1 CORINTIOS 14 - Dios Rimashcata Quillcashcami

Mana yachashca rimaicunata rimanamanta

¹ Tucuimanta yallica, cuyaita charinata munaichic. Shinallatac Diospac Espíritu imata ruhuachichun munaichic. Yallicarin Dios ima nishcata huillac canata munaichic.

² Maijanpish mana yachashca rimaicunata rimacca mana gentecunamanchu riman, ashtahuanpish Diosmanmi riman. Diospac Espíritu rimachicpimi, chaitaca pi mana entendin.

³ Dios ima nishcata huillacca criccunata sinchiyachingapac, cunangapac, cushichingapacmi riman.

⁴ Mana yachashca rimaita rimacca paipac allipacllatami riman, ashtahuanpish Dios ima nishcata huillacca tandanacushca criccuna sinchi cric cachunmi huillan.

⁵ Ñucaca tucui cancuna mana yachashca rimaicunata rimac cachunmi munaiman. Shina cacpipish, Dios ima nishcata huillaccuna cachunmi, ashtahuanca munani. Chashna cashpami, jaicapi mana yachashca rimaicunata rimacta atishpa, ashtahuan alli canguichic. Chai mana yachashca rimaicunata tandanacushca criccunaman entendichishpallami criccunapac allipac riman.

⁶ Cuyashca criccuna, ñuca cancunapacman rishpa, Dios ima nishcata huillanapac randi, allita yachachinapac randi, cashcata yachachinapac randi, yachachishcacunata yachachinapac randica, mana yachashca rimaicunata ñuca rimacucpica, cancunamanca ¿ima allitac cangayari?

⁷ Flautapish, arpapish chai shinallatac huacacpica, imapi tocacushcapish mana yacharinmanchu.

⁸ Corneta macanacuiman cayana tonopi mana uyaricpica, ¿pitac macanacungapac allichiringayari?

⁹ Chashnallatac cancuna mana entendinalla rimaita rimacpica, ¿pitac cancuna rimashcataca entendingayari? Chashna rimashpaca, yangallami rimanguichicman.

¹⁰ Cai pachapica achca rimaicunami tiyan. Chashna cacpipish, chai rimaita rimaccunapurallami entendincuna.

¹¹ Shuctac rimaita mana entendishpaca, chai rimaita rimacmanca caru llactamanta shinami cani, shinallatac chai rimaita rimacpish ñucamanca carumanta shinami.

¹² Diospac Espíritu imata ruhuachichun munashpaca, tandanacushca criccunata sinchiyachingapacmi imatapish ruhuanata munana canguichic.

¹³ Chaimanta mana yachashca rimaita rimacca, chai rimashcata entendingapac Diosta mañaichic.

¹⁴ Mana yachashca rimaipi Diosta mañashpaca, ñuca espirituhuan mañacuni. Shina cacpipish ñuca yuyaipica, imata mana entendinichu.

¹⁵ Shinashpaca, ¿imatatac ruhuasha? Espirituhuanpish, yuyaihuanpishmi mañasha. Shinallatac espirituhuanpish, yuyaihuanpishmi cantasha.

¹⁶ Can espiritullahuan Diosta pagui nicpica, ¿ima shinatac shuc manarac yachac runaca entendingayari? Chashna can Diosta pagui nicucpica, ¿ima shinatac «Chashna cachun» ningayari?

¹⁷ Can Diosta allita mañashpa, pagui nicpipish, caishuc criccunaca mana entendishcachu.

¹⁸ Tucui cancunata atishpa, mana yachashca rimaicunata rimac cashcamantaca, Diostami pagui nini.

¹⁹ Shina cashpapish, tandanacushca criccunapurapica chunga huaranga mana yachashca rimaita rimanapac randica, entendinalla pichca rimaitami, yachachingapac rimasha nini.

²⁰ Cuyashca criccuna, ama huahuacuna shina yuyaichicchu. Ashtahuanpish mana allita ruhuangapac llullu huahuacuna shina yuyaichic. Allita yuyaringapacca, yuyaccuna shina caichic.

²¹ Mandac Dios quillcachishcaca: «Cai llactapi causaccunamanca mana yachashca rimaicunahuan, shuctac llacta rimaicunahuanmi rimachisha. Chashna rimacpipish, manatac cazungacunachu» ninmi.

²² (Chaica, mana yachashca rimaicunaca criccunapac señal canapac randica, mana criccunapacmi señal. Ashtahuanpish Dios ima nishcata huillashcaca mana criccunapac señal canapac randica, criccunapacmi señal can.)

²³ Criccuna tandanacushpa, mana yachashca rimaicunata rimanacucucpi, maijan manarac yachac, mana cashpaca manarac cric yaicushpaca, ¿manachu “caicunaca yuyai illac” ninga?

²⁴ Ashtahuanpish Dios ima nishcata tucui huillacucpi, shuc manarac yachac, mana cashpaca manarac cric yaicushpaca, paillatacmi tucui ima nicushcata uyashpa, juchayuc cashcata yuyarishpa llaquiringa.

²⁵ Shinallatac paipac shungupi tucui ima yuyacushcatapish mana pacashpa huillangami. Chashnami Dios cancunahuan cashcata yachashpa, cumurishpa, Diosta “allimari cangui” ninga.

Imatapish cashcata ruhuanamanta

²⁶ Chai shina cacpica, cuyashca criccuna, cancuna tandanacushpaca, shuccunaca salmocunata cantanguichicmi, shuccunaca yachachinguichicmi, shuccunaca Dios ima nishcata huillanguichicmi, shuccunaca mana yachashca rimaicunata rimanguichicmi, shuccunaca chai rimashcata entendichinguichicmi. Tucui caicunataca criccuna ashtahuan Jesusta catishpa sinchiyachunmi, ruhuana canguichic.

²⁷ Mana yachashca rimaita maijan rimashpaca, ishcai cashpa, mana cashpaca quimsa cashpa shuyanacushpa rimaichic. Shucca chai rimashcata entendichichun.

²⁸ Ashtahuanpish tandanacushca criccunapurapi mana yachashca rimaita pi mana entendichic tiyacpica, ama rimachun. Chaitaca, paillaman, Diosllaman rimachun.

²⁹ Shinallatac Dios ima nishcata huillaccuna tiyashpaca, ishcai cashpa, quimsa cashpa huillachun. Shuccunaca chai huillashca alli cashcata, mana alli cashcata huillachun.

³⁰ Maijan chaipi tiyacucman Dios imata ricuchicpica, chai puntaman huillacca upallachun.

³¹ Tucui mashna yachacushpa, alli yuyaita japichunca, tucui cancunami Dios ima nishcataca shuyanacushpa huillana canguichic.

³² Dios ima nishcata huillaccunaca, Dios ima nishcata huillaccuna shinami yuyan.

³³ Chaica, Diosca mana maipish cachun causachun munanchu. Ashtahuanpish sumac causaita cuc Diosmi. Diospaclla cac tandanacushca criccuna imata ruhuac cashca shinami,

³⁴ huarmicunaca criccunapac tandanacuipica upallami cana can. Mana rimanachu can. Moisés mandashcacunapi nishca shinami, huarmicunaca cazuna can.

³⁵ Criccunapac tandanacuipi huarmicuna rimana mana alli cashcamantaca, imata yachasha nishpaca, huasipi paipac cusaman tapuchun.

³⁶ Dios rimashcaca mana cancunapurapichu callarishca, shinallatac mana cancunallamanchu chayamushca. Chaitaca cancunallatac alli yuyarichic.

³⁷ Maijanpish “Dios ima nishcata huillacmi cani” nicca, mana cashpaca “Diospac Espirituhuanmi cani” nicca, cai ñuca quillcashcaca Apunchic Jesús mandashca cashcata yachachun.

³⁸ Ashtahuanpish cai mandashcata mana allichu nicpica, paitapish ama chasquinguichic.

³⁹ Shinashpaca cuyashca criccuna, Dios ima nishcata huillanata munaichic. Ama, mana yachashca rimaicunata rimanata jarcaichicchu.

⁴⁰ Ashtahuanpish imata ruhuashpapish, allita ruhuaichic. Ama maipish cachun ruhuaichicchu.