Mateo 8 - Porciones en Zapoteco de las Delicias

Jesús ru'uune tue' bënni re'i'de we' nuudzu

¹ Kati Jesús budinie gia'a, zian'k bunach yajak'leene Le'.

² Na' tue' bënni re'i'de we' nuudzu gbiige'e ga zue' ati bzechu xhiibe len gudxe Le': —Xan, xhki ba rna kiu', wak uunu neda.

³ Jesús pxua'ne'e le' len gne': —Rna kia'. ¡Bueak dxia'a! Na'teez, bënni'a re'i'de we' nuudzu bueake.

⁴ Ati Jesús gudxe le': —Bzenaag'tzka, nutunu kixhji'du le guk; gyaj'z lau'e pxuuz len bia' gun le gnabe'e Moisés ka chi naleebi'li kati rupa'a kuin'li, naar lale'i'de ley pxuuz'a.

Jesús len bënni xan'ke bënni rajake gdil ki Roma

⁵ Kati Jesús gyaazie lu yëdz Cafarnaúm, tue' bënni rnabe'e bënni raja'ke gdil ki Roma gbiige'e ga zue' naar gutayui'de Le'.

⁶ Gne': —Xan, bënni wendxin kia' re'i'de, nat'zie' len rtzaag'tzke rake zi'.

⁷ Jesús bubi'e diidza: —Uza'a uuna'ne.

⁸ Na' bënni rnabe'e bënni raja'ke gdil bubi'e diidza: —Xan, ti naka bach tzaaziu liidxa, gnabe'ez len bënni wendxin kia' ueake.

⁹ Koma lekz'ka' zua nu rnabe'i neda, len nakua'ke bënni raja'ke gdil rnabe'ik'da'ne. Kati rea'ne tue' gyaj, riije; kati rea'ne ye tue' da, riide, len kati rsë'la'ne bënni wendxin kia' bi guune, ruune.

¹⁰ Jesús bubaan'de kati byëën'de diidza ni len gudxe bunach zjak'leene Le': —Le nak'te rea' lbi'ili, gat'ga rajxaka'ne lu yëdz Israel tue' bënni nape yëla rajle' ka nak yëla rajle' kie' bënni ni.

¹¹ Len rea' lbi'ili ki gdu gabi'i yëdz'lyu udujak bunach zian, len ulabë'ke la'we len Abraham, Isaac len Jacob lu yëla rnabe' ki yewayuba,

¹² san bënni rala lakua'ke lu yëla rnabe' kie' Dios, ulabiaj'ke leke rayu'ul ga nak'tzka chul. Na' lazulau'ke labëëdx'ke len lutil la'ya'ke.

¹³ Chi nak ka' Jesús gudxe bënni'a rnabe'e bënni raja'ke gdil: —Buaj liidxu len gak lea chi gyajle'u. Na'teez bueake bënni wendxin kie'.

Jesús ru'uune'nu tau'e Pedro

¹⁴ Jesús gyiije liidxe Pedro, na' yajxa'ke'nu tau'e Pedro deenu yu'u'nu tuxhla.

¹⁵ Jesús gdaane na'nu len tuxhla ni buroj lenu, na' gyas'nu len ben'nu le gla'we.

Jesús ru'uune zian'ke bënni te'i'de

¹⁶ Kati gbia gbiidz yajua'ke lau'e Jesús zian'ke bënni yu'u leke bë' xëwi; ati Jesús gnabe'i'de bë' xëwi'a luroj, lekz'ka' buune yugute'ke bënni we'.

¹⁷ Le ni guk naar yajtzaag ka nayoj lu gich la'ay le bzooje Isaías bënni be'e diidza ulaaz kie' Dios, kati gne': «Le' bia'gleene yugute' baya' len yëla rsaka'zi' kieeru.»

Bënni te'en'de tzjak'leene Jesús

¹⁸ Kati Jesús ble'i'de ki bunach zian nakua'ke ga ze', gnabe'e tzjake tzala'a nis.

¹⁹ Na' tue' bënni useed xhba kie' Dios gbiige'e ga ze' ati gudxe Le': —Bënni useed, rzelaadxa'a sa'leena li' ga'ti'teez tziiju.

²⁰ Jesús bubi'e diidza: —Bëëza zua bloj giaj kiek'ba, len bua' tazuuba zua liidx'kba; san le' Xi'ine Bënni ti de tu latj ga gasie'.

²¹ Len ye tue', bënni nake bënni useed kie', gudxe Le': —Xan, ben latj zia'a xuuza jka'cha'a'ne.

²² Jesús bubi'e diidza: —Dia' len neda, len be'ke latj bënni nat'a luka'chi'ke bënni nat kieke.

Jesús rbeki'dxie' bë' bduunu

²³ Jesús greene lu barku, len bënni useed kie' zjak'leene Le'.

²⁴ Na' gyas tu bë' bduunu xhën lu nis'a, ati nis rbixh'rtul ryaaz lu barku'a. Tzal'za Jesús rasie'.

²⁵ Na' bënni useed kie' guluspaane Le', tanáke: —¡Xan, buslá netu! ¡Chi rëtj'ru lu nis!

²⁶ Le' bubi'e diidza: —¿Bixhkia' raadxi'tzki'li? ¡Tibi yëla rajle' dekz kieeli! Gne' ka', gyase len gnabe'i'de bë' len nis xhën len yugute' grë'dxi.

²⁷ Le'ke tubaan'de, tunaabi lza'a'ke: —¿Nuxh nake bënni ni, rnabe'i'de bë' len nis xhën len tuzenaagi Le'?

Bënni yu'u leke bë' xëwi lu yëdz Gadara

²⁸ Kati Jesús bdxiine tzala'a nis, xhyu'ke bënni Gadara, gularooje ladj ba chope' bënni yu'u leke bë' xëwi len gulabiige'e ga zue'. Nutunu bënni ruwaaxhj'de tëëde lu nëëz'a, koma nak'ke bënni znia',

²⁹ ati bënni'a yu'u leke bë' xëwi'a guluskua'ke: —¡Xi'ine Dios, bixh rala'tu kiu'! ¿Naru zo'u ksaka'zi'u netu len ti rdxiini dza'a?

³⁰ Ga'la'z na', tadaaba ziank'ba kuch taag'ba,

³¹ len bë' xëwi'a glatayui Le' Jesús, taná: —Xhki ubiiju netu, ben lsenz tzaaz'tu le'ek'ba kuch'a.

³² Jesús gne': —Gultziaj. Bë' xëwi'a guluroj leke bënni'a len gulayaaz le'ek'ba kuch ni, na'teez kuch'a gulaxhunj'ba le'gia'a dxi'it ga de nis xhën, len ni' gulaye'pi'ba nis.

³³ Bënni'a tun'chi'ke'ba kuch ni gulaxhunj'ke, kati guludxiine lu yëdz gulagixhjë'ke yugute' le guk len bënni'a yu'u leke bë' xëwi.

³⁴ Na' yugute' bunach ki yëdz'a gularooje yajyu'ke Jesús, len kati guladxiine ga zue' glatayui'de Le' tziije ga yubl.