Mateo 5 - Porciones en Zapoteco de las Delicias

Diidza be'e Jesús lu gia'a'du

¹ Kati Jesús ble'i'de bunach zian nakua'ke'a, greene tu gia'a'du len na' grë'e. Bënni useed kie' gulabiige'e ga zue',

² len Le' gzulau'e rseed'de leke, rne':

Le nak lzaka' lau'e Dios

³ «Bixhgaba'ke bënni'a tak'be'i'de ki nayaadzji'kde Dios, koma kieke naki yëla rnabe' ki yewayuba.

⁴ »Bixhgaba'ke bënni'a tutzaage, koma uluwi'xhën'ke leke.

⁵ »Bixhgaba'ke bënni nëxhj'laadxi, koma uluzi'ke xhbei yu le'a nuxëne'laadxi'ke.

⁶ »Bixhgaba'ke bënni tazelaadxi'i'tzke yëla rë'xhbei dxia'a, koma ulazi'ke ley.

⁷ »Bixhgaba'ke bënni tuwechilaadxi'i'ke bunach, koma Dios wechilaadxe'e leke.

⁸ »Bixhgaba'ke bënni nak dxia'a laadxi'dau'ke koma ulale'i'de Dios.

⁹ »Bixhgaba'ke bënni tugiilje yëla rë'dxi, koma ulazi' lake xi'ine Dios.

¹⁰ »Bixhgaba'ke bënni'a tulaag'ke leke le tun'ke le nak dxia'a, koma kieke naki Yëla Rnabe' ki yewayuba.

¹¹ »Bixhgaba'li lbi'ili, kati bunach lutzag'yuudxe lbi'ili diidza len lusaka'dë'ke lbi'ili, len kati nia'a kia' labia'laadxi'ke lbi'ili len zian'k diidza le ku nak.

¹² Guludziiji'tzki koma xhën'te nak le uzi'li xhbei yewayuba; koma lekz'ka' ka' gulusaka'ke bënni'a glui'ke diidza ulaaz kie' Dios, bënni'a gulakua'ke zia'al ka lbi'ili.

Zëdi' len yeni ki yëdz'lyu

¹³ »Lbi'ili nak'li zëdi' ki yëdz'lyu ni. San xhki zëdi' gnit yëla sna'a ki, ¿nakxh gunn ueak sna'a? Gat'ga zua ga gun, chi taru'un'ze len bunach tuliibe ley.

¹⁴ »Lbi'ili nak'li yeni ki yëdz'lyu ni. Tu yëdz zua lau'it gia'a ti gunn jka'chi' lau'i.

¹⁵ Lekz'ka' ti rkie'la'li tu gi' na' rgu'u'li ley xhani gi'in; rzuaali ley ga nak xhtza' na'ar gunn gzeni yugute'ke bënni nakua'ke nu'yu'a.

¹⁶ Lekz'ka' lbi'ili gulgun bayuudx ki yeni kieeli gzeni lau'i bunach, naar kati bunach lale'i'de ki run'li le dxia'a lagu'e ba Xuuz'ru zue' yewayuba.

Jesús rseed'de ki xhba kie' Dios

¹⁷ »Ti gaki'li ki za'a zduzua' tzala'al xhba kie' Dios u zduzua' tzala'al le guluzooje bënni'a glui'ke diidza ulaaz kie' Dios; ti za'a zdulu'a lu'uudx ki, za'a ki gak ka rala gak.

¹⁸ Le nak'te rea' lbi'ili, ki tzal ni nakua'k xhba len yëdz'lyu, ti tëëd ka'az tu la'an'z diidza ki xhba kie' Dios, nakati gdxin'r gak ka rala gak.

¹⁹ Lena'a, bënni ti rzenaage zala tuuz xhba kie' Dios le ti nak zi blou, len ti rseed'de bunach luzenaag'ke xhba'a, bënni ni ti gake xhën lu yëla rnabe' ki yewayuba. San bënni rzenaage len rseed'de bunach ki luzenaag'ke, wak're xhën lu yëla rnabe' ki yewayuba.

Jesús rseed'de ki le nak'r dxia'a

²⁰ »Koma rea' lbi'ili ki xhki ti kxua'laur'li gun'li le nak dxia'a lau'e Dios ka bënni fariseo len ka bënni useed xhba kie' Dios, ti tzaaz'kz'li lu yëla rnabe' ki yewayuba.

1. Le rak ki yëla rdëëdi bunach

²¹ »Chi nayëëni'li ka gle'ke xuuz'xhtau'li guul: “Ti gdëëdi'li bunach, koma bënni gdëëd'de bunach ubaage'e xhgia'.”

²² San neda rea' lbi'ili ki nu'ti'teez bënni gdze'e bënni bë'che'e, nake bach gbaage'e xhgia'. Bënni gdxie' dë' bënni bë'che'e ulabeki'xhbei'de kie' lu dxin'lau'i blou; ati bënni ti ryaazlaadxe'e bënni bë'che'e nake bach tziije lu gi'gabil.

²³ »Lena'a, xhki kati tzaju'u gun kiu' lu pkuugu la'ay ati tzajnei'du ki bënni bë'chu'u ti rle'i'de li dxia'a,

²⁴ pka'an lu pkuugu'a gun kiu' len yajyue zia'a bënni bë'chu'a ki yudzaag'li dxia'a. Na'ar gunn wëëdu lu pkuugu la'ay len gnëëdzju gun kiu'a.

²⁵ »Xhki nu bënni re'en'de tzajzue' li' yulau'i ki luchuug'be'e kiu', gulkueki'xhbei lbi'ili zia'a tzal ni de latj, naar ti gzue' li' lu ne'e bënni rchuug'be', koma xhki na'a, bënni ni udëëde li' lu naa'ke bënni tun'chi'ke liidx'gia, len na' lagu'u'ke li'.

²⁶ Le nak'te rea' li' ki ti yurooju xhki ti kiixhju zura dumi'a tzka rala gdxiu'.

²⁷ »Chi nayëëni'li ki gulanake: “Ti kitzju' xhba ki utzag'na'.”

²⁸ San neda rea' lbi'ili ki xhki nu bënni ryue'nu tuunu nguul len rzelaadxe'nu, chik'z gditzje' xhba ki utzag'na' lu laadxi'dau'e.

²⁹ »Lena'a, xhki lau'u yubeel run ga guunu dula, gliaj len gru'un, koma nakr'ru dxia'a gnitiu' tu yaj lau'u ka gdu ka naku tzajtzu'u lu gi'gabil.

³⁰ Len xhki no'u yubeel run ga guunu dula, pchuug len gru'un, nakr'ru dxia'a gnitiu' no'u'a ka gdu ka naku tzajtzu'u lu gi'gabil.

³¹ »Lekz'ka' gulane': “Nu'ti'teez bënni rsanlaadxe'nu nguul kie', rala gnëëdzje kieenu gich ki chi nusanlaadxe'nu.”

³² Xhki tuunu nguul tzajtzu'u'leen'nu'ne bënni yubl run'nu ga bënni kieenu rzi'e latj ksanlaadxe'nu, san xhki ti nak ka' bënni ksanlaadxe'nu nguul kie' bil wen run'ze ga nguul kie' kitzj'nu xhba ki utzag'na'. Ati bënni'a rzua'leene'nu nguul nusanlaadxi'ke'nu, rgitzje' xhba ki utzag'na'.

³³ »Lekz'ka' byëëni'li ka gle'ke xuuz'xhtau'li guul: “ti jka'anu kaaz le gxi'luno'u len xhtiidzu'u lau'e Xan'ru kati gnou' blikz'da'ne Dios.”

³⁴ San neda rea' lbi'ili: Ti gnakz'li: blikz'da'ne Dios. Ti gnaali blikz'da yewayuba, koma na' rnabe'e Dios;

³⁵ Ti gnaali blikz'da yëdz'lyu ni, koma na' nak xhliibi ni'e; len ti gnaali blikz'da Jerusalén, koma nak yëdz kie' Bënni Rnabe' xhën'te.

³⁶ Ti gnaali blikz'da ikja ni, koma ti gak'li gun'li ki tu gitza'ikj'li gak gasj u gak xhkich.

³⁷ Xhtiidza'li rala gak, “ën” u “ën'ën'”. Koma xhki bil'l gnaali, kie' bënni xëwi za' diidza'a.

³⁸ »Lbi'ili chi byëëni'li ki gulanake: “tu lau'ru saki'i tu lau'ru len tu la'ya'ru saki'i tu la'ya'ru.”

³⁹ San neda rea' lbi'ili: ti uzi'laali'ne bënni bi ksake'e lbi'ili, san xhki nu ka'pa tzala'a xagu'u yubeel, bze lekz'ka' le ye tzala'a.

⁴⁰ Xhki nu bënni tzajzue' li' yulau'i len re'en'de kue' xhou', be'e latj we'e lekz'ka' laari rxu' kuudzu'u.

⁴¹ Xhki nu bënni gdayë'li'de li' gu'u sue'e gatzj ur nëëz, bia' ley tu ur.

⁴² Nu'ti'teez nu bi gnaabi li' bnëëdzj, len ti jka'anu'ne ka'az bënni bi gnaab'giir'de li'.

⁴³ »Lekz'ka' chi byëëni'li ki gulanake: “Bdxi'i'de bënni bë'chi' lzo'u len glei'de bënni'a ti rdzaage li' dxia'a.”

⁴⁴ San neda rea' lbi'ili: guladxi'i'de bënni'a ti tale'i'de lbi'ili dxia'a, len kati rliidzu'ne Dios bnaab kieke bënni'a tulaag'ke li'.

⁴⁵ Naar gdxin'li gak'li xi'ine Xuuz'li zue' yewayuba, koma Le' ruune ga r'roj gbiidz kieke bënni tzawi len lekz'ka' kieke bënni xhe'e, len rsë'le'e giaj kieke bënni tuune le nak dxia'a, len lekz'ka' kieke bënni ti tuune le nak dxia'a.

⁴⁶ Xhki nadxi'iz'li nu nadxi'i lbi'ili, ¿bixh uzi'li xhbei? La lez ka'az'a tabëëze bënni'a tukiixhje laaz'sua'ke ki Roma.

⁴⁷ Len xhki rliidz'z'li'ne bënni bë'chi' lza'a'li ¿bixh nadëëdi be'i run'li? La lekz'ka' tabëëze bënni ti tayajle'ke.

⁴⁸ Gulgak gdu'te dxia'a, ka nake Xuuz'li zue' yewayuba.