Mateo 14 - Porciones en Zapoteco de las Delicias

Yëla gut kie' Juan bënni rkiile nis bunach

¹ La dza'a na'z, Herodes bënni gnabe'e Galilea, byëën'de diidza kie' Jesús,

² len gudxe bënni wendxin kie': «Juan'a bënni'a pkiile nis bunach, chi bubaane lu yëla gut. Lena'a nape yëla wak xhën.»

³ Koma zia'a Herodes gnabe'e ki lazëëne Juan len lagu'u'ke le' liidx'gia'a ni'a kieenu Herodías, nguul kie' bënni bë'che'e Filipo,

⁴ koma Juan gudxe le': «Ti rala sua'leenu'nu nguul kie' bënni bë'chu'u.»

⁵ Herodes gu'un'de gdëëd'de Juan san guudxi'de bunach, koma yugute'ke glaki'de ki Juan nake tue' bënni rue'e diidza ulaaz kie' Dios.

⁶ San kati Herodes guli'i'de iz, bi nguul kieenu Herodías bya'a'bi lau'ke bënni'a nuliidze, Herodes bdaani'tzki'de ka bya'a'bi

⁷ ati gxhi'lu'ne'e ki bi'ti'teez le gnaab'bi unëëdzje.

⁸ Na' leebi, ka chi glu'u'yëla'nu'bi xhna'bi guudx'bi'ne Herodes: —Re'en'da gdxiu' ikje Juan bënni rkiile nis bunach lu xhiiga.

⁹ Herodes gzua'yechi'tzke; san le gxhi'lu'ne'e lau'ke bënni'a nuliidze, gnabe'e lui'ke'bi ley.

¹⁰ Gnabe'e luchuuge ikje Juan lu liidx'gia'a;

¹¹ na' yajua'ke ley lu xhiiga len gulunëëdzje len bi'i nguul ni, ati leebi bui'bi'nu xhna'bi.

¹² Na' guladxiine bënni useed kie' Juan, guluzi'e le' len yajka'chi'ke le'; buudx'a yajtixhji'kde Jesús.

Jesús rnëëdzje le la'we zian'k bunach

¹³ Kati Jesús gnëëz'de le guk kie' Juan, buze'e na' len tuuze gyiije lu barku tu latj ga nutunu zua'. San bunach'a gulak'be'i'de len gularooje ki yugu yëdz'a, na' gulagie'le'e nëëz yu len yajtzaag'ke Le'.

¹⁴ Kati Jesús bëtje lu barku'a ble'i'de bunach zian ati buechilaadxe'e leke len buune bënni we'a zjake ladj'ke'a.

¹⁵ Le chi za' ral bënni useed kie' gulabiige'e ga ze' len gle'ke Le': —Chi gdzë' len latj ni nutunu nakua'. Busë'la bunach ni naar tzjake yëdz nakua' ga'la'z ni, ki tzajë'u'ke le la'we.

¹⁶ Jesús bubi'e diidza: —Ti run bayuudx ksë'la'ka'ne; gulunëëdzj lbi'ili le la'we.

¹⁷ Leke gulubi'ke diidza: —Ga'yu'z yët'xhtiil len chop'ba bël de'ba kietu.

¹⁸ Jesús gudxe leke: —Guldujua' ni.

¹⁹ Na' gnabe'i'de bunach'a labë'ke lau'gixi. Gdëëd'a gde'le'e ga'yu' yët'xhtiil len chop'ba bël ni, byue' lu xhba len ben'la'aye ley, bxhuuxhje yët'xhtiil'a len bnëëdzje kieke bënni useed kie' naar lagis'ke kiegak bunach.

²⁰ Yugute' bunach'a gla'we tzka glëëlj'de; ati ye tzka buga'an ki yët'xhtiil'a len bël'a chin'nu bdë'ë guladza',

²¹ ka ga'yu' mil'ke bënni gla'we, kiizi nguul len bi'dau'.

Jesús rze'e lu nis

²² Gdëëd le ni, Jesús beene ga bënni useed kie' labeene lu barku naar lanëëre tzjake tzala'a nis, tzal'za Le' ruse'e bunach.

²³ Kati buudx buse'e bunach'a, greene gia'a yaje'leene diidza Dios. Kati chi kchul tuuze chi bga'ane,

²⁴ tzal'za barku chi ziaj gatzj'lau'i nis, len nis'a rbixh'rtul rajtzu'u barku'a koma rak'tzka bë' zga ga zjake'a.

²⁵ Ziil'bal'a Jesús rze'e lu nis'a ziije zga ga nakua'ke'a.

²⁶ Kati bënni useed kie' gulale'i'de Le' rze'e lu nis'a, tzka'ti'ga glaadxi'de guluskua'ke: —¡Pxin'a!

²⁷ San Le' bliidze leke, rne': —¡Dxiiz! ¡Needa'a: ti gaadxi'li!

²⁸ Na' Pedro gudxe Le': —Xan, xhki li'a, gnabe'e giida ga zeu'a lu nis'a.

²⁹ —Jesús gudxe le': —Da. Na' Pedro bëtje lu barku'a len gzulau'e rze'e lu nis'a zga ga ze' Jesús.

³⁰ San kati gnëëz'de rga'pa le' bë'a, guudxi'tzki'de len gzulau'e rëtje lu nis'a ati bisku'e: —¡Xan, buslá neda!

³¹ Na'teez Jesús gxhëëne ne'e Pedro len gudxe le': —¡Ti bi nak'kz yëla rajle'du kiu'! ¿Bixhkia' ni ruuniz li'?

³² Kati gulabeene lu barku, bubë'dxi bë'a.

³³ Na' bënni nakua'ke lu barku'a guluzechu xhiib'ke lau'e Jesús len gle'ke Le': —¡Leel, Li' naku Xi'ine Dios!

Jesús ru'uune bënni we' ki yëdz Genesaret

³⁴ Jesús len bënni useed kie' guladëëde tzala'a nis len guladxiine yëdz Genesaret.

³⁵ Bënni yëdz'a gulumbe'ke Jesús ati gulagixhji'de yugu bunach ki gia'a yeego'a. Na' bunach guluche'ke bënni we' kieke ga zue' Jesús,

³⁶ ati tatayui'de Le' gnëëdzje lsenz lagaane zala luuxhi'z laari xhua kuudze'e, len yugute'ke bënni tagaane ley, tu'ueake.