Mateo 22 - Porciones en Zapoteco de las Delicias

Diidza run lsaki'i ki gwi'i'waagu xhën ki utzag'na'

¹ Yubl ka bui'leene leke diidza Jesús len diidza run lsaki'i. Gudxe leke:

² «Yëla rnabe'e ki yewayuba rak ki ka guk kie' tue' bënni rnabe'e, beene gwi'i'waagu xhën naar ktzag'naa'bi bi'i kie'.

³ Psë'le'e bënni wendxin kie' tzajliidze bënni'a nuliidze, san bënni'a nuliidze'a ti gle'en'de tzjake.

⁴ Yubl psë'le'e ye la'ke bënni wendxin kie', gudxe leke: “gultzajëëdx'ke bënni'a nuliidz'ka'ne ki chi gba'a la'wa'gu. Chi gnabe'a ludëëd'de'ba xhpeedxa len yugute' chi naba'a; guldá gia'aj'gaag'li.”

⁵ San bënni'a nuliidze'a ti yajake. Tue' gyiije layeel kie', ye tue' gyiije wendxin kie',

⁶ len ye la'ke gulazëëne bënni wendxin kie' bënni rnabe'a len gulusaka'dë'ke leke ati guludëëd'de leke.

⁷ Na' bënni rnabe'a bdze'i'tzki'de, len gnabe'e bënni rajake gdil kie' ludëëd'de bënni'a guludëëd'de bënni wendxin kie' len luzeegie yëdz kieke.

⁸ Na' buudx'a gudxe bënni wendxin kie': “Gwi'i'waagu chi naba'a, san bënni'a nuliidz'ka'ne ti nak'ke bach layaazie.

⁹ Gultziaj la nëëz xhën, len gululiidze yugute'ke bënni tzajxaka'li'ne.”

¹⁰ Bënni wendxin kie' gularooje la nëëz len gulutzaage yugute'ke bënni'a guludzaage, ley bënni tuune le nak dxia'a ley bënni tuune le ku nak, ati ka' bdza' yu'u ga tuune lni ni.

¹¹ »Kati bënni rnabe'a yajyue bënni'a nuliidze'a, ble'i'de tue' bënni ti nakue' laari le takue' kati rajake lni ki utzag'na'.

¹² Ati gudxe le': “Bë'cha'a, ¿Nakxh beenu gyaaziu liidxa xhki ti naku laari le takue' kati rajake lni ki utzag'na'?” San bënni'a ti bubi'e diidza.

¹³ Na' bënni rnabe'a gudxe bënni wendxin kie', “Gulguuga' ni'a'ne'e len gulubiije rayu'ul ga nak'tzka chul. Na' sulau'e këëdxe len ktil la'a'ye.”

¹⁴ Koma zian'ke bënni rliidz'ka'ne san lati'iz'ke bënni kë'ka'ne.»

Yëla rnaab ki laaz'sua'ke

¹⁵ Na' buudx'a, bënni fariseo gluune diidza dzaag nakxh luune lazi'be'e Jesús naar gui'e diidza le gunn ludxie' le' xhgia'.

¹⁶ Na' gulusë'le'e la'ke bënni da'ke leke dzaag'ke la'ke bënni da'ke Herodes, ki le'ke le': —Bënni useed, nëëzi'tu ki diidza rui'u nak diidza li, Li' rseed'du ka'teez nak nëëz kie' Dios, ti rzenaagu le taná bunach, koma ti rbiaj'je'idu bunach.

¹⁷ Bixh rnou' li': ¿Nak dxia'a kiixhj'tu laaz'sua'tu kie' César u ti nak?

¹⁸ Jesús guk'be'i'de ki yu'u xhe'e ikj'lau'ke, ati gudxe leke: —Nak'li ka bënni nuda' blo'u, ¿Bixhkia' rsi'be'li neda?

¹⁹ Gulului'i'tzki neda tu dumi le rgiixhji'li laaz'sua'li ki Roma. Na' yajxi'ke tu dumi,

²⁰ Ati Jesús bnaab'de leke: —Nuxh lau'rui'i da' ni len nuxh lei' nayoj ni?

²¹ Leke gulubi'ke diidza: Kie' César. Na' Jesús gudxe leke: Gulunëëdzj kie' César le nak kie' César, len gulunëëdzj kie' Dios le nak kie' Dios.

²² Kati gulayëën'de le gne', gulubaani'tzki'de; guluka'ane le' ati ye'wa'ke.

Tunaabe xhki bënni nat tubaane yëla gut

²³ Larakz dza'a, la'ke bënni saduceo yajyu'ke Jesús. Leke tanáke ki bënni nat ti tubaane lu yëla gut, lena'a gle'ke Jesús:

²⁴ —Bënni useed, Moisés gne' ki xhki nu bënni gatie' len ti gulakua'bi bi kie' len nguul kie', bënni bë'chi' guulje rala si'e'nu ka nguul kie' nguul'a bugan'n uzeeb'nu naar gnëëdzje'bi bi kie', kie' bënni bë'che'a chi gutie'.

²⁵ Guk ki lu yëdz kietu, gulakua'ke gaadx bë'chi'ke, bënni naguul ptzag'ne'e, len gutie'. Ati le ti gulakua'bi bi kie', bënni burop'a gzua'leene'nu nguul uzeeb'a.

²⁶ Lekz'ka' guk kie' bënni burop'a len bënni bunn'a, len ka guk kieke gaadx bë'chi'ke ka'.

²⁷ Buudx'a, lekz'ka' gut'nu nguul'a.

²⁸ Na' kati bënni nat lubaane lu yëla gut, ¿Nuxh'lke gak nguul kie' nguul ni xhki gaadx'ke ka gulakua'leene'nu?

²⁹ Jesús bubi'e diidza: —¡Nakchixi'tzki'li, koma ti numbe'li Diidza La'ay len yëla wak kie' Dios!

³⁰ Kati bënni nat lubaane lu yëla gut, bënni u nguul tir lutzag'naa'ke, koma ulak'ke ka gbaaz la'ay kie' Dios nakua'ke yewayuba.

³¹ Ati le rak kieke bënni nat tubaane lu yëla gut, ¿Naru ti rul'i'li ki kuin'kze Dios gne':

³² “Neda naka Dios kie' Abraham, kie' Isaac len kie' Jacob”? ¡Ati Le' ti nake Dios kieke bënni nat, nake Dios kieke bënni ban!

³³ Kati gulayëën'de le ni, bunach gulubaan'de ka rseed'de Jesús.

Xhba le nak'r blou

³⁴ Bënni fariseo guludzaage kati gulanëëz'de ki Jesús psiije rua'a'ke bënni saduceo,

³⁵ ati tue' bënni useed xhba kie' Dios, tzal gunn si'be'e Le', bnaab'de Le':

³⁶ —Bënni useed, ¿Lu xhba kie' Dios, bil xhba nak'r blou?

³⁷ Jesús gudxe le': —“Bdxi'i'de Xaanu Dios gdu laadxi'dau'u, gdu laadxu'u len gdu ikj'lau'u.”

³⁸ Xhba ni nak'r le blou len le zia'a.

³⁹ De ye tu le nak blou ka nak le zia'a ni, len rna; “Bdxi'i'de bënni bë'chi' lzo'u ka nadxi'i'du kuinu.”

⁴⁰ Lu grop'te xhba ni nun'gak xhliibi gdu xhba kie' Dios len le guluzooje bënni glui'ke diidza ulaaz kie' Dios.

¿Nuxh xi'ini nake le' Cristo?

⁴¹ Tzal bënni fariseo ni nudzaag'ke,

⁴² Jesús bnaab'de leke: —¿Bixh rnaali lbi'ili kie' Cristo? ¿Nuxh rak xuuze? Leke gulubi'e diidza: David nake xuuze.

⁴³ Na' Jesús gudxe leke: —¿Ati bixhkia' David be'e diidza ulaaz kie' Bë' La'ay kie' Dios, ati re' le', Xan? Koma David gne':

⁴⁴ “Xan'ru gudxe Xaana” Gri'i kuiti le'a yubeel, tzal Neda guuna ki bënni'a ti tale'i'de li' dxia'a lakua'ke xhni'u.

⁴⁵ ¿Nakxh gunn gake le' Cristo xi'ine David, xhki kuin'kze David re' le' Xan?

⁴⁶ Nutunu bënni benn ubi'e diidza, ati le gde'la' dza ni, nuturnu buaaxhji bi gnaabi le'.