1 CRÓNICAS 15 - Dios Rimashcata Quillcashcami

David Jerusalenman Arcata apashcamanta

¹ Davidca paipac pueblopimi paipac huasicunata shayachirca. Shinallatac Diospac Arcata churangapacpish shuc pushtuta acllashpami carpa huasita shayachirca.

² Shina ruhuashpami Davidca: «Diospac Arcataca mana pipish apangachu, ashtahuanpish levitacunallami apanga. Mandac Diosmi paicunataca paipac Arcata apachunpish, tucui causaipi paita servichunpish acllashca» nirca.

³ Davidca, Mandac Diospac Arcata pai acllashca pushtuman apangapacmi tucui israelcunata Jerusalenpi tandachirca.

⁴ Shinallatac Aaronpac, huahua huahuacunatapish, levitacunatapish tandachircami.

⁵ Tandanacuccunaca, Cohatpac huahua huahuapuramanta paicunata mandac Urielmi patsac ishcai chunga aillucunahuan shamurca.

⁶ Meraripac huahua huahuapuramantaca paicunata mandac Asaiasmi ishcai patsac ishcai chunga aillucunahuan shamurca.

⁷ Gersonpac huahua huahuapuramantaca paicunata mandac Joelmi patsac quimsa chunga aillucunahuan shamurca.

⁸ Elizafanpac huahua huahuapuramantaca paicunata mandac Semaiasmi ishcai patsac aillucunahuan shamurca.

⁹ Hebronpac huahua huahuapuramantaca paicunata mandac Eliemi pusac chunga aillucunahuan shamurca.

¹⁰ Uzielpac huahua huahuapuramantaca paicunata mandac Aminadabmi patsac chunga ishcai aillucunahuan shamurca.

¹¹ Chai quipa Sadoc, Abiatar curacunata, shinallatac levitacunamanta Uriel, Asaías, Joel, Semaías, Eliel, shinallatac Aminadabta,

¹² cayashpaca: «Cancunami levitacunapac familiacunata mandac canguichic. Chaimanta israelcunata Mandac Diospac Arcata ñuca acllashca pushtuman apamungapac cancunapish, cancunapac aillucunapish Diospaclla tucushpa chuyayaichic.

¹³ Utcapica cancuna mana apamushcamanta, shinallatac pai mandashca shina mana ruhuashcamantami ñucanchicta Mandac Diosca llaquichirca» nirca.

¹⁴ Israelcunata Mandac Diospac Arcata apamungapacca curacunapish, levitacunapish Diospaclla tucushpami chuyayarca.

¹⁵ Levitacunapac huahua huahuacunami Arcataca Mandac Dios Moisesta mandashca shinallatac caspicunapi churashpa huandumurca.

¹⁶ Shinallatac Davidca levitacunata mandaccunataca: “Salteriopi, arpapi, platillocunapi sinchita tocashpa cantashpa richun cancunapac aillucunata acllaichic” nirca.

¹⁷ Chaimantami levitacunaca Joelpac churi Hemanta, paipac aillucunamantaca Berequiaspac churi Asafta, Meraripac huahuapuramanta shinallatac paicunapac aillumantaca Cusaiaspac churi Etantami acllarca.

¹⁸ Shinallatac paicunahuan quipa mandaccuna cachunca Zacariasta, Jaazielta, Semiramotta, Jehielta, Unita, Eliabta, Benaiata, Maasiasta, Matatiasta, Elifelehuta, Micniasta, Obed-edomta, shinallatac Jeieltami acllarca. Paicunaca punguta cuidaccunami carca.

¹⁹ Cantac Hemán, Asaf, shinallatac Etanca bronce platillocunapimi tocarca.

²⁰ Zacarías, Aziel, Semiramot, Jehiel, Uni, Eliab, Maasías, shinallatac Benaiasmi salteriocunapi Alamot tonopi tocangapac carca.

²¹ Matatías, Elifelehu, Micnías, Obed-edom, Jeiel, Azaziasca arpacunapimi siminita tonopi tocanata callaringapac carca.

²² Tocanapi Levitacunata pushac Quenaniastami cantanata yachachishpa pushachun churarca. Paica tocanata alli yachacmi carca.

²³ Berequías, shinallatac Elcanaca Diospac Arcata cuidaccunami carca.

²⁴ Sebanías, Josafat, Natanael, Amasai, Zacarías, Benaía, shinallatac Eliezer curacunaca Diospac Arca ñaupapimi trompetacunapi tocarcacuna. Shinallatac Obed-edom, Jehiaspish Diospac Arcata cuidaccunami carca.

²⁵ Davidpish, israelcunata pushac yuyaccunapish, huaranga huaranga soldadocunata mandaccunapish cushicushpami, Obed-edompac huasimanta Dios ari nishcata huacaichina Arcata apamungapac rircacuna.

²⁶ Mandac Dios ari nishca quillcata huacaichina Arcata levitacuna apacucpi, Dios ayudashcamantami canchis becita, canchis cari ovejata Diosman cushpa huañuchirca.

²⁷ Davidca linomanta ruhuashca ashtahuan alli churanata churashcami carca. Diospac Arcata apac levitacunapish, cantac levitacunapish, cantaccunata pushac Quenaniaspish chashna churanallahuantacmi carca. Davidca linomanta ruhuashca efodtapish churashcami carca.

²⁸ Chashnami Davidca Mandac Dios ari nishca quillcata huacaichina Arcataca tucui israelcunahuan yallita cushicushpa, cantashpa, bocinacunapi, trompetacunapi, platillocunapi salteriocunapi, sinchita tocashpa aparcacuna.

²⁹ Mandac Dios ari nishca quillcata huacaichina Arcahuan David paipac puebloman cushicushpa, saltashpa, danzashpa shamucucta Saulpac ushi Mical ventanamanta ricushpaca, paipac shungupimi piñanayachirca.