Mateo 18 - Porciones en Zapoteco de las Delicias

¿Nuxh nak'r blou?

¹ Larakz dza'a, bënni useed kie' Jesús gulabiige'e ga ze' len gulunaab'de le': —¿Nuxh nak'r blou lu yëla rnabe' ki yewayuba?

² Na' Jesús bliidze'bi tuubi bi'dau' len bze'bi gatzj'lau'i'a

³ ati gne': Blikz'da rea' lbi'ili ki xhki ti ktza'li yëla rbëëz kieeli len këëz'li ka tabëëz'bi bi'dau', ti tzaaz'li lu yëla rnabe' ki yewayuba.

⁴ Bënni'a rxhëxhj laadxe'e len rbëëze ka rbëëz'bi bi'dau' ni, bënni'a nak're blou lu yëla rnabe' ki yewayuba.

⁵ Len bënni'a rzi'e'bi lu la' tuubi bi'dau' ka bi'dau' ni', neda rzi'e.

Banaadx le nuche' gbixh'ru lu dula

⁶ »Ati nu'ti'teez nu gun ga gbixh'bi lu dula tuubi bi we'en'du bi rajle'bi neda, wak'l kie' dxia'a luuge'e yeene tu giaj gich len luzal'e le' lu nis xhën.

⁷ ¡Bayechi nak'tzka ki yëdz'lyu ni koma nakua'tzka le grixh le' bënni lu dula! Le ni' rala'kz lakua', san ¡bayechi nake bënni'a guune ga gbixe lu dula bënni yubl!

⁸ »Lena'a, xhki no'u u ni'u tun ga guunu dula; pchuug'k len bzal ley zitu; nak'ru dxia'a kchuugu ley len waaziu lu yëla rnabe' kie' Dios, ka len grop'te no'u u grop'te ni'u tzajtzu'u lu gi'gabil.

⁹ Len xhki lau'u run ga guunu dula, gliaj len bzal ley zitu; nak'ru dxia'a waaziu lu yëla rnabe' kie' Dios len tuuz lau'u, ka len grop'te lau'u tzajtzu'u lu gi'gabil.

Diidza run lsaki'i kieeba bëku'xhiila gnit'ba

¹⁰ »Ti gna ku tzaazlaadxik'li'bi yugu bi'dau' ni. Koma rea' lbi'ili ki yewayuba nakua'ke gbaaz la'ay kiek'bi len tuyu'tekze lau'rue'e Xuuza zue' yewayuba.

¹¹ [Koma Le' Xi'ine bënni biide naar usle' le chi na'nit.]

¹² »¿Bixh rnaali lbi'ili? Xhki tue' bënni nakua'ba kie' tu gayua'ba bëku'xhiila ati rnit'ba tuuba, ¿Naru ti rka'ane'ba bua' tap'lalj'yu'chenu'ba lu gia'a, naar tzajdiilje'ba bëku'xhiila'a gnit'ba?

¹³ Ati ka nak'tza udzëël'de'ba, rudziijir'de kieeba bëku'xhiila'a ni' ka kiek'ba bua' tap'lalj'yu'chenu'ba bua'a ti gulanit'ba.

¹⁴ Lekz'ka' Xuuz'li zue' yewayuba keg tuubi bi'i we'en'du ni re'en'de lanit'bi.

Ka rala si'xhën'ru bë'chi' lza'a'ru

¹⁵ »Xhki bënni bë'chu'u bi ksake'e li', chop'z'li ka gulgui' diidza len ben ga si'lu'ne'e lea beene'a. Xhki gzenaage, chi bude'li'du'ne bënni bë'chu'u.

¹⁶ San xhki ti gzenaage, bliidze ye tue' u chope' bënni, naar layëën'de yugute' diidza gui'li len gunn lujxaka'lau'ke.

¹⁷ Xhki lekz'ka' ti gzenaage len leke, bzua' ley lu dxin'lau'i kieke bënni'a nayajle'ke ati xhki lekz'ka' ti gzenaage len bënni dxin'lau'i'a, na' gunn gle'i'du'ne ka tue' bënni ti nayajle'e u ka tue' bënni rkiixhje laaz'sua'ke ki Roma.

¹⁸ »Blikz'da rea' lbi'ili ki yugute' le lbi'ili guuga'li lu yëdz'lyu ni, lekz'ka' gaaga' yewayuba, ati le lbi'ili kseedx'li lu yëdz'lyu ni, lekz'ka' tseedx yewayuba.

¹⁹ »Le ni rea' lbi'ili: Xhki chope' bënni luune diidza dzaag lu yëdz'lyu ni bi lunaab'de Dios kati lui'leene le' diidza, Xuuza zue' yewayuba gunne ley.

²⁰ Koma ga nudzaag'ke chope' u tsone' bënni lu la', ladj'ke'a na' zua' neda.

²¹ Na' Pedro yajnaab'de Jesús: —Xan, ¿Bal lzu rala si'xhëëna'ne bënni bë'cha'a xhki bi ksake'e neda? ¿Gaadx lzu?

²² Jesús bubi'e diidza: —Ti rea' li' ki gaadx lzu'z, rea' li' ki tson'lalj'yu'chi lzu le gaadx lzu'a.

Diidza run lsaki'i kie' bënni'a ti gu'un'de si'xhëëne

²³ »Lena'a, yëla rnabe'e ki yewayuba rak ki ka guk kie' tue' bënni rnabe' gu'un'de kueki'xhbei'de len bënni wendxin kie'.

²⁴ Kati gzulau'e, yajua'ke lau'e tue' bënni wendxin kie', bënni ni ra'le'e kie' dumi ki chop'gayua' mil iz dxin.

²⁵ Ati koma bënni wendxin ni ti de kie' len bixh kiixhj'de, lena'a bënni rnabe'a gnabe'e ki lado'u'ke le' dzaage'nu nguul kie' len bi kie' ati lekz'ka' yugute' le de kieke, naar waaxhj lea rale'e.

²⁶ Bënni wendxin ni bzechu xhiibe lau'e bënni rnabe' ni len gutayui'de le', gne': “Ben'xhën'laadxu'u, len yugute' le rala kiu' ugiixhja.”

²⁷ Na' bënni rnabe'a buechilaadxe'e le'; len gxhi'xhëëne yugute' lea rale'e kie' ati psaane le'.

²⁸ »San kati burooje'a, bënni wendxin ni budzaage tue' bënni wendxin lze'e bënni rale'e kie' dumi ki tu'gayua' dza dxin. Gxhën'je yeene re'eni'kz'de gdëëd'de le', rne': “¡Gdiixhj le ra'lu'u kia'!”

²⁹ Bënni lze'a bzechu xhiibe len gutayui'de le', rne': “Ben'xhën'laadxu'u, len yugute' le rala'a kiu' ugiixhja.”

³⁰ San le' ti gu'un'de, ati beene ga lagu'e le' liidx'gia nakati gdiixhj're yugute' lea rale'e kie'.

³¹ Le ni beeni'tzki zi' laadxi'dau'ke ye la'ke bënni'a tun'leene le' dxin, bënni ni yajake lau'e bënni rnabe' len gulagixhji'de le' yugute' le guk.

³² Na' bënni rnabe', gnabe'e tzajliidz'ke bënni wendxin ni ati gudxe le': “¡Bënni xhe'e! Neda gxhi'xhëëna yugute' le ralu'u kia' koma dujëtayui'du neda.

³³ Lekz'ka' li' gula wechilaadxu'ne bënni lzo'u, ka neda buechilaadxa'a li'.”

³⁴ Ati bdze'i'tzki'de bënni rnabe'a, lena'a gnabe'e ki lusaka'zi'ke le' nakati kiixhj're yugute' lea rale'e.

³⁵ Jesús lekz'ka' gne': —Lekz'ka' guune len lbi'ili Xuuza zue' yewayuba, xhki lbi'ili ti si'xhëën'li'ne bënni bë'chi'li gdu laadxi'li.