Mateo 25 - Porciones en Zapoteco de las Delicias

Diidza run lsaki'i kiek'bi chiibi bi raban'dou

¹ »Yëla rnabe'e ki yewayuba wak ki ka guk lu lni ki utzag'na': chiibi bi nguul raban'dou gulazi'bi li'kbi le ryuudz za len gularoj'bi yajtzaagk'bi'ne bënni'a rala ktzag'ne'e.

² Ga'yu'bi bi raban'dou ni ti nayajni'ik'bi len ye ga'yu'bi nayajni'ik'bi.

³ Bi'i ti nayajni'ik'bi gulazi'bi li'kbi, san ti glua'bi za naar ludza'bi ley yubl ka';

⁴ san bi'a nayajni'ik'bi gulazi'bi li'kbi len kiizi glua'bi za lu bëëga'du.

⁵ Ati bënni'a rala ktzag'ne'e gdzeir'de, yugute'bi glak chigask'bi len glas'bi.

⁶ Kati za rdxin laadxi'yeel, byën nu biskua': “¡Chi ze'e bënni'a rala ktzag'ne'e! ¡Guluroj ki tzajxi'li'ne!”

⁷ Yugute'bi bi raban'dou ni gulayas'bi len gulupa'a'bi li'kbi.

⁸ Na' bi'a ti nayajni'ik'bi yajëëdxk'bi bi'a nayajni'ik'bi: “Gulgun kietu lati za kieeli'a, koma chi zuak'z ru'ul li'tu.”

⁹ San bi'a nayajni'ik'bi gulubi'i'bi diidza: “Ti gak, koma xhki na'a ti gaki kietu len ti gaki kieeli. Wak'l dxia'a tziaj'li ga tuti'i'ke ley, na' si'li kieeli.”

¹⁰ San tzal zjak'bi zajxik'bi zaa, bdxiine bënni'a rala ktzag'ne'e, len bi'a nayajni'ik'bi'a gulayaaz'lemi'ne lu lni ki utzag'na' ati gyeyj puert.

¹¹ Buudx'a guludximi bi'a ti nayajni'ik'bi, tanaabi: “Xan, xan, psaalj puert'a!”

¹² San le' bubi'e diidza: “Blikz'da rnia' ki ti numbe'a lbi'ili.”

¹³ »Gulsuátekz si'na, —gne' Jesús—, koma ti nëëzi'li batxh gdxin dza'a len batxh'tek gak.

Diidza run lsaki'i ki dumi

¹⁴ »Yëla rnabe' ki yewayuba wak ki ka guk kie' tue' bënni, kati chi zuak'z tziije yëdz yubl, bliidze bënni wendxin kie' len bzue' lu naa'ke xhdumie' ki lun'chi'ke ley.

¹⁵ Kie' tue' bnëëdzje ga'yu' mil dumi'a, kie' ye tue' bnëëdzje chop mil len kie' ye tue' bnëëdzje tu mil: ki kieke bnëëdzje le lazaki'de lun'chi'ke. Na' gze'e ziije.

¹⁶ Bënni wendxin'a gxhi'e ga'yu' mil bguune ley dxin len beene ikji ye ga'yu' mil ka'.

¹⁷ Lekz'ka' bënni'a gxhi'e chop mil bguune ley dxin len beene ikji ye chop mil ka'.

¹⁸ San bënni'a gxhi'e tu mil, pchë'ëne tu yeru lyu na' pka'che'e xhdumie' bënni xaane'a.

¹⁹ »Gdëëd zian dza, budxiine laadze bënni xan'ke bënni wendxin'a, len grë'leene leke naar labeki'xhbei'de.

²⁰ Zia'a bënni'a gxhi'e ga'yu' mil bdxiine, len bunëëdzje len bënni xaane'a ye ga'yu' mil ka', ati gudxe le': “Xan, li' bzu' lu na'a ga'yu' mil ati na'a, ni de ye ga'yu' mil ka' le beena ikji.”

²¹ Bënni xaane'a gudxe le': “Dxia'a'te beenu, naku tue' bënni wendxin tzawi len tuuz'laadxu'u nak, zala lati'iz gxhi'u tuuz'laadxu'u guk, lena'a zxhëni gzua lu no'u. Gyaaz len budziiji len neda.”

²² Buudx'a bdxiine ye tue' bënni wendxin, bënni'a gxhi'e chop mil, len gne': “Xan, li' bzu' lu na'a chop mil, ati ni de ye chop mil ka' le beena ikji.”

²³ Bënni xaane gudxe le': “Dxia'a'te beenu, naku tue' bënni wendxin tzawi len tuuz'laadxu'u nak, zala lati'iz gxhi'u tuuz'laadxu'u guk, lena'a zxhëni gzua lu no'u. Gyaaz len budziiji len neda.”

²⁴ »San kati bdxiine bënni wendxin bënni'a gxhi'e tu mil, gudxe bënni xaane'a: “Xan, nëëz'da ki naku bënni bixhj, ki rla'pu ga ti guuzu, len ruzi'u le ti pxu'.

²⁵ Lena'a guudxi'da li', ati yajka'cha'a xhdumiu' xhan yu. San ni de le nak kiu'.”

²⁶ Bënni xaane'a bubi'e diidza: “bënni xhweed len bënni wendxin xhe'e naku, xhki nëëz'du ki rla'pa ga ti guuza, len ruzi'a ga ti pxua',

²⁷ gula tzajlu'u xhdumia' ga rak'chi'i dumi, naar kati udxiina uzi'a ley gdu len ikji.”

²⁸ Len gudxe bënni nakua'ke na': “Gulkua le tu mil'a lea be'a'ne len gulunëëdzj kie' bënni'a de kie' chi mil.

²⁹ Koma bënni'a de kie' uzi're zxhëni; san bënni'a ti de kie', zala lati'du'z le de kie' ulaguáke.

³⁰ Len guluzale' rayu'ul ga nak chul bënni wendxin ni ti nake bi guune. Na' sulau'e këëdxe len ktil la'a'ye.”

Yëla rchuug'be'e ki yëdz xhën

³¹ »Kati le' Xi'ine Bënni wëëde, yëla yeni xhën'te gli'iji le' len dzaage yugute'ke gbaaz la'ay kie', ati kë'e lu xhlatje xhën'te.

³² Bunach ki yugute' yëdz uludzaag lau'e, kuekie leke ki kieke, ka ruune bënni run'chi'e'ba bëku'xhiila, rbekie'ba kieez'ba bëku'xhiila len kieez'ba chiib.

³³ Ubekie'ba bëku'xhiila kuiti'le'e yubeel len chiib kuiti'le'e yëëgl.

³⁴ Len Bënni Rnabe'e gie' nu nakua' kuiti'le'e yubeel: “Guldá lbi'ili, bënni ben'la'aye lbi'ili Xuuza; gulsi yëla rnabe' le chi zua rbëëz lbi'ili ka gu'ta'grë'z yëdz'lyu ni.

³⁵ Koma gduuna ati lbi'ili ben'li le gda'wa, gbiidxa ati ben'li le gi'i'ja, gda' ka tadáke bënni zitu ati gxhi'li neda liidx'li.

³⁶ Gda' xhgiid'za ati bgaku'li neda xha', kati gui'i'da biid'li kia'; kati gyu'a liidx'gia dujyu'li neda.”

³⁷ Na' bënni'a gluune le dxia'a lunaab'de le': “Xan, ¿Batxh ble'i'tu li' rduunu ati ben'tu le gdaagu? ¿U batxh ble'i'tu li rbiidxu ati ben'tu le gi'i'ju?

³⁸ ¿Batxh ble'i'tu li' rdo'u ka bënni zitu ati gxhi'tu li' liidx'tu, u batxh bgaku'tu li' xhou'?

³⁹ ¿Batxh ble'i'tu li' re'i'du u gyu'u liidx'gia ati dujyu'tu li'?”

⁴⁰ Bënni Rnabe' ubi'e diidza: “Blikz'da kati rnia' ki yugute' le ben'li kieke bënni'du ni, kie'kza ben'li ley.”

⁴¹ »Chi nak ka' Bënni Rnabe' gie'e bënni nakua'ke kuiti'le'e yëëgl: “Gultziaj ki'il, bënni nak'li bach gbaaga'li xhgia'; gultzajtzu'u lu gi'gabil le chi zua rbëëz le bënni xëwi len gbaaz kie'.

⁴² Koma gduuna ati lbi'ili ti ben'li le gda'wa, gbiidxa ati ti ben'li le gi'i'ja,

⁴³ Gda' ka tadáke bënni zitu ati ti gxhi'li neda liidx'li, xhgiid'za ati ti bgaku'li neda xha', kati gui'i'da len gyu'a liidx'gia ti dujyu'li neda.”

⁴⁴ Na' leke lunaab'de Le': “Xan, ¿Batxh ble'i'tu li' rduunu u rbiidxu u rdou' ka bënni zitu u xhgiid'zu u re'i'du u gyu'u liidx'gia ati ti guk'leen'tu li'?”

⁴⁵ Bënni Rnabe' ubi'e diidza: “Blikz'da kati rnia' ki yugute' le ti ben'li kieke bënni'du ni, lekz'ka' ti ben'li ley kia'.”

⁴⁶ Bënni'a tzjake lu yëla rsaka'zi' tzalzu, ati bënni dxia'a tzjake lu yëla naban tzalzu.»