1 CORINTIOS 11 - Dios Rimashcata Quillcashcami

¹ Ima shinami ñuca Cristota catishpa causacuni, chai shinallatac cancunapish ñuca shina causaichic.

Huarmicuna cultopi ima shina canamanta

² Cancuna ñuca yachachishcata cazushpa, ñucata yuyarishpa causacushcamantaca alli ninimi.

³ Shina cacpipish, Cristoca caripac uma cashcata, cutin carica huarmipac uma cashcata, Diosca Cristopac uma cashcata yachachunmi munani.

⁴ Maijan caripish, umata tapallishpa, Diosta mañashpa, mana cashpaca Diosmanta huillacushpaca Cristotami pingaichin.

⁵ Huarmicuna umata mana tapallishpa, Diosta mañashpa, mana cashpaca Diosmanta huillacushpaca cusatami pingaichin. Umata mana tapallishca huarmica, acchata pitishca shinami.

⁶ Shuc huarmi umata mana tapallisha nishpaca, acchata pitichun. Acchata tucui pitichina pingai cacpica, umata tapallichun.

⁷ Carica Dios shina cashcamanta, shinallatac Diospac cushicuita ricuchic cashcamantami, umata mana tapallina can. Ashtahuanpish huarmica caripac cushicuitami ricuchin.

⁸ Carica mana huarmimantachu tiyarca, ashtahuanpish huarmimi carimanta tiyarca.

⁹ Shinallatac Diosca caritaca mana huarmimanchu ruhuarca, ashtahuanpish huarmitami cariman ruhuarca.

¹⁰ Chaimantami huarmica carita, angelcunata respetota charishcamanta umata tapallina can.

¹¹ Ashtahuanpish Apunchic Jesucristopac ñaupapica, caripish mana huarmita yallichu, shinallatac huarmipish mana carita yallichu.

¹² Ima shinami huarmica carimanta tiyan, chashnallatacmi caripish huarmimanta huacharin. Chaica, tucuimi Diosmanta tiyan.

¹³ Huarmicuna umata mana tapallishpa, Diosta mañana mana alli cashcataca cancunallatac yuyarichic.

¹⁴ Cari acchata huiñachishpa, pingai tucushcataca, quiquin yuyaillatacmi ricuchin.

¹⁵ Ashtahuanpish huarmi accha huiñachinaca allimi. Umata tapallirichunmi, chashna acchata huiñachichun Diosca cushca.

¹⁶ Caicunamanta maijan mana uyasha nishpa, rimaccunataca: Ñucanchicpish, Diospaclla tandanacushca criccunapish, shuctaclaya causana tiyashcataca mana yachanchicchu.

Jesús huañushcata yuyarishpa micunata mana alli yuyaihuan micuccuna tiyashcamanta

¹⁷ Caicunata rimashpaca mana cancunata alli nigrinichu. Cancuna tandanacushpaca, allita ruhuanapac randica, mana allitami ruhuanguichic.

¹⁸ Puntaca, cancuna tandanacushpapish, chicanyarinacui tiyan nictami uyani. Chai nishcacunaca, ciertomi canga yuyanimi.

¹⁹ Cancunapurapi alli cric tiyashcata yachangapacca, chicanyarinacui tiyanami can.

²⁰ Cancuna chicanyarinacushpa, Apunchic Jesús huañushcata yuyarishpa micushcaca yangallami.

²¹ Chashnami maijancunaca micungapac rishpaca, mana shuyashpa micunguichic. Maijancunaca yarcaihuanmi saquirin. Maijancunaca machactami ubiashcanguichic.

²² Cancunaca, ¿manachu micungapac, ubiangapacca huasita charinguichic? ¿Diospaclla cac tandanacushca criccunatachu yangapi churasha ninguichic? ¿Imata mana chariccunatachu pingaipi churasha ninguichic? ¿Chaitaca allimi nishachu? ¡Chaitaca mana alli canichu!

Apunchic Jesús huañushcata yuyarishpa micunamanta

²³ Cancunaman yachachishcataca, Apunchic Jesusmantami chasquircani. Apunchic Jesusca paita japichina tutallatacmi tandata japishpa,

²⁴ Diosta pagui nishpa, chaupishpaca: «Caica cancunamanta llaquita apana ñuca aichami. Ñucata yuyarishpa micucunguichiclla» nirca.

²⁵ Shinallatac vaso vinota japishpaca: «Cai vaso vinoca mushuc ari ninacuita ricuchic, ñuca yahuarmi. Ñucata yuyarishpa ubiacunguichiclla» nirca.

²⁶ Chai shina tandata micushpa, vaso vinota ubiashpa, Apunchic Jesús cutimungacaman pai huañushcata huillacunguichic.

Ima shina Apunchic Jesús huañushcata yuyarishpa micunamanta

²⁷ Maijanpish Apunchic Jesús huañushcata yuyarishpa, (jahua shungullahuan) micucca Jesuspac aichatapish, yahuartapish yangapi churashpami juchallin.

²⁸ Chaimantami manarac micushpa, manarac ubiashpa, quiquin ima shina cashcatarac yuyarina can.

²⁹ Maijanpish Apunchic Jesuspac aicha cashcata, paipac yahuar cashcata mana yachashpa micucca, paillatac llaqui tucungapacmi micun, ubian.

³⁰ Chaimantami cancunapurapica tauca ungushcacuna, irquiyashcacuna canguichic. Maijancunacarin ña huañushcacunami.

³¹ Manarac micushpa, ñucanchic quiquinllatac ima shina cashcata alli yuyarishpa micushpaca, mana juchanchishcachu canchicman.

³² Apunchic Jesús llaquichishpaca ñucanchicpish cai pachapaclla causaccunahuan ama jatun llaquiman richunmi llaquichin.

³³ Chaimanta cuyashca criccuna, Apunchic Jesús huañushcata yuyarishpa micungapac tandanacushpaca, shuyanacushpa micunguichic.

³⁴ Maijanpish yarcaihuan cashpaca, quiquin huasillapitac micuchun. Tandanacuipi mana allita ruhuashcamanta Dios ama llaquichishca cachunmi, chashnaca nini. Caishuc allichinacunataca ñuca shamushpami allichisha.