Mateo 12 - Porciones en Zapoteco de las Delicias

Bënni useed kie' Jesús talje deu dza tu'ueak'laadxi'ke bënni Judea

¹ Tu dza, dza tu'ueak'laadxi'ke bënni Judea, Jesús rde' ladj layeel. Na' bënni useed kie' guladuune len gulazulau'e talje deu ki xhua'xhtiil len ta'we xhsei.

² Bënni fariseo gulale'i'de leke ati gle'ke Jesús: —Byu'tzka, bënni useed kiu' tuune le ti de lsenz gun'ru dza'a ru'ueak'laadxi'ru.

³ Ati Le' bubi'e diidza: —¿Naru ti rul'i'li le beene tu lyas David len bënni lze'e kati guladuune?

⁴ Gyaazie liidxe Dios len bënni lze'e ati gla'we yët'xhtiil le chi nak La'ay lau'e Dios, nak'te pxuuz'z de lsenz la'we yët'xhtiil'a.

⁵ ¿U ti rul'i'li lu xhba kie' Moisés ga rna ki pxuuz ki gdou' ti tuune dula zala ti tu'ueak'laadxi'ke dza tu'ueak'laadxi'ke bënni Judea?

⁶ Lena'a rea' lbi'ili ki nu zua' ni nak'r xhën ka gdou'.

⁷ Lbi'ili ti rajni'i'li bixh re'e'ni gna' diidza ni: “Ti re'en'da nu bua' gdëëdi'li'ba lau'a, le re'en'da nak wechilaadxi'i lza'a'li.” Naru la chi gyajni'i'li diidza ni, ti guspaaga'li'ne xhgia' bënni'a tibi dula nun'ke.

⁸ Koma Le' Xi'ine Bënni nape yëla rnabe' ki dza tu'ueak'laadxi'ke bënni Judea.

Jesús ru'uune tue' bënni re'i'de dza tu'ueak'laadxi'ke bënni Judea

⁹ Buze'e na' Jesús len gyaazie lu yu'u useed ki yëdz'a.

¹⁰ Ze' na' tue' bënni nat'zi ne'e; ati bunach tugiilje nakxh luune ludxie' xhgia' Jesús, lena'a gulunaab'de Le': —¿Ba de lsenz un'ru'ne bënni re'i'de dza tu'ueak'laadxi'ke bënni Judea?

¹¹ Jesús bubi'e diidza: —¿Nuul'li xhki zuaaba kieeli tuuba bëku'xhiila ati rbixh'ba lu yeru nis dza ru'ueak'laadxi'li, ti riaj'li len rubiaj'li'ba?

¹² ¡La zakir'de tue' bënni ka tuuba bëku'xhiila! Lena'a, de lsenz gun'ru le nak dxia'a dza tu'ueak'laadxi'ke bënni Judea.

¹³ Na' gudxe bënni'a nat'zi ne'e: —Bli no'u. Bënni'a blie' ne'e len bueak'te dxia'a ka nak le ye tzala'a ne'a.

¹⁴ San kati bënni fariseo gularooje na', gulazulau'e tuune diidza nakxh luune ludëëd'de Jesús.

Jesús bënni'a nusë'le'e Dios

¹⁵ Kati Jesús gnëëz'de le ni, zuwëëje ati zian'k bunach zjak'leene le'. Ru'uune yugute'ke bënni te'i'de,

¹⁶ len rnabe'i'de bunach ki ti lui'ke diidza kie' lau'i lau ka.

¹⁷ Le ni guk naar yajtzaag diidza le gne' Isaías bënni be diidza ulaaz kie' Dios kati gne':

¹⁸ «Ni zue' bënni wendxin kia', bënni'a chi grëa'ne, nadxi'i'tzki'da'ne, len ruzakalaadxa'a len Le'. Bë' La'ay kia' sua len Le', len utzajtixhjë'e gdu yëdz'lyu yëla rbë'xhbei dxia'a.

¹⁹ Ti se' ruzbë' len ti gusku'e; nutunu gyëëni chi'e la nëëz.

²⁰ Ti ksiuudxe kitzje' yëtj'a chi nazú bë len ti ksuule rabau'a lea chi zuakz ru'ul, nakati gun're ga gnabe' yëla rbë'xhbei dxia'a.

²¹ Len yugute' yëdz uluune Le' lëëz.»

Tuspaage'e xhgia' Jesús

²² Guluche'ke lau'e Jesús tue' bënni yu'u le' bë' xëwi, na'chul lau'e len ti rak gui'e diidza, ati Jesús beene ga bule'i'de ati bui'e diidza.

²³ Yugute'ke tubaan'de tunaabi lza'a'ke: «¿Naru bënni Xi'ine David bënni ni'?»

²⁴ Kati bënni fariseo gulayëën'de le ni, gulanake: «Beelzebú, xan'ke bë' xëwi nak nu rnëëdzj kie' bënni ni yëla wak naar ubiije bë' xëwi'a.»

²⁵ Ati Jesús nëëz'de le rza' ikj'laadxi'dau'ke, lena'a gudxe leke: «Bi'ti'teez yëdz xhën le naroj chop'l len tadil, unit'lau, len nu'ti'teez bënni dzë'ë'ke tuuz yu'u len tadil'e ulanit'lau'e.

²⁶ Lekz'ka' xhki bënni xëwi ubiije bënni xëwi, len larakz leeze til'e; ¿Nakxh guune gun'chi'e yëla rnabe' kie'?

²⁷ Lbi'ili rnaali ki rubiija bë' xëwi len yëla rnabe' kie' Beelzebú; ati xhki ka nak, ¿nuxh rnëëdzj yëla rnabe' kieke bënni'a da'ke lbi'ili ki lubiije bë' xëwi? Lena'a, kuin'gakze tuune ga runn'be' ki lbi'ili nak'chixi'li.

²⁸ Koma xhki neda rubiija bë' xëwi len yëla rnabe' kie' Dios, le ni re'e'ni gna ki yëla rnabe' ki yewayuba chi bdxin ga zuaali.

²⁹ »¿Nakxh'kz guune tue' bënni tzaazie liidxe tue' bënni naal len kuaane le de kie', xhki ti guuge'e le' zia'a? Ka'az gunn kuaane le de kie'.

³⁰ »Bënni ti za'leene neda, neda rudabaage'e, len bënni ti rutuub'leene neda, rus'lasie.

³¹ »Lena'a rea' lbi'ili ki Dios uzi'xhëëne xhtu'la'ke bunach len yugute' diidza le ku nak le lanáke, san ti si'xhëëne xhki lanáke diidza le ku nak kie' Bë' La'ay kie' Dios.

³² Le' uzi'xhëëne zala bënni gui'e diidza le ku nak kie' le' Xi'ine Bënni; san bënni bi gne' kie' Bë' La'ay kie' Dios ti si'xhën'kze le' dza zuaaru na'a u dza zia'a za'.

Len xhlu'li'i le rbia rak'be'i'ru bixh yaag'a

³³ »Xhki yaag nak dxia'a, ubia xhlu'li'i dxia'a; xhki yaag ti nak dxia'a ubia xhlu'li'i ku nak; koma len xhlu'li'i le rbia tu tu yaag rak'be'i'ru bixh yaag'a.

³⁴ ¡Xi'in bel'! ¿Nakxh'kz gunn gui'li diidza dxia'a, xhki nak'li bënni xhe'e? Le rza'z ikj'laadxi'dau'e bënni rui'e diidza.

³⁵ Bënni dxia'a rue'e diidza dxia'a koma le dxia'a zua len le', len bënni xhe'e rue'e diidza le ku nak koma yëla xhe'e zua len le'.

³⁶ Ati neda rea' lbi'ili ki dza kati kchuug'be'e Dios, yugute'li useedx'la'an'li bi'ti'teez diidza le ku nak le be'li.

³⁷ Koma larakz diidza le be'li kchuug'be' kieeli, ati ley gun ga si'li yëla ruslá u gbaaga'li xhgia'.»

La'ke tunaabe le gunn'be' yëla wak

³⁸ Na' lake bënni fariseo len bënni useed xhba kie' Dios gle'ke Jesús: —Bënni useed, re'eni'tu gle'i'tu li' guunu le gunn'be' yëla wak.

³⁹ Ati Jesús bubi'e diidza: —Bunach ti tabëëze dxia'a len nak'ke chop'laadxi tunaabe le gunn'be' yëla wak, san kaaz guk kie' Jonás gak le gunn'be' kieke.

⁴⁰ Ka Jonás gyu'e le'e'ba bël xhën tson dza len tson yeel, lekz'ka' le' Xi'ine Bënni tzu'e xhan yu tson dza len tson yeel.

⁴¹ Kati gdxin dza kchuug'be'e Dios kieke bënni nakua'ke dza zuaaru na'a, bënni Nínive ulayas'ke len luspaage'e leke xhgia'; koma bënni Nínive gulubi'i'laadxi'ke len Dios kati gulayëën'de diidza be'e Jonás, len nu zua' ni nak'r xhën ka Jonás.

⁴² Lekz'ka' kati gdxin dza kchuug'be'e Dios kieke bënni nakua'ke dza zuaaru na'a, nguul gnabe'nu yëdz Saba dza kati gzue' Salomón uyas'nu len guspaaga'nu leke xhgia', koma gaagi zitu yëdz'lyu biid'nu duzenaag'nu yëla nayajni'i kie' Salomón, len nu zua ni nak'r xhën ka Salomón.

Bë' xëwi le rudxin

⁴³ »Kati tu bë' xëwi ruroj le' tue' bënni, rda latj yu biidx rgiilj ga uzi'laadxi'i, len xhki ti rdzëël, rna:

⁴⁴ “Wëëja liidxa ga brooja.” Kati rudxin, rudzëëli le' bënni ni ka tu yu'u ga nutunu zua', le na'lua len naba'a.

⁴⁵ Na' riaj len rajxi' ye gaadx bë' xëwi nayali'i'rk ka ley len zura tayaaz le' bënni ni, ati ryali'ir le rak kie' ka kati'a gyu'u le' tuuz bë' xëwi. Ki gak lekz'ka' kieke bunach ti tabëëze dxia'a.

Xhne'e len bënni bë'che'e Jesús

⁴⁶ Tzal Jesús ni rue'e diidza len bunach, xhne'e len bënni bë'che'e guladxiine na' len tabëëze le' rayu'ul, koma te'en'de lui'leene Le' diidza,

⁴⁷ tue' bënni gdixhji'de Jesús: —Xhno'u len bënni bë'chu'u nakua'ke rayu'u len te'en'de lui'leene Li' diidza.

⁴⁸ Ati Le' bubi'e diidza kie' bënni'a gdixhji'de Le': —¿Nuxh rak xhna'a len bënni bë'cha'a?

⁴⁹ Na' blui'e zga ga nakua'ke bënni useed kie' ati gne': —Bënni ni nak'ke xhna'a len bënni bë'cha'a.

⁵⁰ Koma nu'ti'teez nu run le ryaazlaadxe'e Xuuza zue' yewayuba, nake bënni bë'cha'a, nguul zaana len xhna'a.