1 CORINTIOS 12 - Dios Rimashcata Quillcashcami

Diospac Espíritu imacunallata ruhuachic cashcamanta

¹ Cuyashca criccuna, Diospac Espíritu imacunallata ruhuachic cashcataca yachanami canguichic.

² Cancuna manarac cric cashpaca, mana rimaric ruhuashcalla dioscuna umashcami carcanguichic. Chaitaca cancunallatac yachanguichicmi.

³ Chaimanta Diospac Espíritu maijanta rimachicucpica mana: «Jesusca ima llaqui tucuchun» ninmanchu. Shinallatac maijanpish Diospac Espíritu mana rimachicucpica mana: «Jesusca Mandacmi» ninmanchu.

⁴ Tandanacushca criccunapurapica, tucuilaya ruhuaccunami tiyan. Shina cacpipish Diospac Espiritullami chaicunataca ruhuachin.

⁵ Tucuilayata ruhuashpa servinami tiyan. Shina cacpipish, tucui chaicunataca Apunchic Jesusllami ruhuachicun.

⁶ Tucuilaya ruhuaicunami tiyan. Shina cacpipish, Diosllatacmi tucuita ruhuachicun.

⁷ Diosca, paipac Espíritu tucuipac allipac allicunata ruhuachic cashcatami ricuchin.

⁸ Diospac Espirituta maijanmanca allita rimachunmi, alli yuyaita cun. Maijanmanca chai Espiritullatacmi alli yachaita cun.

⁹ Chai Espiritullatacmi maijantaca alli cricta ruhuan. Maijantaca ungushcacunata alliyachictami ruhuan.

¹⁰ Maijantaca milagrotami ruhuachin. Maijantaca Dios ima nishcata huillactami ruhuan. Maijantaca alli Espíritu cashcata yachactami ruhuan. Maijantaca mana yachashca rimaicunata rimactami ruhuan. Maijantaca chai mana yachashca rimaita entendichictami ruhuan.

¹¹ Ashtahuanpish tucui caicunataca Diospac shuclla Espiritumi ruhuachin. Paimi maijanman cusha nishca shina, imata ruhuaipacta ricushpa cun.

Tandanacushca criccunaca shuc cuerpo shina cashcamanta

¹² Cuerpoca shuclla cashpapish, chican chican partecunatami charin. Chashnallatacmi Cristopac cuerpomanta nishpapish shuclla can.

¹³ Chaica, tucui ñucanchicmi Israel cashpa, mana Israel cashpa, servic, mana servic cashpapish, Diospac shuclla Espirituhuan bautizarishca canchic. Diosca chai Espiritullatatacmi yacuta ubiachic shina, curca.

¹⁴ Cuerpoca mana shuc partellatachu charin, ashtahuanpish chican chican partecunatami charin.

¹⁵ Chaquica: “Ñucaca mana maquichu cani, chaimanta, mana cuerpopacchu cani” mana ningachu. Shina nishpapish, cuerpopac canataca mana saquinchu.

¹⁶ Ringripish: “Ñucaca mana ñahui cashcamantaca, mana cuerpopacchu cani” nishpapish, cuerpopac canataca mana saquinchu.

¹⁷ Tucui cuerpo ñahuilla cacpica, ¿ima shinatac uyanchicman? Tucui cuerpo ringrilla cacpica, ¿ima shinatac mutquinchicman?

¹⁸ Ashtahuanpish Diosca chican chican partecunatami, maipimi alli cana cacpi cuerpopica churashca.

¹⁹ Tucui cuerpo shuc parte shinalla cacpica, ña mana cuerpo shina canmanchu.

²⁰ Chashna cuerpopi chican chican partecuna tiyacpipish, cuerpoca shucllami.

²¹ Ñahuica maquitaca: “Cantaca mana ninichu” nishpaca, mana ninmanchu. Umapish chaquitaca: “Cantaca mana ninichu” mana ninmanchu.

²² Ashtahuanpish imapacpish mana valic partemi, cuerpopacca mai valic can.

²³ Maijanmi yangalla cac partetami ashtahuan cuidarishpa, alli churarinchic. Shinallatac maijanmi pinganayaclla cac partetami, tucuimanta yalli jarcarishpa churarinchic.

²⁴ Ashtahuanpish tucui mashna ricunalla partecunataca, mana jarcarinachu. Diosca yangalla cac parteta ashtahuan jarcarichunmi, cuerpotaca ruhuashca.

²⁵ Cuerpopi tiyac partecuna ama chicanyarinacushpa, caishuc chaishuc ayudanacuchunmi, chashnaca ruhuashca.

²⁶ Cuerpopi shuc parte llaqui tucucpica, caishuc partecunapish llaquirinmi. Shinallatac shuc parte allita japicpica, tucui partemi cushicun.

²⁷ Cancunaca Cristopac cuerpo shina cashpami, chican chican partecuna canguichic.

²⁸ Diosca tandanacushca criccunapurapica, puntaca apostolcuna tiyachun, quipaca Dios ima nishcata huillaccuna tiyachun, chai quipaca yachachiccuna tiyachunmi munan. Shinallatac milagrocunata ruhuaccuna, jambiccuna, ayudaccuna, pushaccuna, jaicapi mana uyashca rimaicunata rimaccuna tiyachunmi munan.

²⁹ Mana tucuichu apostolcuna, Dios ima nishcata huillaccuna, yachachiccuna, milagrocunata ruhuaccuna can.

³⁰ Shinallatac mana tucuichu ungushcacunata jambiccuna, jaicapi mana uyashca rimaita rimaccuna, shinallatac chai rimashca imata nisha nicushcata entendichiccuna can.

³¹ Tucui caicunamantaca, imapish ashtahuan valishca ruhuaicunata ruhuanata munaichic. Shina cacpipish tucui caicunamanta yallica, ashtahuan alli causanatami ñucaca yachachigrini.