1 CORINTIOS 15 - Dios Rimashcata Quillcashcami

Jesucristo causarishcamanta

¹ Cuyashca criccuna, ñuca alli huillaita huillashcata yuyarichunmi munani. Chai huillaita chasquishpami, mana saquishpa catiracunguichic.

² Ñuca huillashca shina, alli huillaita catirashpaca quishpiringuichicmi. Mana chai shina catishpaca, cancuna crishcaca yangami canga.

³ Puntaca ñuca ima shina chasquishca shinami, cancunamanca yachachircani. Dios quillcachishcapi nishca shinami, Cristoca ñucanchic juchacunamanta huañurca.

⁴ Shinallatac Dios quillcachishcapi nishca shinami, enterrashca cashpapish, quimsa punzhapica causarirca.

⁵ Chashna causarishpaca, Cefasmanmi ricurirca. Quipaca chunga ishcai yachacuccunamanmi ricurirca.

⁶ Chai quipaca pichca patsac yalli criccunamanmi ricurirca. Chaita ricuccunapuramantaca achcacunami causacuncunarac. Cutin maijancunaca ña huañushcacunami.

⁷ Chaimantaca Santiagomanmi ricurirca. Shinallatac chai quipaca tucui apostolcunamanmi ricurirca.

⁸ Tucuiman ricurishca quipaca, shullushca shina huacharishca ñucamanmi ricurirca.

⁹ Ñucaca Diospaclla cac tandanacushca criccunata mana ricunayachishpami yallita llaquichircani. Chaimanta tucui apostolcunamanta yalli yangallami cani. Shinallatac mana apóstol nishcapish cana canichu.

¹⁰ Shina cacpipish Dios cuyashcallamantami cashna cani. Pai ñucata cuyashcaca mana yangachu cashca. Chaica tucui paicunata atishpami, ñucaca Diospacta ruhuacuni. Shina cashpapish mana ñucachu ruhuashcani, ashtahuanpish ñucapi tiyac Diospac cuyaimi ayudashpa ruhuachishca.

¹¹ Ñuca cashpa, paicuna cashpapish chashnami huillashcanchic. Chai huillashcatami cancunaca crircanguichic.

Huañushcacuna causarinamanta

¹² Cristoca huañushcacunapuramanta causarircami nishpa huillacushca jahua, ¿ima nishpatac cancunapuramanta maijancunaca «huañushcacunaca mana causaringachu» ninguichic?

¹³ Huañushcacuna mana causarina cacpica, Cristopish manachari causarirca.

¹⁴ Cristo mana causarishca cacpica, ñucanchic huillashcapish, cancuna crishcapish yangami canman.

¹⁵ Cristo mana causarishca cacpica, ñucanchic: “Diosmi Cristota causachirca” nishpa huillacushpaca, Diosmanta llullashpa huillaccunami canchicman. Huañushcacuna mana causarina cacpica, Cristopish mana causarinmanchu carca.

¹⁶ Huañushcacuna mana causarina cacpica, Cristopish manachari causarirca.

¹⁷ Cristo mana causarishca cacpica, cancuna crishcaca yangallami canman, shinallatac juchallapitacmi causacunguichicman.

¹⁸ Cristota crishpa, huañushcacunapish huiñaita chingarishcami canman.

¹⁹ Cai causaipaclla Cristopi shunguta churashca cashpaca, tucui gentecunamanta yalli llaquillami canchicman.

²⁰ Ashtahuanpish Cristo huañushcacunapuramanta causarishpaca, (criccunapac causarina callari shinami tucurca.)

²¹ Chaica, huañuica shuc runallamantami cai pachapica callarirca. Chashnallatac shuc runallamantami huañushcacunapuramanta causarinapish callarirca.

²² Ima shinami Adanpac juchamantaca tucui gentecuna huañuna can, chashnallatacmi Cristota crishcamantaca tucui gentecuna causaita charinga.

²³ Ima shina causarina cashca shinami, ñaupaca Cristorac causarirca. Quipaca, Cristota criccunami pai cutimui punzhapi causaringa.

²⁴ Cristo tucui mandaccunatapish, jatun mandaccunatapish, poderta charic mandaccunatapish chingachishpa, pai mandacushcata Diosman cucpimi, cai pachaca tucuringa.

²⁵ Cristoca paita piñaccunata paipac chaqui sarunapi Dios churangacamanmi, paillatac mandana can.

²⁶ Tucuipac quipaca, Cristoca huañuitami atinga.

²⁷ Chaica, Diosmi Cristopac chaqui sarunapi tucuita churarca. Chashna Dios tucuita mandachun churashpaca, mana paipish mandashca canatachu nisha nin. Chaica paimi tucuita Cristopac chaqui sarunapi churarca.

²⁸ Tucuita cazuchishca quipaca, Diospac Churi cristollatacmi tucuita cazuchic Diospac ñaupapi cazuringa. Chashnami Diosca tucuita cazuchic cashcata ricuchinga.

²⁹ Huañushcacuna mana causarina cacpica, ¿imapactac huañushcacunapac shutipi bautizarincuna? ¿imamantatac huañushcacunamanta bautizarincuna?

³⁰ ¿Imamantatac ñucanchicpish tutapish punzhapish huañunalla puricunchic?

³¹ Cuyashca criccuna, ñucaca tucui punzhacuna huañunalla cashpapish, cancuna Apunchic Jesucristota criccuna cashcamantami mai cushicuni.

³² Huañushcacuna mana causarina cacpica, ñuca gentecuna shina Efeso pueblopi macanacushcaca, ¿imapactac valishca? Chaipac randica shuccunapac ninamantaca: «¡Cunanca micushunchic, ubiashunchic, cayaca ña huañushunmi!» nimanmi.

³³ Ama pandarichicchu. Maijancunaca: «Mana alli gentecunahuan tandarishpami, alli causaitaca saquincuna» ninmi.

³⁴ Cancunapuramanta maijanca manarac Diosta ricsinchu. Chaimanta alli yuyaiman causaichic, ama juchata ruhuaichicchu. Caicuna pingachunmi chashnaca nini.

Huañushcacuna ima shina causarinamanta

³⁵ Maijancunaca: «¿Huañushcacunaca ima shinatac causaringa? ¿Imalaya cuerpohuantac ricuringa?» ningacunachari.

³⁶ ¡Yuyai illac! Muyuta tarpucpica, muyuca ismunmi. Quipatami shuc huiñan.

³⁷ Imata tarpushpaca, mana yuratachu tarpun, ashtahuanpish trigotapish, ima shuctac granotapish muyullatami tarpun.

³⁸ Diosmi pai munashca shina chai muyutaca huiñachin. Cada muyumi quiquin yurata charin.

³⁹ Mana tucui cuerpochu chai shinallatac. Gentecunaca shuctaclaya, animalcunaca shuctaclaya, volashpa puric alasyuc animalcunaca shuctaclaya, yacupi tiyac animalcunaca shuctaclaya cuerpomi can.

⁴⁰ Shinallatacmi jahua cielopi achicyachicpish, cai allpa pachapi tiyacpish, chicanlaya can. Jahua cielopi cac achicyachicca chaipi sumac cashcatami ricuchin. Cai allpa pachapi tiyashcaca caipi sumac cashcatami ricuchin.

⁴¹ Intica mana quilla shina, mana lucerocuna shinachu achicyachin. Lucerocunapuramantapish shuctac shuctaclayatami achicyachin.

⁴² Chai shinallatacmi huañushcacunapish causaringa. Ismuclla cuerpohuan enterrarishpaca, mana ismuclla cuerpohuanmi causaringa.

⁴³ Millana cuerpohuan enterrarishpaca sumacyachishca cuerpohuanmi causaringa. Irquiyashca cuerpohuan enterrarishpaca sinchi cuerpohuanmi causaringa.

⁴⁴ Aicha cuerpo enterrarishpaca, Diospaclla cangapacmi causaringa. Aicha cuerpopish, Diospaclla cuerpopish tiyanmi.

⁴⁵ Dios quillcachishcapica: «Diosca punta Adantaca causaiyuctami ruhuarca» ninmi. Cutin quipa Adantaca causachic Espirituyuctami Diosca ruhuarca.

⁴⁶ Shina cacpipish, causachic Espirituyucca mana punta shamurcachu, ashtahuanpish aichayucmi puntaca shamurca. Chai quipami causaichic Espirituyucca shamurca.

⁴⁷ Punta ruhuashca Adanca allpamantami carca. Quipa Adanmi, jahua pachamanta shamushca carca.

⁴⁸ Cai pachapi causaccunaca, allpamanta ruhuashca runa shinami. Jahua pachamanta caccunaca, jahua pachamanta shamushca Runa shinami.

⁴⁹ Ima shinami allpamanta ruhuashca runaman riccha canchic, chai shinami jahua pachamanta shamushca Runa shinapish cashun.

⁵⁰ Cuyashca criccuna, caitami nisha nini: Aichayuc, tulluyuc runaca mana Dios mandacucpi yaicungachu. Ismucllaca, huiñaita tiyac llactamanca mana yaicungachu.

⁵¹ Dios manarac piman yachachishcatami ricsichisha nini. Mana tucuichu huañushun. Shina cashpapish, tucuimi shuctacyachishca cashun.

⁵² Shuc rato ñahuita quimllai shinallapimi, tucuri trompeta tocashpa uyaricpica, shuctacyachishca cashun. Trompeta uyaricpica, huañushcacunaca mana cutin huañungapacmi causaringa. Ñucanchicca shuctacyachishcami cashun.

⁵³ Ismuclla cuerpoca mana ismuclla cuerpomi tucunga. Huañunalla cuerpoca mana huañuna cuerpomi tucunga.

⁵⁴ Cai ismuclla cuerpo mana ismuclla cuerpo tucucpi, huañunalla cuerpo mana huañuna cuerpo tucucpica, Dios quillcachishcapi nishcami pactanga. Chaipica: «Huañuitaca atishpa chingachishcami.

⁵⁵ Huañui, ¿maipitac cambac poderca? ¿Maipitac nanachishpa, huañuchicca?» ninmi.

⁵⁶ Nanachishpa huañuchicca juchami. Mandashcacuna tiyashcamantami juchaca poderta charin.

⁵⁷ Ashtahuanpish ñucanchic Apunchic Jesucristomantami atishcanchic. Chaimantami Diosta pagui nicunalla canchic.

⁵⁸ Chaimanta cuyashca criccuna, pi ama urmachichun, Apunchic Jesusta tucui shunguhuan crishpa catiraichic. Apunchic Jesuspac ruhuaitaca punzhanta ruhuacuichiclla. Apunchic Jesus-huan cancuna imata ruhuashcaca mana yangachu canga.