1 CORINTIOS 4 - Dios Rimashcata Quillcashcami

Apostolcuna imata ruhuashcamanta

¹ Chaimanta ñucanchictaca Cristota serviccuna, Diosmanta pipish mana yachashcata yachachichun churashcata yuyachun.

² Maijanta yachachichun churacpica pactachic cashcatami ricuchina can.

³ Cancuna juchanchinatapish, juezcuna juchanchinatapish mana manchanichu. ¡Ñucapish alli cashcata, mana alli cashcata mana ninichu!

⁴ Ñuca yuyaipipish ima mana allita ruhuashcata mana yuyanichu. Shina cashpapish, “jucha illacmi cani” mana ninichu. Ñucataca Apunchic Jesucristomi taripanga.

⁵ Shina cacpica manarac juchanchina punzha chayamucpi, ama juchanchichicchu. Apunchic Jesús cutimunata shuyaichic. Paimi amsapi pacashcacunatapish, shungu imata yuyashcatapish achicpi shina ricuchinga. Shina ruhuacpimi, Diosca cada quiquin imata ruhuashcata ricushpa alli ninga.

⁶ Cuyashca criccuna, Apolostapish ñucatapish ricushpa yachacuichic. Cancunapac allipacmi chashna rimani. Chashna yachacushpami, quillcashcapi nishcallata ruhuanguichic ninguichic. Shinallatac paimi alli, caishucca mana allichu nishpa, mana rimanguichic.

⁷ ¿Pitac cantaca shuccunamanta yallita ruhuarca? ¿Imatatac Diosmantaca mana chasquircangui? Chashna tucuita chasquishpaca, ¿ima nishpatac Diosmanta mana chasquishca shina jatun tucungui?

⁸ Ña tucuita charishpaca, chayuccunami canguichic. Chaimantami mana ñucahuan cashpapish, jatun mandaccuna canguichic. ¡Mandaccunata cashpaca, allimari canguichicman! ¡Ñucapish cancunahuan mandaimanmi!

⁹ Chaica, ñucaca apostolcunataca huañuchingapac chicanyachishpa tucuipac huashapi Dios churashcatami yuyani. ¡Chaimantami cai pachapi causac tucui gentecunapacpish, angelcunapacpish asina tucushcanchic!

¹⁰ Ñucanchicca Cristota caticushcamantami imata mana yachac, upacuna tucushcanchic. Cutin cancunaca Cristohuan shuc shinalla tucushpaca yachaccunami tucushcanchic. Ñucanchicca irquiyashcami canchic, Cutin cancunaca sinchimi canguichic. Cancunaca tucuipac alli nishcami canguichic, ñucanchicca mana alli nishcami canchic.

¹¹ Cunancamanmi yarcaihuan, yacunayaihuan, huasi illaclla, churana illaclla, gentecuna macashca canchic.

¹² Ñucanchic quiquin maquihuan trabajashpami yallita shaicushcanchic. Ñucanchicta rimaccunataca Dios bendiciachun mañanchicmi. Llaquichicpipish, chai llaquita apanchicllami.

¹³ Ñucanchicta mana allita rimacpipish, cuyai shunguhuanmi cutichinchic. Cunancamanmi cai pachapica imapac mana valic, tucuipac millana mapa shina tucushcanchic.

¹⁴ Mana cancunata pingaichingapacchu caicunataca quillcanchic, ashtahuanpish ñuca cuyashca huahuacunata cunac shinami cashna rimani.

¹⁵ Cancunaca Cristomanta chunga huaranga yachachiccunata charishpapish, mana tauca taitacunatachu charinguichic. Alli huillaita ñuca huillacpi, cancuna Jesucristohuan shuc shinalla tucushcamantaca, ñucami cancunapac taita shina cani.

¹⁶ Chaimanta ñucata ricushpa yachacuchunmi mañani.

¹⁷ Chaimantami Apunchic Jesusta alli cric, ñuca cuyashca huahua shina Timoteota cachagrini. Paimi ñuca Apunchic Jesucristota crishpa, ima shina causanata yachachingui. Ñucapish chashnallatacmi tandanacushca criccunamanca maipipish yachachicuni.

¹⁸ Maijancunaca: “Pabloca mana ricungapac shamungachu” yuyashpami, jatun tucushpa puricunguichic.

¹⁹ Ashtahuanpish Apunchic Jesús munacpica, utcami cancunata ricungapac risha. Chaipimi chai jatun tucushcacuna mana shimillahuan nicushcata ashtahuanpish, imatapish ruhuac cashcata ricusha.

²⁰ Dios mandacucpi causanaca mana shimillahuan jatun tucunachu ashtahuanpish, imatapish ruhuac cashcatami ricuchina.

²¹ Ñuca cancunapacman shamushpaca, ¿llaquichingapac, mana cashpaca alli shunguhuan, cuyaihuan shamuchunchu munanguichic?