1 CORINTIOS 5 - Dios Rimashcata Quillcashcami

Huaclliriccunata taripanamanta

¹ Cancunapuramanta maijanca lamamahuan shina, quiquin huarmihuan causacuctami yachac chayarcani. Chai shina millai juchataca Diosta mana ricsiccunapish mana ruhuanchu.

² ¿Chashna cashca jahuachu jatun tucunguichic? ¡Chaipac randica, llaquirishpami chai huacllirictaca cancunapuramanta llucchishpa cachana canguichic!

³ Ñuca mana cancunahuan cashpapish, ñuca yuyaipica cancunahuanmi cani. Chaimantami ñucapish chai ruhuactaca juchanchishpa mana allichu nini.

⁴ Cancuna tucui tandanacushca cacpica, ñuca yuyaipish, Apunchic Jesucristopac poderpish cancunahuanmi canga.

⁵ Chaimanta chai huacllirishca runataca paipac aicha llaquichishca cachun, Satanaspac maquipi churaichic. Apunchic Jesús cutimui punzhapi chai runapac espirituta quishpichichunmi, chashnaca ruhuana canguichic.

⁶ Chashna mana allicuna tiyashca jahuaca, mana allichu jatun tucunaca. ¿Manachu ashalla levadura tucui chaputa punguillichic cashcataca yachanguichic?

⁷ Pascua punzhapi levadura illac, cunanlla ruhuashca tanda shina cangapacca, mana alli levadurataca shitanami, canguichic. Chashna cachunmi, Pascua punzhapi Diosman cushpa, pactalla ovejata huañuchishca shina Apunchic Jesucristoca ñucanchicmanta huañurca.

⁸ Chashnami levadura illac tandata micuc shina, imatapish cashcata ruhuashpa, Pascua punzhapi micunataca micuna canchic. Ashtahuanpish mana alli levadurahuan ruhuashca tandata micuc shina, millai yuyaihuan juchallishpa purinachu canchic.

⁹ Utcamanmi maijanpish huaclliriccunahuanca ama tandanacunguichicchu nishpa quillcarcani.

¹⁰ Chai shina nishpaca, tucui cai pachapi causac huaclliriccunahuan, imatapish charinallata munaccunahuan, shuhuaccunahuan shinallatac ruhuashcalla dioscunata adoraccunahuan amatac tandaringuichicchu nishpaca, mana nisha nircanichu. Paicunahuan mana tandarinacuna cacpica, cai pachamanta llucshinami cancunamanca alli canman.

¹¹ Ashtahuanpish chashna nishpaca, cric cashca jahua huaclliriccunahuan, imatapish charinallata munaccunahuan, imapish tucushca canman niccunahuan, ruhuashcalla dioscunata adoraccunahuan, llullaccunahuan, machaccunahuan, shuhuaccunahuan amatac tandaringuichicchu nisha nircanimi. Chashna gentecunahuanca micungapacllapish ama tiyaringuichicchu ninimi.

¹² Mana criccunataca ñucaca mana juchanchinachu cani. Ashtahuanpish criccunapurapi caccunataca cancunami taripana canguichic

¹³ Mana criccunataca Diosmi taripashpa juchanchinga. Cancunapuramanta chai mana allita ruhuactaca anchuchichic.