Mateo 3 - Porciones en Zapoteco de las Delicias

Juan bënni rkiile nis bunach rdxiine lu yu biidx

¹ La dza na'z blui'lau'e Juan bënni rkiile nis bunach, lu yu biidx ki yu Judea.

² Rne': «¡Gulubi'i laadxi'li len Dios, koma yëla rnabe' ki yewayuba chi zua gdxin!»

³ Kie' Juan'a be'e diidza Dios lu ne'e Isaías bënni be'e diidza ulaaz kie', kati gne': «Chi'e bënni ruskua' zidzj lu yu biidx: “Gulupa'a nëëz kie' Xan'ru; Gulusaalj kie' nëëz li.”»

⁴ Laari nakue' Juan naki li'tza'ba kameyo, ati ruugi'de ley len pan giid lsiine'e; ati buchuwa' len bdxindu gda'we.

⁵ Bënni yëdz Jerusalén len yugute' yëdz ki yu Judea len yëdz de ra yeego Jordán gularooje len tuzenaage le'.

⁶ Tuxua'le'pe xhtu'la'ke len Juan rkiile leke nis lu yeego Jordán.

⁷ San kati Juan ble'i'de ki zian'ke bënni fariseos len bënni saduceo yajake ki jkiile leke nis, gudxe leke: «¡Xi'in bel'! ¿Nuxh gudx lbi'ili ki gunn gxhunji'li yëla rsaka'zi' xhën'te le chi zua gdxin?

⁸ Gulkëëz bach chi nubi'i'laadxi'li len Xan'ru,

⁹ len ti gnaali lu ikj'laadxi'dau'li, “Netu nak'tu xi'in'xhzue' Abraham”; Koma le nak'te rea' lbi'ili, Dios gun guune ga giaj ni lak ka xi'in'xhzue' Abraham.

¹⁰ Gia'waag chi zua rbëëz ki kchuug lu luit yaag. Yugute' yaag le ti rbia xhlu'li'i dxia'a, tuchuuge len tuzal'ke ley lgi'.

¹¹ Le nak'te, neda rkiila lbi'ili len nis len rea' lbi'ili ki rala ubi'i'laadxi'li len Dios; san bënni ze'e kuudza'a jkiile lbi'ili len Bë' La'ay Kie' Dios lekz'ka' len gi'. Le' nap're yëla wak ka neda, len ti nak'kza bach kseedxa xhtui lëële'.

¹² Zëëne lu ne'e le rgui'i'de bë' ki kchi'e xhua'xhtiil len ubiije xhpebi. Gun'chi'e xhua'xhtiil lu liidxi, ati gzegie xhpebi lu gi' le ti uulkz.»

Jesús bdiile nis

¹³ Jesús brooje Galilea ziije ra yeego Jordán, ga zue' Juan, naar Juan jkiile Le' nis.

¹⁴ Juan ti gu'uni'tiiz'de jkiile Le' nis len re' Le': —¿Li' za'tzu zdujyu' neda? La Li'a rala jkiilu neda nis.

¹⁵ Jesús bubi'e diidza: —Ben ka rala gak, koma ka' gunn kë'xhbei dxia'a yugute' lau'e Dios. Na'ar Juan beene ka gne'a.

¹⁶ Ka buudx'z bdiile nis Jesús len burooje lu nis'a, byaalj yewayuba len ble'i'de Bë' La'ay kie' Dios bëtje ga zue' ka tuuba palom.

¹⁷ Len byën tu chi'i za' yewayuba, le rna: «Bënni ni nake bënni Xi'ina, nadxi'i'tzki'da'ne, len rdzag'laadxa'ne.»