1 CORINTIOS 16 - Dios Rimashcata Quillcashcami

Criccunaman cullquita tandachishcamanta

¹ Criccunata ayudangapac ofrendata tandachishpaca, Galacia llacta criccunata yachachishca shina tandanguichic.

² Ñuca chayac rato mana tandacungapacca, cada semana callari punzhapimi, tucui mashna asha ofrendata tandachishpa charicuna canguichic.

³ Ñuca chayashpami, cancuna tandachishca cullquitapish, cartatapish cancuna acllashca criccunata Jerusalén pueblopi saquigrichun cachasha.

⁴ Ñucapish rina tucucpica, paicunahuan rishallami.

Maijan llactacunaman Pablo rinata yuyarishcamanta

⁵ Ñuca rishpaca Macedonia llactatami pasasha. Macedonia llactamantaca Corinto pueblomanmi chayasha.

⁶ Cancunapacman chayashpaca, asha punzhacunata, mana cashpaca tucui tamya quillacunata saquirishapishchari. Shina saquiricpica, ñuca maiman rina cashcaman richun ayudanguichic.

⁷ Cunanca mana ashata ricushpalla pasasha ninichu. Apunchic Jesús munacpica, unaicamanmi cancunahuan saquirisha nini.

⁸ Chaica, Pentecostés fiesta punzhacuna chayangacamanmi, cai Efeso pueblopi cagrini.

⁹ Taucacuna piñacucpipish, Jesucristomanta ñuca huillachunca, pungu pascashca shinami can.

¹⁰ Timoteo chayacpica, cushilla cancunahuan cachun sumacta chasquinguichic. Paica ñuca shinami Apunchic Jesucristopacta ruhuac can.

¹¹ Chaimanta cancunapuramanta maijan ama paita yangapi churachun. Chaipac randica, pai ñucata cushilla ricungapac shamuchun ayudanguichic. Ñucaca caishuc criccunahuanmi shuyacuni.

¹² Huauqui Apolostaca criccunahuan cancunata ricugrichunmi yallita mañarcani. Shina mañacpipish, cai punzhacunaca mana risha nircachu. Shina cashpapish, pai rina tucucpimi ringa.

Tucuchingapac saludashcamanta

¹³ Tucui shunguhuan crishpa, mana manchashpa, alli sinchiyashpa chaparacuichic.

¹⁴ Shinallatac tucuita ruhuashpapish, cuyaihuan ruhuaichic.

¹⁵ Cuyashca criccuna, Acaya llactapica Estéfanas paipac familiandi punta cric tucushcataca cancunallatac yachanguichicmi. Paicunami criccunata tucui shunguhuan ayudacuncuna.

¹⁶ Chaimantami paicuna shina ayudaccunatapish, shuctac ayudaccunatapish, tucui serviccunatapish cazuchun mañani.

¹⁷ Estefanaspish, Fortunatopish, Acaicopish shamushcamantami ñucaca yallita cushicuni. Chaica, paicunami cancunapac randi ñucata ayudarca.

¹⁸ Paicunami cancunata cushichic shina, ñucatapish cushichirca. Chashna gentecunataca pagui nicunallami canchic.

¹⁹ Asia llacta criccunapish saludancuna. Aquilapish, Priscilapish, paicunapac huasipi tandanacuc criccunapish Apunchic Jesuspac shutipi saludancunami.

²⁰ Tucui criccunami saludancuna. Chuya shunguhuan muchashpa, caishuc chaishuc saludanacuichic.

²¹ Ñuca Pablomi, quiquin maquihuan quillcashpa, saludashpa cachani.

²² Maijanpish Apunchic Jesusta mana cuyactaca, llaquichishca cachun. ¡Ñucanchic Apunchic Jesús, shamuilla!

²³ Apunchic Jesucristopac cuyai tucui cancunahuan cachun.

²⁴ Apunchic Jesucristomantami tucui cancunata cuyacuni.