¡Ñucanchic quishpichic Dioslla, quishpichiyari! Llactacunapi causaccunamanta, tandashpa quishpichiyari. Cambac jucha illac shutitaca, huillashunmi. Cantaca cantashpami, cushichishun” nichicyari.

³⁶ ¡Israelcunata Mandac Diosca, huiñaita alli nishca cachun!» nirca. Shina nicpimi, tucui gentecunaca: «¡Chashna cachun!» nishpa Mandac Diostaca alli nircacuna.

Dios-huan tupana carpa huasipi serviccunamanta

³⁷ Davidca Dios ari nishca quillcata huacaichina Arca ñaupapimi Asafta, paipac huauquicunata, chaipi punzhanta imata ruhuana cashcata ruhuachun saquirca.

³⁸ Shinallatac Obed-edomtapish, sucta chunga pusac paipac huauquicunahuanmi saquirca. Cutin Jedutunpac churi Obed-edomta, shinallatac Hosataca pungupi cuidachunmi saquirca.

³⁹ Sadoc curataca caishuc paipac huauqui curacunahuanmi Mandac Diospac huasipi Diosta servichun Gabaón lomapi tiyac altarpi saquirca.

⁴⁰ Israelcunata mandashpa, Mandac Dios quillcashcapi nishca shinallatacmi Mandac Diosman punzhanta animalcunata cushpa, huañuchichun, tucuita rupachina altarpi chishipish, tutamantapish animalcunata Diosman cushpa tucui rupachichun chaipi saquirca.

⁴¹ Shinallatac mandac Diosta cantachunca Hemanta Jedutuntami caishuc acllashcacunahuan chaipi saquirirca. Mandac Diospac cuyaica huiñai huiñaita cashcamantami chaipi cantachun saquirca.

⁴² Paicunahuanca Hemán, Jedutún runacunatami trompetapi, platillopi shuc tocanacunapipish tocashpa Diosta alli nichun saquirca. Jedutunpac churicunataca Diospac carpa huasi punguta cuidachunmi saquirca.

⁴³ Chai quipaca tucui gentecunami paicunapac quiquin huasiman rircacuna. Davidpish paipac huasi familiata bendiciangapacmi paipac huasiman cutimurca.