Mateo 9 - Porciones en Zapoteco de las Delicias

Jesús rnit'lau'e dula len ru'uune bënni nat'zie'

¹ Gdëëd le ni, Jesús greene lu barku, gdëëde tzala'a nis ati budxiine laadze.

² Na' yajua'ke lau'e tue' bënni nat'zie' nuxhua'ke le' lu da'a, len kati Jesús ble'i'de yëla rajle' kieke, gudxe bënni we' ni: —Xi'ina ptip'laadxu'u, chi gxhi'xhëëna xhtu'lu'u.

³ La'ke bënni useed xhba kie' Dios tanáke lu ikj'laadxi'dau'ke: «Bënni ni be'e diidza ku nak lau'e Dios.»

⁴ Ati Jesús guk'be'i'de le rza' ikj'laadxi'dau'ke, bnaab'de leke: —¿Bixhkia' rza' ki ikj'laadxi'dau'li?

⁵ ¿Bixh'l diidza nak'r weez gnaaru: “chi gxhi'xhëëna xhtu'lu'u” u gnaaru: “Gyas len gze'i”?

⁶ San na'a gle'i'li ki le' Xi'ine Bënni nape yëla rnabe' lu yëdz'lyu ni si'xhëëne dula. Na' gudxe bënni'a nat'zie': —Gyas, butuub xhto'u len buaj liidxu.

⁷ Na' bënni'a nat'zie' gyase len zuwëëje liidxe.

⁸ Kati bunach gulale'i'de lea guk'a, glaadxi'tzki'de len gulagu'e ba Dios koma bnëëdzje yëla wak kieke bunach.

Jesús bliidze Mateo

⁹ Jesús buze'e ni', len ble'i'de tue' bënni le' Mateo, rë'e latj ga rkiixhje laaz'sua'ke ki Roma. Ati gudxe le': —Dia' len neda. Na' Mateo gyase le ziaj'leene Le'.

¹⁰ Tzal Jesús rë'e ra'we nu'yu'a, zian'ke bënni tukiixhj'ke laaz'sua'ke ki Roma len ye la'ke bënni ze xhtiidza'ke tuune le ku nak, guladxiine len gulabë'ke ga rë'e ra'we Jesús len bënni useed kie'.

¹¹ Kati bënni fariseo gulale'i'de leke, gulunaab'de bënni useed kie': —¿Bixhkia' bënni useed kieeli raagu'leene bënni dula len bënni tukiixhje laaz'sua'ke ki Roma?

¹² Jesús byëën'de len gudxe leke: Bënni'a te'i'de nayaadzji'kde nu un le'ke, keg bënni'a nakua'ke dxia'a.

¹³ Gultziaj len guluseed bixh re'e'ni gna' diidza ni: “Ti re'en'da nu bua' gdëëdi'li'ba lau'a, le re'en'da nak wechilaadxi'i lza'a'li”. Koma ti za'a zduliidz'ka'ne bënni tuune le dxia'a, za'a zduliidz'ka'ne bënni dula.

Jesús rseed'de ki gbas

¹⁴ Bënni useed kie' Juan gulabiige'e ga ze' Jesús len gulunaab'de le': —Netu len bënni fariseo run'tzka'tu gbas, ¿Bixhkia' ti tuune gbas bënni useed kiu'?

¹⁵ Jesús bubi'e diidza: —¿Naru gunn luwi'i'ni'de bënni nakua'ke lni ki utzag'na', tzal bënni'a rtzag'ne'e ni zue' len le'ke? San udxin dza kati bënni'a rtzag'ne'e tir sue' len le'ke; kati gdxin dza'a ulun'ke gbas.

¹⁶ «Nutunu bënni ru'uune xhe' teeb len tu laari kub, koma laari kub'a ru'bë' len rchëëza xhe' teeb'a.

¹⁷ Lekz'ka' ti taga'a'ke nup uva kub lu bëëga gid teeb, koma nup uva kub'a gunn ga larëëza bëëga gid teeb'a, len grop'te lak'ditji. Lena'a rala ka'aru nup uva kub lu bëëga gid kub, naar ti lak'ditji.»

Bi nguul'du kie' Jairo len nguul re'i'nu

¹⁸ Tzal Jesús rue'e diidza, bdxiine tue' bënni blou kieke bënni Judea yajzechu xhiibe lau'e Jesús len gudxe Le': —Bi nguul'du kia' la buudx'kz gut'bi, san xhki li so'u len kxua'no'u'bi, leebi ubaami lu yëla gut.

¹⁹ Jesús gyase len dzaage bënni useed kie' yajak'leene bënni ni.

²⁰ Na' tuunu nguul chi guk chin'nu iz re'i'nu, ti ruwi'i'nu rën, bdxin'nu kuudzu'le Jesús len gdan'nu luuxhi laari xhua kuudze'e.

²¹ Koma re'nu ikj'laadxi'dau'nu: «Zala laari'z xhua kuudze'e kaana, ueaka.»

²² Ati Jesús bueikje byue'nu nguul ni len gudxe'nu: —Xi'ina, ptip'laadxu'u, yëla rajle' kiu' ben ga bueaku. —Len na'teez bueak'te'nu nguul ni'.

²³ Kati Jesús bdxiine liidxe bënni blou kieke bënni Judea, ble'i'de bënni'a tukëëdxe gy chi nakua'ke si'na tzajkachi'ke'bi ati bunach'a ruzbë' nakua'ke tabëëdxe,

²⁴ Jesús gudxe leke: —Guluroj, koma bi'dau' ni ti nat'bi, ras'zbi. Bunach nakua'ke'a gulaxhiidx'de Jesús,

²⁵ san Le' beene ga larooje; na' gyaazie len gde'le'e naa'bi bi'dau' ni ati leebi gyas'bi.

²⁶ Len bunach ki gdu gia'a yeego'a gulanëëz'de lea guk'a.

Jesús ru'uune chope' bënni lau'chul

²⁷ Kati Jesús burooje na', chope' bënni lau'chul zjake kuudze'e tuskua'ke: —¡Xi'ine David, buechilaadxi'i netu!

²⁸ Kati Jesús gyaazie nu'yu'u, bënni lau'chul'a gulabiige'e ga ze', ati Le' bnaab'de leke: —¿Ba rajle'li ki gunn uuna lbi'ili? —Leke gulubi'e diidza—rajle'tu, Xan.

²⁹ Na' Jesús gdaane lau'ke'a len gudxe leke: —Gak ka nak yëla rajle' kieeli.

³⁰ Len bueak'te lau'ke. Jesús gnabe'i'de leke: —Ti gun'li ga nu gnëëzi.

³¹ San bënni ni, guluroj'ze na' gdu gia'a yeego'a gulagixhjë'ke le beene Jesús.

Jesús ru'uune tue' bënni ti rak gne'

³² Buudx gulurooje bënni ni, la'ke bënni yajua'ke lau'e Jesús tue' bënni yu'u le' bë' xëwi ati ti rak gne'.

³³ Kati Jesús bubiije bë' xëwi'a bënni'a ti rak gne' gzulau'tie' rue'e diidza. Bunach tubaan'de tanáke: —¡Gat'ga rle'i'tu le guk na'a lu yu Israel!

³⁴ San bënni fariseo tanáke: —Kuin'kz xaani bë' xëwi'a nak le rnëëdzj kie' bënni ni yëla wak ubiije bë' xëwi.

Zxhëni nak le rala uzi'ru

³⁵ Jesús ziije yëdz yëdz rseed'de lu yu'u useed, rgixhjë'e diidza kub dxia'a ki yëla rnabe' kie' Dios, len ru'uune bunach ki zian baya' len yëla rtzaag.

³⁶ Kati ble'i'de bunach zian zjak'leene Le', buechilaadxe'e leke koma chi yajte'i'kde len nas'laz'ke ka bëku'xhiila bua' nutunu zua' nu gun'chi'i lek'ba.

³⁷ Na' gudxe bënni useed kie': —Le nak'te rea' lbi'ili, zxhëni nak le rala uzi'ru ati lati'ize bënni wendxin nakua'ke.

³⁸ Lena'a, gulgatayue' bënni Xaani layeel'a, ksë'le'e bënni wendxin luzi'ke ley.