1 CRÓNICAS 11 - Dios Rimashcata Quillcashcami

Davidta Israel llactata jatun mandac cachun churashcamanta

¹ Tucui israelcuna Hebrón puebloman Davidpacman rishpaca: «Riqui, ñucanchicca cambac tullullatac, cambac aichallatacmi canchic.

² Saúl mandacui sarun punzhacunaca canllatacmi israelcunataca macanacuiman pushac, canllatacmi cutichimuc carcangui. Canta Mandac Diosmi cantaca: “Canmi ñuca acllashca israelcunataca michingui. Canmi ñuca acllashca israelcunataca mandangui” nircami» nircacuna.

³ Israelcunata pushac tucui yuyaccunami jatun mandacpacman Hebrón puebloman shamurcacuna. Shina shamucpimi, Davidca Hebrón pueblopi Mandac Diospac ñaupapi paicunahuan ari ninacurca. Mandac Dios Samuelman huillashca shinallatacmi israelcunata jatun mandac cachun Davidtaca aceitehuan cahuirca.

Muyundita pircashca Sión pueblota David japishcamanta

⁴ Davidca tucui israelcunahuanmi jebuseocuna causana Jebús nishca Jerusalenman rirca.

⁵ Jebús pueblopi causaccunami Davidtaca: «Canca caimanca mana yaicunguichu» nirca. Shina nicpipish, Davidca muyundita pircashca Sión pueblotaca japircami. Chai pueblotami cunanca Davidpac Pueblo nincuna.

⁶ Davidca: «Maijanmi jebuseocunahuan macanacushpa punta huañuchin chaitami mandac cachun churasha» nircami. Chaimantami Sarviapac cari huahua Joab punta rirca. Paitami mandac cachun churarca.

⁷ Chai quipami Davidca muyundita pircashca pueblopi causagrirca. Chaimantami Davidpac Pueblo nincuna.

⁸ Davidca chai muyundipimi Milo pambamanta callarishpa, jatun pirca ladocaman pueblota ruhuarca. Puchushca pueblocunataca Joabmi cutin allichirca.

⁹ Davidca Mandac Dios paihuan cacpimi, ashtahuan ashtahuan jatunyashpa catirca.

Davidpac quimsa sinchi macanacuc runacunamanta

¹⁰ Davidpac sinchi soldadocunata mandaccunaca caicunami. Paicunami David mandai callarichunca israelcunahuan tandanacushpa, Mandac Dios huillashca shinallatac David israelcunata jatun mandac cachun ayudarcacuna.

¹¹ Davidpac ashtahuan sinchi soldadocunaca: Quimsa chunga soldadocunata mandacca Hacmonipac churi Jasobeammi carca. Paimi shuc macanacuipica quimsa patsac soldadota paipac lanzahuan huañuchirca.

¹² Paipac quipaca ahohitapuramanta Dodopac churi Eliazarmi carca. Paipish quimsa sinchi runacunapuramantami carca.

¹³ Paimi Pas-damim pambapi filisteocuna macanacungapac allichiricucpica, Davidhuan carca. Shuc pambapimi cebada chagra tiyarca. Cutin israelcunaca filisteocunata manchashpami miticushpa rishca carca.

¹⁴ Shina ricpipish, paica chai cebada chagra chaupipi sinchita shayarishpami, filisteocunahuan macanacushpa misharca. Mandac Diosmi ayudashpa mishachirca.

¹⁵ Chai quimsa chunga sinchi soldadopuramanta quimsa soldadocunami urcu quingraipi tiyac Adulam machaiman Davidhuan tupangapac rirca. Cutin filisteocunapac soldadocunaca Refaim pambapimi carpacunata shayachishpa tiyacurca.

¹⁶ Davidca miticunapimi alli miticushpa tiyarirca. Cutin filisteo soldadocunaca Belén pueblopimi carca.

¹⁷ Chaipi David yacunayaihuan cashpami: «¡Belén pueblo yaicunapi tiyac jundumanta yacuta maijan apamushpa, ñucaman ubiachinmalla!» nirca.

¹⁸ Shina nicpimi, chai quimsa sinchi runacunaca filisteocunapac carpacunaman rishpa, Belén pueblo yaicunapi tiyac jundumanta yacuta llucchishpa Davidman apamurca. Shina apacpipish, Davidca mana ubiasha nishpami, Mandac Diosman cushpa:

¹⁹ «¡Cai runacuna huañunatapish mana manchashpa apamushca yacuca paicunapac yahuar shinami. Mandac Dioslla, cai yacuta ubianataca jarcayari!» nirca. Chashna nishpami mana ubiasha nirca. Chai yacutaca chai quimsa sinchi runacunami apamurca.

Davidpac quimsa chunga sinchi runacunamanta

²⁰ Joabpac huauqui Abisaimi chai quimsa chunga runacunata mandac carca. Paimi quimsa patsac runacunata lanzahuan huañuchirca. Chaimantami paica chai quimsa chunga sinchi runacuna shinallatac mai alli nishca carca.

²¹ Paimi chai quimsa chunga sinchi runacunamanta ashtahuan alli nishca mandacpish carca. Shina cacpipish, mana chai quimsa sinchi runacuna shinachu carca.

²² Benaiasca Cabseel pueblomanta yalli sinchi churimi carca. Paimi Moab llactamanta ishcai sinchi runacunata huañuchirca. Paillatacmi shuc rasu punzhapi, jutcuman rishpa, shuc leonta huañuchirca.

²³ Paillatacmi egipciopuramanta shuc jatun runatapish huañuchirca. Chai runaca ishcai metro ishcai chunga pichca centímetro jatunmi carca. Paica telar pilluna caspi shina racu lanzatami charicurca. Shina cacpipish, Benaiasca shuc caspillahuan llucshishpami lanzata quichushpa, chaillahuantac huañuchirca.

²⁴ Chashna ruhuashpami, Joiadapac churi Benaiasca chai quimsa sinchi runacunamanta yalli mai alli nishca tucurca.

²⁵ Paica quimsa chunga sinchi runacunapurapi ashtahuan alli nishca cashpapish, chai quimsa sinchi runacuna shinaca mana carcachu. Davidca Benaiastami paita cuidachun churarca.

²⁶ Sinchi runacunaca Joabpac huauqui Asael, Belén pueblomanta Dodopac churi Elhanan,

²⁷ haroritapuramanta Samot, pelonitapuramanta Heles,

²⁸ Tecoa pueblomanta Iquespac churi Era, Anatot pueblomanta Abiezer,

²⁹ Husa pueblomanta Sibecai, ahohitapuramanta Ilai,

³⁰ Netofa pueblomanta Maharai, Netofa pueblomanta Baanapac churi Heled,

³¹ Benjaminpac huahua huahuacunapac Gabaa pueblomanta Ribaipac churi Itai, Piratón pueblomanta Benaía,

³² Gaas yacu ladomanta Hurai, Arabá pueblomanta Abiel,

³³ barhumitapuramanta Azmavet, Saalbín pueblomanta Eliaba,

³⁴ gizonitapuramanta Hasempac churicuna, araritapuramanta Sagepac churi Jonatán,

³⁵ hararitapurallamantatac Sacarpac churi Ahiam, Urpac churi Elifalmi carca.

³⁶ Shinallatac mequeratitapuramanta Hefer, pelonitapuramanta Ahías,

³⁷ Carmel pueblomanta Hezro, Ezbaipac churi Naarai,

³⁸ Natanpac huauqui Joel, Hagraipac churi Mibhar,

³⁹ amonitapuramanta Selec, Beerot pueblomanta Naharai, Sarvia huarmipac cari huahua Joabpac escudota apac,

⁴⁰ Jatir pueblomanta Ira, Garebpishmi carca.

⁴¹ Heteopuramanta Urías, Ahlaipac churi Zabad,

⁴² Rubenpac huahua huahuacunapuramanta Sizapac churi Anidapishmi carca. Paica rubenitapuracunata mandacmi carca. Paihuanca quimsa chungami carca.

⁴³ Maacapac churi Hanán, mitnitapuramanta Josafat,

⁴⁴ Astarot pueblomanta Uzías, Aroer pueblomanta Hotampac churicuna Sama, Jeielpishmi carca.

⁴⁵ Simripac churi Jediael, paipac huauqui Johapishmi carca.

⁴⁶ Mahavitapuramanta Eliel, Elnaampac churicuna Jeribai, Josaviapishmi carca. Moabitapuramanta Itma,

⁴⁷ mesobaitapuramanta Eliel, Obed, Jaasielpishmi carca.