Mateo 26 - Porciones en Zapoteco de las Delicias

Tuune diidza nakxh lazëëne Jesús

¹ Kati Jesús buudx pseed'de leke yugute' le ni, gudxe bënni useed kie':

² —Ka chi nëëzi'kz'li, ye chop dza'z ryaadzji ki gdxin lni ki Pascua, ati le Xi'ine Bënni uludëëde le' lu naa'ke bunach naar luda'ke le' lu yaag kruuz.

³ La dza niiz, bënni tunabe'i'de pxuuz len bënni guul tuzeajni'i'de bënni Judea guludzaage lu yulau'i kie' Caifás, bënni pxuuz blou,

⁴ len tazu'tabë'e nakxh luune lazi'ye'i'de Jesús naar lazëëne Le' ati ludëëd'de Le'.

⁵ San tanáke: —Ti sën'ru'ne tzal yu lni ni, naar ku lakua'ke ruzbë' bunach'a.

Tuunu nguul rlaalj'nu'ne le rla' xhixh Jesús

⁶ Jesús zue' yëdz Betania, liidxe Simón, bënni'a gui'i'de we' nuudzu;

⁷ na' gbiiga'nu ga ze' tuunu nguul nua'nu tu rë'ë giaj le yuudz le rla' xhixh le zaki'i'tzki. Tzal Jesús rë'e ga ta'we, leenu blaalj'nu ikje lea rla' xhixh.

⁸ Kati bënni useed kie' gulale'i'de le guk, guladza'a'tzka'ke ati tanáke: —¿Bixhkia' ben'ditji'nu ley?

⁹ Gula'l to'u le ni ati lunne ki zxhëni dumi, naar gun gak'leen'ru'ne bënni yechi.

¹⁰ Jesús byëën'de le ni ati gne': —¿Bixhkia' rtza'a'li ikj'nu nguul ni? Lea ben'nu kia' nak le dxia'a.

¹¹ Koma bënni yechi ulakua'tekze ladj'li, san neda ti sua'leen'tekza lbi'ili.

¹² Le ben'nu nguul ni, na'a glu'u'nu neda le rla' xhixh, nak bupa'a'nu kia' nakati jga'cha'a.

¹³ Blikz'da kati rnia' ki gdu gabi'i yëdz'lyu ga lagixhjë'ke diidza kub dxia'a, lekz'ka' lagixhjë'ke le ben'nu nguul ni, ati ka' tzajnei'kde'nu.

Judas rdëëde Jesús lu ne'e bunach

¹⁴ Tue' kieke chin'nu'ke bënni useed kie' Jesús, bënni'a le' Judas Iscariote, yajyue bënni tunabe'i'de pxuuz

¹⁵ ati gudxe leke: —¿Gaka gun'li kia' na' gdëëda'ne Jesús lu naa'li? Leke gulagiixhj'ke le' chi'urua' dumi plata.

¹⁶ Na' gzulau'e rzu'rbë'e batxh gunn gdëëde Jesús lu naa'ke.

Xhtzë' kie' Xan'ru

¹⁷ Dza rgie'la' lni' ga ta'we yët'xhtiil le ti yu'u le rzaaxh ley, bënni useed kie' Jesús gulabiige'e ga ze' len gulunaab'de le': —¿Gaxh re'en'du tzajpa'a'tu kiu' xhtzë' ki Pascua?

¹⁸ Le' bubi'e diidza: —Gultziaj la yëdz, liidxe bënni'a, len gultzajëëdxe: “Bënni Useed rne': Chi rdxin dza rala gatia', ati liidxu giida gagu'leen'ka'ne bënni useed kia' xhtzë' ki Pascua.”

¹⁹ Bënni useed gluune ka gnabe'i'de leke Jesús len gulupa'a'ke xhtzë' ki Pascua.

²⁰ Kati chi za' ral, Jesús len chin'nu'ke bënni useed kie' rë'ke ga ta'we;

²¹ ati tzal ta'we, Jesús gudxe leke: —Blikz'da rnia', ki tuuli lbi'ili udëëd'li neda lu naa'ke bunach.

²² Ben'yechi'tzka leke, len tu tu'ke gulunaabe: —Xan, ¿Ku nak'tza neda?

²³ Jesús bubi'e diidza: Tue' bënni rla'pe'e yët'xhtiil kie' ga rla'pa'a ley neda, le' gdëëde neda lu naa'ke bunach.

²⁴ Le' Xi'ine Bënni, chi nak ka rala gak kie', ka rna Diidza La'ay; san ¡bayechi nake bënni'a gdëëde le' lu naa'ke bunach! Wak'l kie' dxia'a nar'la ti gzua'kze yëdz'lyu.

²⁵ Na' Judas, bënni'a rdëëde Jesús lu naa'ke bunach, bnaab'de le': —Bënni useed, ¿Ku nak'tza neda? —Jesús bubi'e kie' diidza—Li' chi gnou'.

²⁶ Tzal ta'we, Jesús gde'le'e yët'xhtiil len gdëëd be'e yëla dexhken Dios, bxhuuxhje len bnëëdzje kieke bënni useed kie', gudxe leke: —Gulsi ati gulgaagu, le ni nak xhpeela'a.

²⁷ Chi nak ka' gde'le'e xhiiga len gdëëd be'e yëla dexhken Dios, bdëëde ley kiegake ati gne': —Yugute'li gulgia'aj le yuudz xhiiga ni,

²⁸ koma le ni nak xhchëëna len ley rxënalaadxi'li diidza kub dxia'a, rën le rlaalja ni'a kieeli naar si'li yëla rzi'xhën ki xhtu'la'li.

²⁹ San rea' lbi'ili ki tir gi'i'ja nup uva ni, nakati gdxin'r dza gi'i'ja nup uva kub len lbi'ili lu yëla rnabe' kie' Xuuza.

Jesús rgiixhje ki Pedro ti si'lu'ne'e ki numbe'e le'

³⁰ Gdëëd gulagu'u'ke ba Dios, yajake Gia'a ki Olivos.

³¹ Ati Jesús gudxe leke: —Nadzë' yugute'li nit'li yëla rajle' kieeli len neda. Ka rna' Diidza La'ay: “Udëëd'da'ne bënni'a run'chi'e'ba bëku'xhiila len bëku'xhiila'a ulas'laz'ba.”

³² San kati neda ubaana lu yëla gut, yubl utzaaga lbi'ili Galilea.

³³ Pedro bubi'e diidza: —Zala yugute'ke luka'ane Li' tuuzu, neda ti jka'ana Li' tuuzu.

³⁴ Jesús gudxe le': —Blikz'da rnia' ki nadzë', kati zia'a këëdx'ba xi'in'druuz, tson lzu ti si'luno'u ki numbe'u neda.

³⁵ Pedro gne': —Zala gun'tza bayuudx gat'leena li', ti gna ku si'luna'a ki numbe'a li'. Len yugute'ke bënni useed kie' tuuz ka gulanake.

Jesús rui'leene diidza Dios

³⁶ Chi nak ka Jesús gyiije len bënni useed kie' tu latj ga nazi' lei' Getsemaní len gudxe leke: —Ni gulki'i tzal tzaje'leena'ne diidza Dios.

³⁷ Len pche'e Pedro dzaage grop'te'ke bënni xi'ine Zebedeo, len gzulau'e rnëëz'de kuine bayechi len bui'i'ni'de.

³⁸ Ati gudxe leke: —Rnëëzi'tzki'da kuina bayechi len chi rnëëz'da yëla gut kia'. Niiz guluga'an len ti gas'li.

³⁹ Chi nak ka Jesús gze'e ye lati, bzechu ikje lyu't len be'leene diidza Dios, rne': «Xuuza, xhki gunn, buslá neda ki yëla rzi'be' ni; san ti gak le ryaazlaadxa'a neda, gak le ryaazlaadxu'u li.»

⁴⁰ Chi nak ka' bëëje ga nakua'ke bënni useed kie', len bënni ni tas'ke, ati gudxe Pedro: —¿Naru tikz'bi pxikji'li gna'leen'li neda yeel?

⁴¹ Gulgui'laadxi len gulgui'leene diidza Dios, ku si'be'e lbi'ili bë' xëwi. Lbi'ili rzelaadxi'li gun'li le nak dxia'a san ti rxikji'li.

⁴² Burop lzu bëëje len ka' be'leene diidza Dios: «Xan, xhki gunn, buslá neda ki yëla rsaka'zi' ni; san ti gak le ryaazlaadxa'a neda, gak le ryaazlaadxu'u li.»

⁴³ Kati bule'e, yubl budzëël'de bënni useed kie' tas'ke, koma chik'z rdzuudi lau'ke tzka rak chigas'ke.

⁴⁴ Pka'ane leke na', le bunn lzu bëëje len larakz diidza'a bui'leene Dios.

⁴⁵ Na' budxiine ga nakua'ke bënni useed kie' ati gudxe leke: —¿Naru ni ras'li len ni ru'ueak'laadxi'li? Chi bdxin dza kati Xi'ine bënni ludëëde le' lu naa'ke bënni dula.

⁴⁶ Gultzas, gultza', chi za' ga'le'e bënni'a gdëëde neda lu naa'ke bunach.

Tazëëne Jesús

⁴⁷ Ni ze' rue'e diidza Jesús kati Judas bdxiine dzaage bunach zian bënni nua'ke yaag len gia'a tuchi. Nusë'la'ke leke bënni xan'ke pxuuz len bënni guul tuzeajni'i'de.

⁴⁸ Judas bënni'a rala gdëëde Jesús lu naa'ke chi nagixhji'de leke ka rala guune, «Bënni'a ga'wa'ne bxhidu, bënni'a sën'li'ne.»

⁴⁹ Lena'a gbiige'e ga ze' Jesús, ati gudxe le': —¡Padiuxh, Bënni useed! Ati gda'we Le' bxhidu.

⁵⁰ Jesús gudxe le': —Bë'cha'a, ben le rala guunu. Na' bënni ye la'ke'a gulabiige'e ga ze' Jesús len gulazëëne le'.

⁵¹ Tzal'za tue' bënni ze'leene Jesús gliije tu gia'a tuchi len pchuuge naage bënni wendxin kie' bënni pxuuz blo'u.

⁵² Jesús gudxe le': —Bugu'u gia'tuchi'a xhlatji, koma bënni'a tadil'e len gia tuchi, larakz len gia'tuchi'a ludëëd'de leke.

⁵³ ¡Naru ti nëëz'du ki gunn gatayui'da'ne Xuuza ati Le' ksë'le'e kia' zian gayua'ke gbaaz la'ay kie'?

⁵⁴ San ¿Nakxh gak tzajtzaag diidza le chi nayoj lu Gich La'ay ki ka' rala gak?

⁵⁵ Na'teez Jesús bnaab'de bunach'a: Bixhkia' za'li nua'li gia'tuchi len yaag zdujxën'li neda, ka'kz ka naka bënni gban? Yugu dza chi gzua' rseed'da lbi'ili lu gdou' len ti gxën'kz'li neda.

⁵⁶ San yugute' le ni rak naar tzajtzaag le gulanake bënni glui'ke diidza ulaaz kie' Dios. Na'teez yugute'ke bënni useed kie' guluka'ane le tuuze len gulaxhunj'ke.

Jesús rdxiine lau'i dxin'lau'i blou

⁵⁷ Bënni'a gulazëëne Jesús guluche'ke le' liidxe Caifás, bënni pxuuz blou, ga nudzaag'ke bënni useed xhba kie' Dios len bënni guul tuzeajni'i'de.

⁵⁸ Pedro gyaj'leene le' zitu zitu, len bdxin'tie' la'chi rayu'u ki liidxe pxuuz blo'u, gyaazie len grë'leene bënni'a tun'chi'ke gdou', naar gle'i'de ga uudxi yugute' le ni.

⁵⁹ Bënni'a tunabe'i'de pxuuz len yugute'ke bënni dxin'lau'i blou, tugiilje nu gdxia' Le' xhgia' naar luchuug'be'e ki gatie' Jesús,

⁶⁰ san ti bdzëël nakxh luune, nak'te bënni zian tazi'ye'ke le rdujxaka'lau'ke kie'. Kan'ga kati guladxiine ye chope',

⁶¹ bënni ni gulanake: Bënni ni gne': “Neda gunn jkin'ja gdou' kie' Dios ati na' gak tson dza yubl yuchisa ley.”

⁶² Na' pxuuz blou gzui'de len bnaab'de Jesús: —¿Bixhkia' ti rubi'u diidza? ¿Chi byëën'du ka'ti'ga nak le tanáke kiu'?,

⁶³ Ati Jesús ti bubi'e diidza. Na' bënni pxuuz blou'a gudxe le': —Lu Le' Dios Ban rnabe'i'da li' kixhji'du netu ka'teez nak. Gdixhjë xhki li' naku le' Cristo, Le' Xi'ine Dios.

⁶⁴ Jesús gudxe le': —Li' buudx gnou'. Len neda rea' lbi'ili ule'i'li'ne Xi'ine Bënni rë'e kuiti'le'e yubeel kie' Dios nape gdu yëla wak, len zuze'e lu buaj ki xhba.

⁶⁵ Na' pxuuz blo'u pchëëze'e xhe' le benn'be' ki rdza'a ikje ati gne': ¡Diidza buudx be'e bënni ni, nak diidza ku nak lau'e Dios! ¿Naru ni nayaadzji'ru nuul giid dujxaka'lau? Chi byëëni'kz'li gne' diidza le ku nak;

⁶⁶ ¿Bixh rnaali lbi'ili? Leke gulubi'ke diidza: —Dxie' xhgia' len rala gatie'.

⁶⁷ Na' guluchiije xhëëna lau'rue'e len glutie' le'. Ye la'ke gulaga'pe'e xage'e,

⁶⁸ te'ke le': Li' naku le' Cristo, ¡Gneya'atzka nuxha' bet li'!

Pedro ti rzi'lu'ne'e ki numbe'e Jesús

⁶⁹ Tzal'za Pedro rë'e la'chi rayu'u. Na' tuubi nguul wendxin gbiiga'bi ga ze' len guudx'bi'ne: Lekz'ka' li' bdzaagu'ne Jesús, bënni Galilea.

⁷⁰ Ati Pedro ti gxhi'lu'ne'e lau'ke yugute'ke len gne': —Ti nëëz'da bixh diidza rui'u.

⁷¹ Chi nak ka bëëje ra puert'a ga budzaage'bi ye tuubi bi nguul'du len lekz'ka' leebi guudx'bi'ne bënni'a ye la'ke'a: —Bënni ni bdzaage Jesús, bënni yëdz Nazaret.

⁷² Yubl ka' Pedro ti gxhi'lu'ne'e, gne': blikz'da'ne Dios, —¡Ti numbe'a'ne bënni'a!

⁷³ Guk ye tuchi'i ka', bënni nakua'ke na' gulabiige'e ga ze' Pedro ati gle'ke le': —Keg nu rzi'ye'z, lekz'ka' li' bdzaagu'ne Jesús, koma ka' tui'ke diidza bënni Galilea rui'u diidza.

⁷⁴ Na' Pedro gzulau'e rdiidza'le'e len gne': blikz'da'ne Dios, —¡Ti numbe'a'ne bënni'a! Na'teez grëëdx'ba tuuba xi'in'druuz,

⁷⁵ ati Pedro gyajnei'de ki Jesús gudxe le': «Kati zia'a këëdx'ba xi'in'druuz tson lzu ti si'luno'u ki numbe'u neda.» Na' Pedro burooje ni', ati rënkz grëëdxe.