1 CRÓNICAS 14 - Dios Rimashcata Quillcashcami

Hiram Davidpacman huillaccunata cachashcamanta

¹ Tiro pueblota jatun mandac Hirammi David paipac huasita shayachichun huillaccunata, huasita ruhuaccunata, carpinterocunata, cedro caspicunata cushpa cacharca.

² Chaimantami Davidca Mandac Dios pai acllashca israelcunata cuyashpa, israelcunata jatun mandac cachun churashcatapish, chai mandanata jatunyachishcatapish yachac chayarca.

David Jerusalenpi ashtahuan churicunata charishcamanta

³ Davidca Jerusalén pueblopi ashtahuan huarmicunata charishpami ashtahuan churicunatapish, ushicunatapish charirca.

⁴ Jerusalén pueblopi huacharishca huahuacunaca: Samúa, Sobab, Natán, Salomón,

⁵ Ibhar, Elisúa, Elpelet,

⁶ Noga, Nefeg, Jafía,

⁷ Elisama, Beeliada, shinallatac Elifeletmi carca.

Filisteocunahuan David macanacushcamanta

⁸ Israelcuna Davidta aceitehuan cahuishpa jatun mandac cachun churashcata Filisteocuna yachac chayashpami, Davidhuan macanacungapac rircacuna. Chaita yachashpami, Davidca paicunahuan macanacungapac llucshirca.

⁹ Filisteocuna chashna rishpaca Refaí pambapimi tiyarirca.

¹⁰ Shina cacpimi Davidca Mandac Diostaca: —¿Filisteocunahuan macanacungapac rishachu? ¿Paicunataca ñuca maquipi churanguichu?— nishpa tapurca. Shina tapucpi, Mandac Diosca: —Paicunataca cambac maquipimi churasha. Macanacugrilla— nirca.

¹¹ Chashna nicpimi, David rishpaca, Baal-perazim pambapi macanacushpa, filisteocunata atirca. Shina atishpami Davidca: «¡Mandac Diosca jatun yacu apac shinami, ñucata piñaccunataca ñuca maquihuan tucui chingachishca!» nirca. Chaimantami chai pambataca Baal-perazimta shutichirca.

¹² Chashna aticpimi, filisteocunaca paicunapac dioscunata shitashpa rircacuna. Davidca chai dioscunata rupachichunmi mandarca.

¹³ Cutinllatacmi filisteocunaca chai pambaman shamushpa, chaipi tiyarirca.

¹⁴ David, Mandac Dios cutinllatac tapucpimi, Mandac Diosca: «Ama macanacungapac richu, chaipac randica bálsamo yuracuna tiyac pushtupi muyushpa japigri.

¹⁵ Bálsamo yuracuna jahuata puric shina uyaricpica, filisteocunahuan macanacungapac llucshingui. Chaipica Mandac Dios ñucami filisteocunata huañuchingapac ñaupashpa risha» nirca.

¹⁶ Davidca Mandac Dios nishca shina ruhuashpami, filisteocunataca Gabaón pueblomanta Gezer pueblocaman macashpa huañuchirca.

¹⁷ David chashna ruhuashcaca tucui llactacunapimi yacharirca. Mandac Diosmi tucui llactacunapi Davidta manchachun chashna ruhuarca.