1 CORINTIOS 7 - Dios Rimashcata Quillcashcami

Cazarashcacuna ima shina causanamanta

¹ Cunanca cancuna quillcashpa, tapushcatami huillagrini. Mana cazarashpa causanaca allimi canman.

² Shina cacpipish, huainayana yalli tiyashcamantaca, caripish quiquin huarmita, huarmipish quiquin cusata charinami can.

³ Cusapish quiquin huarmipi chayarinami can, huarmipish quiquin cusa chayarichun saquinami can.

⁴ Huarmipac cuerpoca cusapacmi. Cusapac cuerpoca huarmipacmi.

⁵ Chaimanta caishucpish, chaishucpish ama misarinacuichicchu. Shina cashpapish Diosta tucui shunguhuan mañangapacca, ishcaindita yuyarinacushpami, asha punzhacunacaman chayarinataca saquina canguichic. Chai quipaca Satanás huainayana yuyaita ama cuchun tandaringuichiclla.

⁶ Caita nishpaca yuyaita cunillami, ashtahuanpish mana mandanichu.

⁷ Ñucaca tucui caricuna ñuca shina causachunmi munani. Shina cacpipish, Diosca mana tucuimanchu chai poderta cushca, ashtahuanpish shucmanca shuctaclaya, caishucmanca shuctaclaya yuyaitami cushca.

⁸ Mosocunapish, viudacunapish ñuca shina mana cazarashpa causanaca allimi canman ninimi.

⁹ Shina cacpipish, mana jarcari pudishpaca cazarachunlla. Chai munailla purinapac randica, cazaranami ashtahuan alli.

¹⁰ Ña cazarashca huarmica cusata ama shitachun nishpami mandani. Caitaca mana ñucachu nini, ashtahuanpish Apunchic Jesusmi mandan.

¹¹ Cusata shitashpapish, ama shuc-huan cazarachun, mana cashpaca cusallahuantac alli tucuchun, cusapish huarmitaca ama shitachun ninimi.

¹² Caishuccunamanta nishpaca, mana Apunchic Jesuschu nin, ashtahuanpish ñucami nini: Maijan huauquipac huarmi mana cric cashpapish, paihuan alli cacpica ama shitachun.

¹³ Shinallatac maijan panipac cusa mana cric cashpapish, paihuan alli cacpica, ama shitachun.

¹⁴ Cusaca huarmi cric cashcamantami Diospaclla tucunga. Mana cric huarmipish, cusa cric cashcamantami Diospaclla tucunga. Mana shina cacpica, paicunapac huahuacunaca mana cricpac huahuacuna shinami canman. Paicunaca Diospaclla causaccunapurami tucushcacuna.

¹⁵ Ashtahuanpish cari cashpa, huarmi cashpa, mana cric cashcamanta shitasha nishpaca, shitachunlla. Chaica, cric huauquipish, cric panipish mana llaquilla causanachu can. Diosca ñucanchictaca cushilla causachunmi cayarca.

¹⁶ Can huarmi, ¿cambac cusata ima shina quishpichinata yachanguichu? ¿Can cusapish cambac huarmita ima shina quishpichinata yachanguichu?

¹⁷ Ashtahuanpish Apunchic Jesucristo cancunaman imata ruhuachun yuyaita cushca shina, Dios cancunata acllai punzha ima shinami carcanguichic, chai shinallatac causanguichic. Tandanacushca criccunataca maipipish chai shinallatacmi mandani.

¹⁸ Maijanpish Dios cayacpica, circuncisionta ruhuashca cashpapish, circuncisionta ama pacachun. Cutin mana circuncisionta ruhuashca cashpapish, Dios cayacpica, ama circuncisionta ruhuachun.

¹⁹ Diosmanca circuncisionta ruhuashcapish, mana ruhuashcapish mana ima canchu, ashtahuanpish pai mandashcacunata cazuchunmi munan.

²⁰ Dios cayacpi ima shinami carcanguichic, chai shinallatac caichiclla.

²¹ Can servic cashpapish, canta Dios acllacpica, ama llaquiringuichu. Ima punzha servinata saquinalla cacpica saquinguillami.

²² Maijan servic cashpapish, Apunchic Jesusta crishpaca, ña mana servicchu can, ashtahuanpish cunanca Apunchic Jesusta servicmi. Maijan mana servic cashpapish, cunanca Apunchic Jesusta servicmi.

²³ Diosca tucuimanta yalli valic-huanmi, cancunataca paita servichun randirca. Chaimanta runacunallata servishpa ama huatashca shina causaichicchu.

²⁴ Cuyashca criccuna, Dios cancunata acllacpi, ima shinami carcanguichic, chai shinallatac paipac ñaupapica paita caticunguichiclla.

²⁵ Carihuan manarac chayarishca solteracunata yachachingapacca, Apunchic Jesús mandashcataca mana charinichu. Shina cashpapish Apunchic Jesús cuyashcamantami, ñuca yuyaimanta caitaca chashna nini. Chaitaca tucui shunguhuan uyaichicyari:

²⁶ Llaqui punzhacunapi causacushcamantaca manarac cazarashcacunaca chashnallatac catichun.

²⁷ Cazarashca cashpaca, ama huarmita shitaichu. Mana cazarashca cashpaca ama cazarachun.

²⁸ Cazaranapish mana juchachu. Shinallatac soltera cazarashpapish mana juchallinchu. Shina cacpipish, cazaraccunaca llaquitami cai pachapi apancuna. Chai llaquicunata charichunca, ñucaca mana munanichu.

²⁹ Cuyashca criccuna, ñucaca caitami nisha nini: Cai pachapica mana unai huatacunatachu causashun. Chaimanta huarmiyuc caricunaca, mana huarmiyuc cashca shina causachun.

³⁰ Huacaccunaca, mana llaquilla cashca shina cachun. Cushilla caccuna, mana cushilla shina cachun. Ima randishpapish mana randishca shina cachun.

³¹ Cai pachapi ima tiyashcahuan cushicuccunaca ama cushicuchun. Cai pachapi ima tiyashcacunaca chingaringallami.

³² Cancuna llaquilla causachunca mana munanichu. Mosoca Apunchic Jesusta servishpa, paillata cushichinatami munan.

³³ Ashtahuanpish cazarashca runaca huarmita cushichingapacmi, cai pachapi ima tiyashcallata yuyashpa causan.

³⁴ Chashnami paicunaca ishcailayata yuyan. Solteraca Apunchic Jesusta servingapacmi cuerpopipish, espiritupipish Diospaclla canata munan. Ashtahuanpish cazarashca huarmica cusata cushichingapacmi, cai pachapi ima tiyashcallata yuyashpa causan.

³⁵ Caicunata mana cancunata jarcangapac, ashtahuanpish cancunapac allipacmi nini. Tucui shunguhuan Apunchic Jesusta servishpa, ima shina causana cashca shina causachun chashnaca nini.

³⁶ Maijanpish paipac ushi cazarana tiyashca jahua, unai huatacunata mana cazarashpa causana mana alli cacpica, cazarachichunlla. Cazaranaca mana juchachu.

³⁷ Shina cashpapish maijan soltera paipac shungupi munashca shina, mana cazaranaca allimi nishpa yuyashpaca allitami ruhuan.

³⁸ Shinashpaca maijanpish paipac ushita cazarachishpaca, allitami ruhuan. Mana cazarachishpapish, ashtahuanmi allita ruhuan.

³⁹ Cusayuc huarmica cusa causacucpica, mandashcapi nishca shinaca maita mana chicanyaipacmi, ashtahuanpish cusa huañucpica, Apunchic Jesusta cric-huanca pihuanpish cazaranallami.

⁴⁰ Chashna cacpipish ñuca yuyaipica mana cutin cazarashpami, ashtahuan cushi causanman yuyanimi. Caitaca Diospac Espíritu ñucamanpish yuyaita cushcamantami nicuni.