Mateo 28 - Porciones en Zapoteco de las Delicias

Jesús rubaane lu yëla gut

¹ Gdëëd dza tu'ueak'laadxi'ke bënni Judea, bayën ziil'a rugie'la' seman, María Magdalena len María ye tuunu'a yajyu'knu baa.

² Kati ka zua ka' gyu'u tu utit xhën, koma tue' gbaaz la'ay kie' Dios bëtje yewayuba len gyiije ra baa, gdue' giaj'a nusiaj ley len grë'e lau'i.

³ Gbaaz la'ay ni ryepe'yës'lni', len xhe' nak'tzka xhkich ka nak bë'gi'.

⁴ Kati gulale'i'de le', bënni'a rajake gdil glaadxi'tzki'de len glake ka bënni nat.

⁵ Le' gbaaz la'ay kie' Dios guudx'ke'nu nguul ni: —Ti gaadxi'li. Neda nëëz'da ki rugiilj'li'ne Jesús, bënni'a gulude'e le' lu yaag kruuz.

⁶ Ti yu'e ni, chi bubaane lu yëla gut, ka Le' gne'. Guldá gyuuli ga pxua'li'ne.

⁷ Gultziaj ka'teez zuaali len gultzajëëdx'ke bënni useed kie': “Chi bubaane lu yëla gut, len ziije Galilea naar utzaage lbi'ili yubl; ni' gle'i'li'ne.” Le ni nak le neda rala gie'a lbi'ili.

Jesús rlui'lau'e len nguul

⁸ Nguul ni guluza'te'nu ra baa, ley zua' yëla raadxi len yëla rudziiji len lek'nu, len gulaxiti'nu yajdixhjik'nu'ne bënni useed kie' Xan'ru.

⁹ Tzal'za, Jesús yajdzaag'ke'nu len bliidz'tzawi'ke'nu. Lek'nu gulabiiga'nu lau'e len gulayiijilaadxi'nu'ne len guluniida'nu ni'e,

¹⁰ ati le' guudx'ke'nu. —Ti gaadxi'li. Gultzajëëdx'ke bënni bë'cha'a tzjake Galilea, len ni' lale'i'de neda.

Gulagu'u'yëla'ke bënni'a rajake gdil

¹¹ Tzal zjak'nu nguul ni, la'ke bënni'a rajake gdil guludxiine lu yëdz'a len gulagixhji'de bënni'a tunabe'i'de pxuuz yugute' lea' guk'a.

¹² Bënni ni yaje'leen'ke diidza bënni guul tuzeajni'i'de naar luune diidza dzaag. Len zxhëni dumi gulunëëdzje kieke bënni'a rajake gdil,

¹³ len gle'ke leke: Lbi'ili gnaali ki reel, tzal ras'li, bënni useed kie' Jesús gliide len gulubiije le' lu baa.

¹⁴ Len xhki chi bdxin'tza gnëëz'de bënni rnabe'e, netu gun'tu ga tzajle'e, ati lbi'ili tibi bagi'i gap'li.

¹⁵ Bënni'a rajake gdil gulazi'ke dumi'a len gluune lea gle'ke leke. Len ni ziiji na'a ze diidza ni ladj'ke bënni Judea.

Jesús rka'ane le luune bënni useed kie'

¹⁶ Ati chi'niaj'ke bënni useed kie' Jesús yajake Galilea, gia'a lea Jesús gdixhji'de leke.

¹⁷ Len kati gulale'i'de Jesús, gulayiijilaadxi'ke Le', zala ye la'ke ni ruuniz leke.

¹⁸ Jesús gbiige'e ga nakua'ke'a len gudxe leke: Gdu'te yëla rnabe' ki yewayuba len ki yëdz'lyu chi nadëëd lu na'a.

¹⁹ Gultziaj na'a, gdu gabi'i yëdz'lyu, len gulgun ga lake bënni useed kia'; gulukiil'ke nis lu Le' Xuuz'ru, lu Le' Xi'ine len lu Le' Bë' La'ay kie' Dios,

²⁰ Len guluseed'de luzenaage yugute' le chi gnabe'i'da lbi'ili. Le rak ulaaz kia', neda uzua' yugute' dza len lbi'ili na'a gdxin'te dza tzu'u lu'uudx ki yëdz'lyu ni.