1 CRÓNICAS 10 - Dios Rimashcata Quillcashcami

Saulpish, paipac churicunapish huañushcamanta

¹ Filisteocuna israelcunahuan macanacushpa aticpimi, israelcunaca filisteocunapac ñaupamanta miticushpa callparca. Chashna rishpami Gilboa urcupi huañurcacuna.

² Filisteocunaca huashallata catishpa rishpami, Saulpac churicuna Jonatanta, Abinadabta, Malquisuata huañuchirca. Paicunaca Saulpac churicunami carca.

³ Shinami Saulta yallita llaquichishpa, arcota shitaccunaca Saulpi arcota shitashpa chugrichirca.

⁴ Chaimantami Saulca escudota apac runataca: «Cambac espadata llucchishpa, ñucapac huicsapi sati. Mana circuncisionta ruhuashca gentecuna shamushpa, ñucata burlachunca mana munanichu» nirca. Shina nicpipish, escudota apac runaca yallita manchashpami, mana huañuchirca. Chaimantami Saulca paipac espadata llucchishpa, paillatac tucsirishpa huañurca.

⁵ Saúl chashna huañucpimi, escudota apacca runapish shinallatac espadahuan satirishpa huañurca.

⁶ Chashnami Saulpish, paipac quimsa churicunapish, paihuan cac tucui familiapish paihuan pacta huañurca.

⁷ Saulpish, paipac quimsa churicunapish huañushcata ricushpami, pugru pambapi causac israelcunaca paicunapac pueblocunata shitashpa miticushpa rircacuna. Chaipimi filisteocuna chaiman rishpa, chaipi causarcacuna.

⁸ Cayandi punzha filisteocuna huañushcacunapac churanacunata llucchichingapac rishpami Saulpish, paipac quimsa churicunapish Gilboa urcupi huañushcata tarircacuna.

⁹ Churanacunata llucchichishpa, Saulpac umata pitishpa, paipac macanacunata apashpami filisteocunaca paicunapac yanga dioscunamanpish, chaipi causaccunamanpish tucui llactacunapi huillachun cacharca.

¹⁰ Chai quipami Saulpac macanacunataca paicunapac dioscunapac huasipi churashpa, Saulpac umataca Dagón diospac huasipi huarcurca.

¹¹ Filisteocuna Saulta chashna ruhuashcata Galaad llacta Jabes pueblopi causaccuna uyashpami,

¹² tucui sinchi runacuna jatarishpa Saulpac, paipac churicunapac cuerpotapish Jabes puebloman aparcacuna. Chaiman apashpami, chai tullucunataca chai pueblopi tiyac encina yura ucupi enterrarca. Chai quipaca canchis punzhatami ayunarcacuna.

¹³ Saulca Mandac Diosta mana cazushpa, Mandac Dios mandashca shimicunatapish mana cazushpa, huañushcacunata mañaccunata tapugrishcamantami chashna huañurca.

¹⁴ Saulca Mandac Diosman tapunapac randica chashnami ruhuarca. Chaimantami paipac causaita quichushpa, paipac mandana llactataca Isaipac churi Davidman curca.