1 CORINTIOS 13 - Dios Rimashcata Quillcashcami

Cuyaimanta

¹ Gentecunapac rimaitapish, angelcunapac rimaitapish ñuca rimashpapish, cuyaita mana charishpaca, chilin nic fierro, chilin nic platillo shinallami uyarini.

² Dios ima nishcata huillacushpapish, tucuita yachashpapish, Diosmanta pipish mana yachashcata yachashpapish, shinallatac urcucunata cuyuchingapac tucui shunguhuan cric cashpapish, cuyaita mana charishpaca, ima mana canichu.

³ Shinallatac ñuca tucui ima charishcata huacchacunaman cushpapish, ñuca cuerpota rupachichun cushpapish cuyaita mana charishpaca, ima mana canichu.

⁴ Maijanpish cuyaita charicca, llaquichicpipish mana piñaric, alli shunguyucmi. Shuccuna ama charichun nishpa mana munacchu, shinallatac “allimi cani” nishpa mana jatun tucushcachu.

⁵ Shinallatac imapish pingaipacta mana ruhuacchu, jahualla mana piñaricchu, quiquinlla charinata mana munacchu, unaicaman mana piñaricchu,

⁶ mana allita ruhuashcata ricushpa mana cushicuc, ashtahuanpish alli cacta ricushpa cushicucmi.

⁷ Shinallatac ima llaquitapish apacmi, crishpa caticmi, cushicushpa shuyac, imamantapish mana piñarishpa jarcaricmi.

⁸ Dios ima nishcata huillanapish tucuringami. Jaicapi mana uyashca rimaicunata rimanapish, ña mana tiyangachu. Ima yachanacunapish tucuringami. Shina cacpipish, cuyaica jaicapi mana tucuringachu.

⁹ Ima yachanacunatapish, mana tucui yachanchicchu. Dios ima nishcamantapish, yachashcallatami huillanchic.

¹⁰ Ima shina cashcatatac yachana chayamucpica, chai ashalla yachashcaca chingaringallami.

¹¹ Huahuarac cashpaca, huahua shinami yuyaric carcani, rimac carcani. Shinallatac huahua shinami imatapish ruhuasha nic carcani. Ña juizhuyashpaca, huahua shina ruhuanataca saquircanimi.

¹² Cunanca espejopi amsa amsallata ricucushca shinami, ashallata yachanchic. Shina cashpapish shamuc punzhaca ima shina cashcatatac, ñahui ñahuimari ricushun. Cunanca chaitaca mana yachanichu. Shina cashpapish, ima shinami Dios ñucata ricsin, shinallatacmi shamuc punzhaca ricsisha.

¹³ Caicunamanta nishpaca, crinapish, imata shuyana cashcata shuyanapish, cuyaita charinapish tiyashpa catingallami. Ashtahuanpish cai quimsacunamanta yallica cuyaimi.