1 CRÓNICAS 13 - Dios Rimashcata Quillcashcami

David Arcata Jerusalenman apanata yuyarishcamanta

¹ Davidca huaranga soldadota, patsac soldadota mandaccunahuan, shinallatac caishuc mandaccunahuanmi parlanacurca.

² Chai quipami Davidca tucui tandanacushca israelcunataca: «Cancunaman alli cacpi, ñucanchicta Mandac Diospac munai cacpica, Israel llactapi saquirishca ñucanchic tucui huauquicunata, shinallatac paicunapac pueblocunapi, michina pambacunapi causac curacunata, levitacunata ñucanchic-huan tandanacuchun cayachun cachashunchic.

³ Chaimantaca ñucanchic Diospac Arcata ñucanchicpacman apamushunchic. Saúl mandacui huatamanta pachami ñucanchicca cungarishcanchic» nirca.

⁴ Chai yuyai alli cacpimi, tandanacushca tucui israelcunaca chashna ruhuashunchic nirca.

David Arcata apasha nishcamanta

⁵ Chaimantami Davidca Diospac Arcata Quiriat-jearim pueblomanta apamungapac Egipto linderopi tiyac Sihor pambamanta callarishpa, Hamat pueblo yaicunacaman tucui israelcunata tandachirca.

⁶ Davidca tucui israelcunahuanmi Mandac Diospac Arcata apamungapac Judá llacta Baala nishca Quiriat-jearim puebloman rirca. Chai Arca jahuapi tiyac querubincunapac chaupipimi Mandac Diosta mañana carca.

⁷ Diospac Arcataca shuc mushuc carretapi churashpami, Abinadabpac huasimanta aparcacuna. Uza, Ahío runacunami chai carretataca ñaupashpa rirca.

⁸ Davidpish, tucui israelcunapish Mandac Diospac ñaupapimi arpapi, panderopi, salteriopi, cimbalopi, trompetapi tocashpa, cantashpa cushicurca.

⁹ Quidonpac trillana eraman chayacpi chai carretata aisac huagracuna lluchcaricpimi, Uza runaca Diospac Arca urmagricpi japirirca.

¹⁰ Uza runa Arcata japirishcamantami Mandac Diosca nina japiric shina piñarishpa, paitaca llaquichishpa causaita quichurca.

¹¹ Mandac Dios Uzata huañuchishcamantami Davidca yallita piñarishpa, chai pambataca Pérez-uzata shutichirca. Cunancamanmi chai shutillatac can.

¹² Chai punzhaca, Mandac Diosta manchashpami Davidca: «¿Imapactac ñuca huasimanca Diospac Arcataca apashayari?» nirca.

¹³ Chashna nishpami, Davidca Diospac Arcataca paipac puebloman mana aparca. Chaipac randica geteocunapuramanta Obed-edompac huasimanmi apachun mandarca.

¹⁴ Diospac Arcaca quimsa quillatami Obed-edompac huasipica carca. Chaipi cacpimi, Mandac Diosca Obed-edompac familiatapish, shinallatac tucui ima charishcatami bendiciarca.